١- للي حاب يستفيد من تجربتي مع طفلي لما بدأت تظهر عليه (علامات التوحد) يتابع هالثريد وان شاء الله يستفيد..
٢- عندي طفل منذ ولادته وانا اكلمه واغني له والاعبه واموره كانت جدا ممتازه.. لما اقترب اختباري الشامل اهملته كثير وبدات ألخص واكتب واذاكر وكنت استعين باخواتي في رعاية ابني وبما انهن اصغر مني كانوا يتركونه عند التلفاز وانا كذلك فترات طويلة جدا جدا ..
٣-طبعا كان يقول بابا وماما وآت يعني هات ويناظرنا واتذكر والله كان لما نقوله جيب ينفذ الامر وقتها كان عمره سنه و٨ اشهر واللي حصل بعد ما خلصت اختباري ابني اناديه ما كانه سامعني انادي وانادي وانادي ابد ما يلتفت ولا يرد اجيب اناظر يلف وجهه امسك راسه يرفض يناظرني يادوب لمحات..
٤-كان مدمن عالتلفزيون لان الجوال كنت رافضه انه يتعود عليه، وعندنا في عايلتنا تجربة لطفل جاه توحد وهو كان طفل سليم وناطق، وكنت اعتقد انه بسبب الجوال فقط ماكنت اعرف ان حتى التلفزيون له تاثير مثله..
٥- معلوماتي كانت جدا بسيطة حول المرض لكني اعرف بعض سماته وعلاماته وهالشي اللي اثار جنوني واتعبني وقمت ابحث واقرا وعاليوتيوب وحصلت كل المعلومات اللي تفيدني وجدت حساب لدكتور وفيه رقم حجز وتواصل واستشاره مرئية لمدة ساعة وبالفعل حجزت اقرب موعد وتقصدت ان زوجي يكون خارج البيت لانه …
٦- لانه يرفض ان ابني فيه شي ويراه طبيعي تماما وانه لسه صغير وكذا.. المهم الدكتور قال كلام طمني قال ولدك لسه صغير وبامكانك تلحقي عليه وقلي شوية تمارين وارسل لي فيديوهات تطبيقيه وكذا.. مع تحفظي على الاساليب اللي شفتها كانت فيها عنف جربت يوم وحسيت اني اكسر ابني واعنفه وكرهت طريقته..
٧- تعاملت بحنان الام مع ابني صبرت صبر كبير رغم رفضه بالبداية كل شي لكن بقولكم بالضبط ايش سويت حتى تستفيدو وكلامي موجه للي اطفالهم لسه في البداية ومادري يمكن ينفع حتى للي تقدمت حالتهم ساءت اسال الله ان يحفظ لنا عيالنا ويحميهم ..
٨- طريقتي اول شي منعت كافة انواع الاجهزة تماما فرغت نفسي بكل ما استطيع .. جلست مع زوجي وفهمته الوضع وقلت له بأمر الاستشارة وكل شي.. تفهم الموضوع كثير الحمدلله وتعاون معي.. ابني كان يبكي كثير عالتلفزيون كنت استهبل عليه لانه ما كان يأشر ولا يعرف يتكلم ولا يعبر عن حاجته..
٩- بحثت عن مواقع العاب تعليمية خشبيات واشياء امنة والخ.. وجدت موقع وبدات ابحث ركزت على اشياء فيها الوان تراكيب وتجميع وتطابق الاشكال وكرات ملونه وبازل وغيرها كثير.. يعني لما حرمته ما تركته لا اشغلت وقته وعوضته ..
١٠-هذا بالاضافة الى اني كنت اشوف تجارب وافكار واطبقها بالبيت ورح اوريكم بعض تطبيقاتي السهلة واللي حبها ابني ومع الايام اتقنها وصار يميز الالوان يعني بالمختصر مو شرط تتكلفون وتشترون فيه اشياء كثير ممكن تسوونها بالبيت وباشياء بسيطة..
١١- مهم جدا وقت اللعب تتكلم مثلا تقول او تغني هيا نلعب هيا نلعب مع ابتسامة تحاول تشد انتباه الطفل بكل ما تستطيع.. لما تلعب سمي الاشكال او الالوان هذا مربع هذا قلم هذا احمر وهكذا ضروري جدا الكلام والتكرار مهم جدا..
١٢- فيه تمرين جميل عشان يعرف الطفل اسمه كنت اجيبه عند المراية واشاور على نفسي اقول ماما واكرر واكرر واشاور عليه واقول اسمه واكرر واكرر وما اضغط عليه عادي.. اذا طفش اخذته ولعبنا حاجة ثانيه .. برضه اتفقت مع افراد الاسرة على طريقة الرد اثناء المناداة فكنت انادي ابوه او اخواته ..
١٣- لما اناديهم لازم يلتفتون ويقولون هاه لان ( نعم ) صعبه كنطق عليه فكنت اختار الاسهل.. المهم كل يوم كذا كل شويه واناديه ما يستجيب ولا يلتفت ابد مع الايام صار لمحه وتطور صار يلتفت الحمدلله وابدا اقوله اي شي المهم ما يلتفت على فراغ او لا شيء مثلا اقوله هيا نلعب او تعال معي او خذ
١٤- صرنا ناخذه خارج البيت كثير ملاهي عادي وليست كهربائية قدر المستطاع عشان يحتك بالاطفال تعبنا كثير في البداية كان يلعب بالرمل ويترك الاطفال الحين صار اول ما يشوفهم يركض يلعب معاهم الحمدلله .. الصبر ثم الصبر ثم الصبر
١٥- طريقتي في تعليمه الاشارة: كان لما يبكي انا اشاور له بيدي بعدها امسك يده واقفل اصابعه ماعدا السبابة واقوله هذا؟ هذا ؟ واكرر وكل يوم كذا وصار الحمدلله يأشر الان ..
١٦- كان يمسك يدي ويسحبني للمكان اللي يبغاه طبعا علمته الاشارة وبنفس الوقت اقوله تعالي؟ يعني تبغاني اجي؟ واكرر تعالي؟ تعالي؟ عشان يعرف انه لازم يقول تعالي اذا كان يبغاني اجي معاه ..
١٧- لما نبغى نخرج نكرر انا وابوه واخواته هيا هيا هيا او مثلا سيارة ونكرر وهكذا .. التكرار مهم لان اذا تبغى طفلك يتكلم لازم تكرر حتى يحفظ الكلمة ويعرف متى يستخدمها على فكرة ابني فترة طويلة ما تكلم فكنت اقول للي حولي باذن الله يجي يوم يعرف يستخدم الكلمات ويفهمنا.. الامل بالله عظيم
١٨- ما قلتلكم والله ثم والله لما قطعت التلفزيون عن ابني خفّت عصبيته وصار ينام فترات اطول وصار افضل حتى بالاكل كان انتقائي الان نوعا ما تحسن في الاكل الحمدلله.. سبحان الله فرق كبير انا جربته في شخصيته .. كنت لما ازور اي ناس بس يبكي الان الحمدلله يلعب معاهم ويندمج معهم..
١٩- علمته اسماء الحواس كنت اغني له واقول عيون وانف وفم واشاور واحرر واكرر مدري كم مره باليوم بس كل ما تذكرت قمت اغني له واكرر واخذ اياديه واعلمه على وجهه او على وجهي واحيانا على دمية.. بدا تواصله البصري يرجع.. بدا يرجع اجتماعي.. بدا ياكل.. بدا يتكلم..
٢٠- جميع تمارين الجلوس على الكرسي ومدري وش ماطبقتها كنت افترش الارض واحط الالعاب اللي بنستخدمها انا وابني واغني له هيا نلعب هيا نلعب ويجي تعابير وجهي كانت معبره عن السعادة من قلب رغم ان من الداخل كنت احترق واقول متى يا حبيبي ترجع احسن من اول.. املي وثقتي بالله عظيمة الحمدلله..
٢١-علمته الحيوانات اسمها وشكلها وصوتها وصار يميزها.. لما ناخذه مشوار نركز على اي كائن حي نصادفه 😅 قطع / كلب/ ماعز/ طيور/ اي كائن حي كنت اقول لابوه وقف شوي واقول اسم هالكائن واكرر واقلد صوته وبدا يقلد ويتفاعل معي وينبسط❤️اشتريت له كراسة الحيوانات اللاصقة اللي بريالين جدا بتعليمه
٢٢- الالوان علمته عليها اثناء اللعب كنت مثلا مع الكور الملونة اقول احمر / اصفر/ اخضر وهكذا واكرر واكرر كل مره نلعب اي شي امسكه اقوله اسمه ولونه لازم يتعلم يميز عن طريق اللعب افضل شي بدون ضغط ولا عصبيه مارح يتفاعل بالايام الاولى لا تقسو عليهم اصبروا هم لما مايجدوا اجهزه بيضطروا
٢٣- يتفاعلوا معكم غصب عنهم مافي شي يجذب الطفل خلاص فيبقى مضطر يشوف ايش فيه حوله وانتم لازم تهيئوا بيئة جذابة مليانه حب وحنان انا ابني كان يرفض يحضني الان يرمي نفسه بحضني، احساس صعب لما يرفضك ابنك كنت ابكي اقسم بالله تعبت نفسيتي لكن قلت مارح اوقف الين اشوفه طبيعي ومارح اتركه ابدا
٢٤- التشجيع والتحفيز مهم جدا جدا.. التصفيق لابسط حاجة ما تتخيلوا اثرها بنفسية الطفل، كلمة شاطر ابني يقول تاتر لما يشجع نفسه 😍 لازم جو حماس لازم، الاطفال يشعرون ويستشعرون اذا اللي حولهم مبسوطين او يمثلون عليهم .. عيشوا اللحظة معاهم كرسوا وقتكم لهم كل شي ملحقين احنا عليه هم امانة
٢٥- امانة اما نحسن الحفاظ عليها او نضيعها ويحاسبنا الله عليها.. هم اغلى ما نملك لا دراسة ولا عمل ولا اي شي اهم منهم .. اسال الله تعالى ان يحفظهم ويجعلنا من البارين فيهم قبل ان يبروا بنا .. واي سؤال انا حاضرة ..
٢٦- اشياء عملتها لابني وحبها كثير
التمييز بين الالون (ورق ملون -كرتونة- قطن اذن)
التمييز بين الالون (ورق ملون -كرتونة- قطن اذن)
٢٧- في البداية كان يرميها وألملمها كثير كان مو فاهم ايش ويرفض كنت اتصرف عادي جدا بدون عصبية ولا احسسه بشي واكررها اليوم الثاني اجيبها واوريه كيف لما بدا يتحمس اشوف ايش اخذ لون واقول اسمه واكرر واعلمه فين المكان اللي زيه وهكذا.. واشجعه اقوله شاطر واصفق له واعطيه جو حماس
٢٨- الان لما يناديني احيانا يقولي بابا واصحح له اقول ماما 😍 مرات يقولها صح ومرات لا .. ما تتخيلون كيف كان لما يحتاج شي بس صراخ وبكاء واحيانا يحط يده بوجهي ويضربني وتخميش 😞ومادري وش يبغى، علمته بالحركات وقلت للي حوله يسوون اللي اقولهم عليه
٢٩- لازم بهدوء نقر مع مناداة يعني باصبع السبابة على خفيف وتقول ماما هذا كان في البداية اما الان يكفيني يناديني ماما واطبق الحركة اللي سبق وقلتها( لازم التفت واقول ها ) حتى يعرف اني استجيب له كذا والحمدلله الحمدلله صار يسوي نفس الشي ما تتخيلون سعادتي وهو يناديني ودي مايوقف
جاري تحميل الاقتراحات...