عندي موضوع من زمان ودّي اتكلّم فيه واتوقع جاء الوقت اللي اتكلم عنه، تخيلوا معي سواء انثى او ذكر كبير او صغير، اذا انسان سوا غلط، لازم يستر نفسه هذا شيء طبيعي صح ولا لا؟ انت ماشي في غلط وقاعد مستمر فيه طيب سويه مع نفسك ! المشكله لما يجي احد يجاهر بالشيء ويشوف انه ترا مره عادي
انت عارف انه غلط واللي تسويه غلط طيب خليه لنفسك مو لازم تخلي النّاس زيك عشان ترضى عن نفسك لكن اذا انت مريض وتحاول تخلي الناس نفسك عشان تحس الموضوع انه والله عادي لا ترا مو عادي ابداً ومو لازم اصير زيك
يكفّي مره يكفّي انك انت قاعد تسوي الغلط وتاخذ ذنوب لين راسك ، طيب استحي شوي ولا تعزم غيرك على الغلط بقّي حسنات شوي لنفسك لأنك قاعد تاخذ ذنب كل احد الحين مدخله معك بالموضوع او جريته للشيء اللي انت عاجبك وقاعد تسويه وعارف انه غلط !
احنا كلنا مو معصومين عن الغلط ومو ملاك وكلنا عندنا اغلاط لكن الواحد اذا سوا غلط يستر على نفسه ويحاول يرجع لربه ويترك الغلط اللي يسويه عشان ربي يغفر له، مو يعزم العالم على الغلط اللي يسويه ويثقفهم فيه على اساس صيروا زيي.
استغرب مايجي شعور لهالناس ان يكفّي ذنبي لحالي مره يكفي اني انا جايبه العيد في نفسي ، بعد تبي تاخذ ذنب الناس معك ؟ مره يعني الدّنيا زهق لهالدرجه عشان تسوي هالشيء تتسلى عليه ؟
الشيء الثاني فكّري بالنّعم اللي انتِ فيها ، اهلك او زوجك معطينك الثقه الكامله تطلعين وترجعين مثل ماتبين الحمدلله، غيرك ابوه مجنون، زوجها مريض مايخلونها لاتطلع ولا تجي، قدّري النعمه اللي انتِ فيها ولا ترفسينها وتسوين فيها كل الأغلاط الخايسه لأن بيجي يوم وتنكشفين وتروح هالنعمه منك
احترمي الثقه اللي معطينك اياها واطلعي وارجعي وانتِ بحال راضيه عنه وبقد الثقه اللي اعطوك اياها، صدق الله يبعد عنا و عنكم هالأشكال ويبعد كل من فيه شر للناس والله يغيّرهم لحال افضل و يصلحنا جميعاً.
عذراً على الإطالة بس احس هالفئه مره كاثره بشكل مو طبيعي اللي يجاهرون بمعصيتهم وكأنه شيء جداً عادي، فقررت اتكلّم عنه لأنه ابداً مو عادي.
جاري تحميل الاقتراحات...