لو شايف إن تعاون اللاعبين مع محلل أداء فردي رفاهية وليس ضرورة! ممكن تسمع @BeltagyHassan محلل منتخب ألمانيا بيقول إيه في السياق دا، وتعبيره عن مدى أهمية الدور في الكرة الحديثة وفي مصر تحديداً
هنا بتظهر أهمية وجود منهجية مبنية على علم ومعرفة حقيقية، عشان توفر للاعب طريق واضح للتطور في الملعب وتحسين الجوانب الضعيفة عنده، بعيداً عن الاجتهادات والممارسات العشوائية الشائعة في عملية تطوير اللاعب..
احنا في "Peak" بنتجنب وضع اللاعب أمام كل أخطائه كل مباراة، وبنشتغل معاه على مواقف محددة بحسب الأولوية وحجم التأثير. بنحلل جذور المشكلة من الأساس، لأن معظم الناس لما بتيجي تعلق على السلوكيات الفردية بتعلق على عملية "التنفيذ"؛ "هي دي شوطة! حد يضيع كورة زي دي؟"..
محدش بيسأل إذا كان اللاعب جمع المعلومات الي تساعده ياخد قرار صح أو لأ؛ هل شاف تمركز الحارس؟ هل كان واعي بالمدافع في ضهره؟ هل كان واعي بموقعه لحظة التسديد؟..
هل خد باله من زميله الي جنبه؟ ومن ثم هل القرار نفسه كان أحسن قرار ولا لأ بناءً على المعلومات الي خدها؟ وأخيراً نقدر نحلل عملية التنفيذ ونشوف إذا كان فيه تقنيات أنسب للوضعية..
من هنا بنبدأ شغلنا، الي بيكون هدفه؛ بناء الجانب الإدراكي للاعب، ومساعدته في إنه يتعرف على نفسه ويكون مُدرك أكتر لمميزاته والنواحي الي يقدر يتحسن فيها، بحيث يكون واعي بالقرارات التلقائية الي بياخدها في الملعب..
بجانب مساعدته في اتخاذ "القرار الأمثل" في كل موقف من خلال التدريبات التكتيكية الشخصية، الخاصة بكل مركز، الي من خلالها بينجح اللاعب في إتقان أساسيات مركزه في كل مراحل اللعب..
ودا مبيحصلش من خلال الطريقة الشائعة؛ "تقطيع الفيديوهات" ولكن من خلال توفير مرجعيات محددة تساعد اللاعب على تفسير الموقف بشكل سليم والتعامل معاه بأريحية..
محمد كان ممتاز أثناء الحيازة ضد طلائع الجيش، ونقدر نشوف هنا الـ Pass map بتاعت "البنك" في الماتش وإزاي كان من أحسن اللاعيبة الي بتعمل فارق بتمريراتها وبتنقل الكورة لمناطق أخطر وفقاً لمقياس الـ xGChain ..
لكن دفاعياً كان عنده جوانب محتاجة تتحسن في التمركز ودفاع المساحة، كانت عاملة مشكلة في إنه مش قادر يغطي مساحة قلب الملعب كويس بالتالي تمركزه مكنش بيوفر حماية لخط الدفاع..
بعد ما حللنا المشكلة استنتجنا إنها مش مشكلة تقنية، ولكن مشكلة إدراكية تتعلق بعدم المعرفة من الأساس، ببساطة محدش علمه إزاي يعمل دا بشكل مثالي، على الرغم إنه لعب في أندية بحجم "الإسماعيلي" و "بيراميدز" ..
ودي النقطة الي إتكلم فيها حسن، وبالتالي منقدرش نحط لوم على اللاعب في الحالة دي، هو بيعمل الي يعرفه، ولو يعرف أكتر من كدا، مردوده هيكون على قدر علمه.. ومش هنتطرق لإزاي محدش علمه، لأن دا يطول شرحه، هنتطرق ليها وقت تاني..
نقدر ناخد أقرب ماتش للأهلي "السوبر الأفريقي" كمثال، نقدر نشوف هنا محمد شريف إزاي بيتصرف مع الوضعية دي، وقد إيه هو غير مُلم بنوعية التحركات الي مفروض يعملها كمهاجم في مختلف الوضعيات، وقد إيه لو إتعلم يقدر يفيد فريقه بشكل أكبر..
حسن في كلامه ذكر إن دا شائع هنا في أعلى مستوى "المنتخب" ودا كنا بنقدر نلاحظه بسهولة في كأس العرب، نقدر نشوف هنا مثلاً في ماتش "الأُردن"، كمية الملاحظات الي نقدر نُشير ليها، وإزاي فيه "أساسيات" مفقودة، ومفيش مرجعيات واضحة للاعب للتعامل مع مختلف الوضعيات..
أخيراً، دي ملاحظات محلل منتخب ألمانيا بعد الي اتعرض له وهو مُكلف بتحليل فردي للاعبي المنتخب، وشاف إن فيه مجال كبير للعمل في المساحة دي، وإن من الحلول إن يكون فيه حد بيقدم دا للاعيبة بشكل مُمنهج وسليم بعيداً عن الاجتهادات، عشان يساعدهم يتطوروا كأفراد وتباعاً تطور مستوى الكرة ككل!
جاري تحميل الاقتراحات...