رتبها

المكتـــــب الموحـــد للأطبـاء
موجهات صحية
#مليونية6ينايـــر
((كيف تسعف المصاب))
⭕️ لو زول اتضرب جنبك أول حاجه حركوا من مكان ضرب النار لمكان آمن.
⭕️ حاول تحافظ على المصاب ثابت قدر ما تقدر وما تحركو كتير.
⭕اطلب بأعلى صوت من الحولك إحضار نقاله لإسعاف المصاب

⭕️ حافظ على الرأس في نفس مستوى الجسم إلا لو كانت الإصابات في الرأس أو الرقبه، في الحاله دي أفضل يكون المريض قاعد أو واقف لأنو لو اتمدد ممكن يزيد عليهو النزيف.
⭕️ حاول تتكلم مع المصاب وأساله عشان تتأكد إذا كان واعي ولا لأ. لو كان ما واعي حاول تفوقه.

⭕️ لو ما فاق حاول تتأكد إنو بيتنفس عن طريق إنك تقرب اذنك لخشمو وتحاول تسمع صوت التنفس أو تحس بيهو في نفس الوقت عينك على صدره عشان تتأكد بيتحرك ولا لأ.
⭕️ إذا كان المصاب بيتنفس لكن ما واعي افتح خشمه اتأكد إنو لسانه ما سادي مجرى التنفس لو كان ساديهو حرك الرأس يمين أو يسار. بعدها

أرفع دقنه لفوق لو كان خشم المصاب أو أنفه مليان دم حاول فرغه عشان ما يتخنق
⭕️ وإنت بتنقل المصاب حاول ثبت الرقبه بشكل صاح عشان مايحصل اختناق بالدم أو اللسان (تسند الرأس وتخلي مجرى النفس فاتح)
⭕️ لو المصاب ما كان واعي حاول تقلع ليهو ملابسه عشان تتأكد إذا في أي إصابة أو رصاصة تانية

⭕️ إذا لقيت أي مكان نزيف اضغط عليه بقوة بقطعة بتاعة قماش نظيفة.
⭕️ لو القطعة الوقفت بيها النزيف اتملت بالدم ما تغيرها بواحده تانية خت فوق ليها قطعة جديدة عشان لو شلتها ممكن تشيل التجلط الحصل والنزيف يزيد.
⭕️ لو كنت في حته فيها تلج، أربطه في كيس وخته فوق الجرح عشان يقلل الدم.

⭕️ لو كانت الإصابة في اليد أو الرجل وبدأ المريض ينزف أربط الحته المصابه من فوق مكان النزيف وانقله لأقرب مستشفى فوراً. مهم في الحاله دي ترفع اليد أو الرجل أعلى من مستوى القلب مثلاً أسندها في الحيطه أو أرفعها في مخدات عشان تقلل النزيف.

⭕️ لو كانت الإصابة في الرأس ما تضغط على الجرح شديد بس اضغط بشكل جزئي، خلي جزء بسيط من الدم يطلع عشان ما تزيد ضغط الرأس.
⭕️ لو كانت الإصابة في الرقبة انتبه وانت بتوقف النزيف عشان ما تضغط شديد لدرجه توقف التنفس أو حركه الدم.
⭕️ لو كانت الإصابة في الصدر أو البطن غطي مكان الإصابة

كويس وقلل النزيف بإنك تضغط عليه وتنقله لأقرب مستشفى.
⭕️ في حالات الإصابة فتش الفرق الطبية المعاك في الموكب وما تنقل المصاب إلا للمستشفيات المعتمدة والحيتم نشرها من المكتب الموحد.
لأنها المستشفيات الوحيده البنقدر نأكد ليك إنها شغاله ومستعده لاستقبال الإصابات.

⭕️ في حالات الحريق أقلع ملابس الشخص المصاب وإذا شعر بالبروده غطيه ببطانية أو قماش تقيل.
⭕️ أعمل حسابك من علب القنابل الصوتية لأنو بتشبه علب البمبان وممكن تنفجر وتسبب فقدان الأطراف.
ابقو عشرة ..وقــــدام بس
إن شاء الله ما نفقد نفر
#مليونية6يناير
#الردة_مستحيلة

#لاتفاوض_لاشراكة_لاشرعية
#AgainstMilitaryCoup
#SudanCoup
5 ينـــايــر 2022
» لجنة أطباء السودان المركزية
» نقابة أطباء السودان الشرعية
» لجنة الإستشاريين والاختصاصيين

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد