شكراً نسرين للتوضيح،خَلّينى أوَضَّح أكتر كمان إن أهالى نيللى و فيروز(هما إخوات) و لبلبة، هُمّا اللى هربوا ع مصر لما كانوا أطفال،و بالتالى نيللى و الباقى مولودين فى مصر فطبيعى إنهم يتجنّسوا،أما أهاليهُم كانوا يحملوا بطاقات عثمانية لما هربوا على مصر، (يتبع١)
#المصريين_الارمن

لأن ساعتها أرمينيا كانت داخل حدود تركيا العثمانية و مُحتَلَّة، بالتالى ما كانتش لسة دولة، فالجنسية الأرمنية ذات نفسها أهل أرمينيا إتجنّسوا بيها بعد ما بقى فيه دولة جمهورية أرمينيا عند إنفصالها عن الإتحاد السوڤييتى عام ٩١، يعنى أنا مثلاً ووالدى اللى مولودين فى مصر، (يتبع٢)

أجدادى هما اللى هربوا على مصر لما كانوا أطفال. أما الجنسية الأرمنية لأرمن المَهجَر اللى زَيّنا أُتيحَت فقط من ١٥ سنة بموجَب قانون،فإحنا ذات نفسنا إتجَنّسنا بالجنسية الارمنية من قريّب.و قصة سوريا طبعاً مفهومة غلط، ليه بقى؟ (يتبع ٣)

لأن الأرمَن لما إتهَجَّروا، مشيوا آلاف الكيلومترات للهروب من المذابح لحد ما وصلوا صحراء دير الزور فى سوريا، منهم اللى ما عرفش يكمل و مات فى الصحرا جوعاً و عطشاً و منهم اللى إختار سوريا و إستقَرّ فيها و منهم اللى سُفُن فرنسية و بريطانية أنقذتهُم ووَدِّتهُم ع بلاد مُختلفة (يتبع٤)

لبلبة مثلاً اللى إسمها الحقيقى نونيا كوپيليان مولودة ف المنصورة زى ما والدى كمان مولود ف المنصورة.كان فيه أرمن حتى فى الزقازيق،و كانت فيه كنيسة أرمن هناك اتبَنت لما عدد الأرمن كان كبير.أول قافلة جات مصر سنة ١٩١٥دخلت بور سعيد،عاشوا ف بور فؤاد تحت خيام لمدة ٤ سنين #المصريين_الارمن