رتبها

بصراحة مش قادرين نستوعب الناس الي لسه بتداول عبارات زي "صلاح مُرزق" و "ربنا بيحبه" وكلام في الإتجاه دا، للدرجة دي الموضوع صعب التسليم بيه؟
إحنا نقدر نشوف مع بعض كمية "المفاهيم" الي صلاح نفذها في الجول بتاعه ضد تشيلسي من شوية
@MoSalah

1- صلاح كان متمركز فوق بارتفاع عالي، لضمان العمق الهجومي للفريق الي بيصعب على الخصم عملية التكتل العمودي، دا غير إنه كان ماسك الخط وممدد الملعب بشكل عرضي ودا بيصعب على الخصم الدفاع بعرض الملعب وإغلاق الممرات الداخلية/أنصاف المساحات بشكل كلي..

2- في طلبه للكورة، صلاح معملش زي أجنحة كتير بتنزل لتحت أكتر من اللازم عشان تستلم، وقتها هيكون محاصر من لاعبي وسط الخصم مش المدافعين، ودا شيء بيضيع الغرض الي الجناح طلب عشانه الكرة من الأساس؛ التقدم.

صلاح هنا منزلش كتير، عشان يقابل المدافع مش لاعبي الوسط وبالتالي يزود من إحتمالية وفاعلية تقدمه "Progressing"

3- واحد من أهم المفاهيم للي لازم يتعلمها أي جناح، هي كيفية تطويع وضعية جسمه بشكل يديله دايماً أفضلية، لأنه بيكون دايماً محاصر من الخط الجانبي للملعب..

ولازم دايماً يكون بوضعية جسدية مفتوحة لمواجهة الظهير/المدافع، وعشان يعمل دا، محتاج يستلم بالقدم البعيدة، الي تلقائياً هتعدله وتخلي وشه للملعب + هتديله دايماً إتجاهين للمراوغة مش إتجاه واحد -الداخلي-

4- صلاح محاولش يدخل في موقف 1 على 1 مع روديجير، لكنه نجح إنه يسحبه ويخرجه من مكانه، وهنا مرر على طول وإتحرك عشان ياخد مكان أحسن، والمكان دا كان الفجوة الي تركها روديجير لما خرج يقابله على الخط..

5- من خلال تفقده لمحيطه، قدر صلاح يلاحظ الفجوة في خط دفاع الخصم، و بالتواصل البصري مع أرنولد، لبى الأخير طلب صلاح، بإنه مررله الكورة في المساحة "ورا المدافعين"

6- ماركزس ألونسو كان بيرتد وبيحاول يلحق صلاح بإندفاع، وهنا صلاح عمل لمحة عبقرية من لمحاته اللانهائية الموسم دا؛ كمدافع لما بتكون في حالة إرتداد عشان تلحق "مهاجم سريع" سابقك في إتجاه مرماك، هدفك بيكون اللحاق بيه، أو إنه لسبب ما يتباطأ/ يقف..

وهنا صلاح باع لألونسو أُمنيته، أوهمه إنه هيقف لما بطأ من تسارعه لوهلة، ومن ثم عاود التسارع مرة تانية لكن المرة دي بعد ما نجح في تعجيز خصمه تماماً بإستخدام ما يعرف بمفهوم "السرعة المتغيرة/الضمنية"

7- صلاح حط نفسه في وضعية إنفراد، بالتالي لازم يرفع عينه ويجمع معلومات "Head up" عن تمركز الحارس عشان يقدر يختار الزاوية الأنسب للتسديد

8- لأن زاوية التسديد ضيقة بالفعل "0.3 xG" كونه بيشوط من زاوية جانبية، صلاح فتح جسمه لبرا عشان يوهم ميندي إنه هيسدد في الزاوية البعيدة، وميندي بالفعل استجاب لدا وتوجه للبعيدة، ومن ثم قدر صلاح إنه يقفل التسديدة في الزاوية القريبة..

دول 8 مفاهيم مابين تقنية وتكتيكية الجناح بيعملهم من ضمن أكتر من 25 مفهوم لازم يتقنهم عشان يقدر يلعب في المستوى العالي.. السؤال هنا؛ تفتكر الأجنحة في مصر متقنة كام مفهوم من الـ 25+ ؟

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد