• اليوم الدكتورة قالت نصيحة حق الطلبة في ندوة عن الدراسات العليا و أحس ودي أعيد اقتباسها لكم🌟 خصوصًا إن إلي قالته عشته شخصيًا و كان له تأثير جدًا كبير✔️ألا و هي: في حال التخصص موفر لكم مادة " مشروع بحث " فلا تتهاونون في اقتناص الفرصة و الإستفادة من وجودها قبل التخرج💡يتبع ..
إذا بنيي حق جامعة الكويت - كلية العلوم - تخصصات العلوم البيولوجية بأفرعها فمادة " مشروع بحث " تُصنف لنا كمادة اختيارية و لٰكن الوحيدة إلي لها شروط ف؟ الطالب ممكن يتخرج بدون ما ياخذها و هٰذا شي عادي لأن مو مجبور و لٰكن؟
الطلبة إلي مفكرين يكملون دراسات عُليا📚 أنصحكم من القلب إنكم تبذلون محاولات و تسعون بكل ما عندكم إنكم ما تتخرجون بدونها أدري مو كل الدكاترة يستقبلون و المادة عدد الطلبة إلي يسولفون لكم عنها قليلين جدًا ينعدون لأن مو وايد أصلاً ياخذونها بس بحاول أبين لكم ليش لازم تحاولون تمام؟✨
- مادة مشروع بحث تعيشكم تجربة بحث فعلية تجربة مُختلفة تمامًا عن لابات المواد، راح تكتشفون صفات يديدة فيكم طريقة تفكيركم راح تتغير راح تتعلمون علىٰ ضغط حياة البحث و شلون تتكيفون وياه و تصيرون أكثر مرونة هٰذي الفترة راح تكوم بمثابة الخطوة الأولىٰ نحو شخصية أكاديمية أكثر تقدمًا حلو؟
الـ ٣ أشهر إلي راح تاخذون فيها مشروع بحث راح تعتبر مفتاح إنكم تفهمون شنو يعني حياة الأبحاث و شلون نتعامل مع المشاكل في اللاب؟ شلون نبني توقعات صح؟ و الأجمل فرصة الأخطاء إلي راح تكون بمثابة المعلم الأول📍، راح تصير نظرتكم أوسع و مهاراتكم أفضل و كل يوم راح يكون مثابة درس يديد📮
فهٰذي المادة تخلق لكم بشكل ما حياة مصغرة لما سيجري في المستقبل إذا كملتوا، چنها تهيئكم عشان إذا بديتوا الخطوة الأكبر تكونون أكثر استعداد لها بصفات عملية و شخصية أفضل فإهيا بمثابة تدريب حق المستقبل و بناء مبكر لمهارات تطوركم و صقل صفات ما راح تشوفونها إلا لمن تنحطون بهالتجربة✨
• فالمادة عبارة عن خطوة تضيف لكم الكثير صج إنها اختيارية بس إذا عندكم هدف لي جدام هالمادة الإختيارية راح تسوىٰ وااااايد حاولوا قبل التخرج تسعون لها بكل طاقتكم بس بنفس الوقت شنو؟ لا تحطون في بالكم إن إذا ما صارت فهذا معناته إنكم متأخرين و طافتكم فرصة كبير لا كلش☑️
لأن كل واحد فينا له وقت معين تبدي قصته إنتو بس توكلوا على الله و بذلوا الأسباب و اسعوا و إذا الله كاتبها لكم بيفتح لكم هالرزق و بيسخرلكم كل شي و إذا مو مكتوبة تاخذونها قبل التخرج فلا تيأسون انتو سويتوا الي عليكم و الباجي علىٰ الله و كل شي من الله إيّي بتوقيت أحلىٰ ناطركم بعدين💕
•هل تجربتي تعمم؟ لا هل لازم كلنا يصير نفس النتيجة؟ لا .. الحياة أوسع من هالخيارات و فرصها وايد و الي الله يختاره لنا دايمًا جميل بس احنا لازم ما نشوف من زاوية ضيجة .. بس متأكدة إن فايدتها طويلة المدىٰ + ما راح تتحسفون إنكم خذيتوها خصوصًا لمن تشوفون شخصيتكم شلون تطورت يوم بعد يوم
و بس والله مادة مشروع بحث بكل اختصار بمثابة تجربة مصغرة قصيرة المدىٰ للدراسات العليا فإلي وده يبني نفسه مُبكرًا فأنصحكم تقتنصون فرصة توفر مادة مشروع بحث قبل تخرجكم .. و كل التوفيق لكم جميعًا و تذكروا فرص الحياة أوسع بس احنا الي علينا نحاول🤍
جاري تحميل الاقتراحات...