⚠️ دا ثريد عن "أوميكرون" آخر متحوّرة من فيروس كورونا '
Rt
Rt
🔺 أول ظهور للفيروس كان قبل ٣ أيام ( ٢٦ نوفمبر ) في جنوب أفريقيا، الباحثين رَصدو ١٠ طفرات جينية جديدة من آخر متحوّرة للفيروس "دلتا" و دا أعلى عدد طفرات حصلت الى الآن.
🔺 أوميكرون انتشر بسرعة في جنوب أفريقيا و في خلال ال٣ أيام دي وِصل استراليا و بريطانيا و المانيا و دول اوروبية تانية من ضمنها حالة اتسجلت في سويسرا الليلة، يعني منطق منطق كدا ممكن نجزِم انو قاعد في السودان.
🔺 الانتشار السريع للفيروس خلا الباحثين يفترضو انو قدرتو على الانتقال من شخص لي شخص أعلى من المستوى المُعدي المعروف لي كورونا.
🔺 مافي أخبار مؤكدة عن أي أعراض جديدة، نقلاً عن خط الدفاع الأول في جنوب افريقيا الأعراض شملت ألم و التهاب في العضلات، فتور و صُداع، يعني نفس اعراض كورونا المعروفة، و نقلاً عنهم كُل المصابين الجُدد بيتعالجو في منازلهم.
🔺 مافي وفيات مُسجّلة لغاية هسي لسبب واحد و هو انو كل المصابين المسجلّين شباب يافعين، لكن بما انها متحوّرة من فيروس دلتا الأخير فهي بالتأكيد بتشكّل خطر على كبار السن و العندهم ضعف في المناعة أو أمراض مزمنة.
🔺 في نتائج أوّلية بتفترض أنو الناس الجاتهم كورونا قبل كدا عندهم قابلية أكبر للإصابة مجدداً بأوميكرون، لكن الأبحاث ما كافية حتى الآن لتأكيد المعلومة، مافي معلومات كافية برضو عن مدى فاعلية اللقاحات ضدو.
🔺 الثابت انو التَطعيم مهمّ جداً للوقاية، عدم أخذ بعض الناس للتطعيم هو البيخلي الفيروس يتحوّر و تظهر موجة جديدة مقاومة لللقاحات، زي فكرة الباكتيريا المقاومة للمضاد الحيوي بالضبط.
🔺 بالنسبة للPCR الفحص لا زال فعّال مع اوميكرون و بيكشف وجود الفيروس و الإصابة بيه عادي.
🔺 العِلاج هو نفس البروتوكول المتبع ضد الكورونا و مافي أي اخبار عن فعالية العلاج اذا كانت اقلّ الى الآن.
نجي للكلام حقنا، في الشهر الفات انا ك زول ساي بعرف ٤ كبار في السن ماتو فجأة أو بعد مرض ما كانو اهلهم متوقعين انو خطير، يقولو ليك "ملاريا بس أو التهاب".
السبب الوحيد لعدم وعينا بكمية الموت الحاصل هو اننا في السوشيال ميديا و معظمنا شباب،
العاملين في المجال الطبي اكيد شايفين اكتر.
السبب الوحيد لعدم وعينا بكمية الموت الحاصل هو اننا في السوشيال ميديا و معظمنا شباب،
العاملين في المجال الطبي اكيد شايفين اكتر.
بالنسبة للإصابات من اهلي برضو ناس في اواخر العشرينيات او التلاتينيات المرض كان مُعيق شديد بالنسبة ليهم، الزول بقول ليك انو هو عندو التهاب و تعبان و ما قادر يقوم او يتحرك او يعمل اي شي .. النزلة أو الالتهاب ما بسبب القدر دا من الامراضية، و التعب دا كلو بسبب نقص الأكسجين.
اكيد عارفين انو مراكز العزل مليانة، في أزمات في كل شي، اسطوانات الاكسجين و السراير و الأدوية كلو مافي و بعد دا راشيننا بمبان ليل نهار، المواكب شغالة ما ح تقيف، الوقاية و التوعية رغم انها نقطة في بحر هي الحل الوحيد للناس هسي.
لجان المقاومة مفروض يركزو على الجانب دا، لازم يكون جزء اساسي من البناء القاعدي في ظل الجائحة، ما بعرف زول ما فقد أب أو أم أو جد أو حبوبة ف الفترة الفاتت، الكمامات و المعقمات و التوعية قبل المواكب دي خطوة أولى بس.
الوضع كارثي، مفترض يكون في حالة طوارئ عديل نحن فتنا مرحلة تسجيل حالات او بوزتف و نيقاتيف، اسطوانات الأكسجين تكون احتياطية قاعدة مليانة قبل ما الناس تمرض و الأوكسميتر يتوفر في كل حي، العلاج في البيت في كتير من الحالات المتوسطة الخطورة أحسن من مراكز العزل المليانة لي حدّها.
عموماً لو عندك زول كبير خايف عليه، حاول فتش اسطوانات اكسجين خلي واحدة احتياطية، و اوكسميتر و ادوية بروتوكول و جيب الزينك و أدوية المناعة خليها معاك اضعف الإيمان، لو كان على مستوى لجان المقاومة بكون أحسن لكن الوقاية خير من العِلاج، ربنا يحفظ احبابكم و يزيل عننا البأس و العساكر '
جاري تحميل الاقتراحات...