مسألة الارض عند الصعايدة مسألة حياة وموت ،، سواق المزرعة له كم يوم يكلم بالتلفون زعلاااان وجماعته من كل مكان على شكل وفود رسمية رايحين جايين على عزبته ناس تهدي وتتوسط وناس تشبب وتهدد،، اللي فهمته ان عنده ارض صغيرة بالصعيد انسرقت وطلع عليها صك مزور وهو يقول ابي آخذ بثاري ارضي عرضي

قررت بعد ماحمي الوطيس اني اتدخل وامارس الحكمة والمفهومية ،، جلست بعزبته وسولفت معه عن حيثيات القضية ،، طلع الموضوع كله على بعضه مايستاهل يقتل احد او يطالب اخوانه وعيال عمه يهجمون على جماعة الحرامي او حتى يكدر خاطره ،، سعرها ان طق طق ماوصلت 4 الاف ريال ،، يوم دريت عن السعر

جاني شعور بالمشيخة والأمارة وعقدت حواجبي على اساس ماعجبني الموضوع لكن خلاص بأحله لكم وفضوها سيرة،، اسمع ياعم عبدالعال،، انا اعطيك 5 الاف ريال واعتبرني شريتها وخصمك الحرامي صار خصمي
لحظتها انتظر احد يكبر او يدعي او يزغرط ،،لكن اللي صار انه قال حديلك 5 الاف وانت تسكت خالص اسكت خالص

وواحد من بعيد جالس بالزاوية يقول ياعم اسكت بلاش رغي عيال ههههههههههه كسر كرامتي البجيح وهز ثقتي في مشيختي ،، بعدين فهموني ان الوساطات وصلت مبالغها الى 30 الف ريال رضاوة فوقها ترجع الارض ويتكفلون بقيمة المحامي اللي بيرجعها ،، وانا جاي راز وجهي يقال لي حليتها لهم هههه

الزبدة هو رافض كل الحلول ويقول ابي ارجعها غصب بالقوة حتى لو وصلت لمواجهة بالسلاح ،، وانا بلشان بالعمال يقولون كل شي واقف فالمزرعة عشان عبدالعال رافض يقابل اشغاله ،، وماقدروا يكملون ،، وحالياً انا نايم في بيت المزرعة داخل اليوتيوب اشوف مقاطع طرق قيادة الحراثة بطريقة آمنة واحترافية