عندى كلمتين كده نفسى اقولهم من زمان واسمحولى اصدعكم شوية.
من الجرائم المرتكبة فى حق الأبناء من اولياء امورهم موضوع الدلع الزائد والعزل المطلق عن الناس والمجتمع بدعوى الحفاظ عليهم وخلق فقاعة وهمية قصيرة المدى لابد وحتماً هيجيلها يوم وتفرقع ويخرجوا للواقع الأليم بس ساعتها هيبقوا تايهين وطوب الارض بيلعب بيهم وهيبقوا اضحوكة المجالس.
انا مستوعب جداً فكرة خوفك ع ابنك او بنتك من المجتمع والناس وعارف كويس ان الواقع فى اسوء حالاته ولكن ع قدر سوء الاحوال دا بيتطلب فى الانسان انه يبقى أقوى و أذكى و أفطن والا هيتاكل من كل من هب ودب .. وانت مش دايم لعيالك ولا فى عز دايم ولا فى مال دايم لكن مايدوم هو مدى صلابتهم.
انا شوفت اطفال كبار فى العقد الرابع والخامس من العمر وكل ذنبهم فى الحياة انهم كانوا معزولين عزل مطلق عن المجتمع وكان لهم اب/ام/جد مش حارمهم من حاجة وكل شيء مجاب ولما مات الشخص دا دخلوا فى متاهات الحياة والدنيا نهشت فى لحمهم لما شبعت وبقوا يمشوا فى الشارع مشي الكفيف الطوبة بتوقعهم
وكلامى دا مش دعوى للجفاء ع اولادكم لكن علموهم المسوؤلية وانشفوا عليهم وعلموهم ينزلوا الشارع ويرجعوا لا ضاربين ولا مضروبين ونزلهم شغل علشان يعرفوا قيمة اللى هما فيه ويعرفوا قيمة القرش وخليهم يحتكوا بالناس ويغلطوا علشان يتعلموا من غلطهم انا من معتنقى فكر ربى ابنك وارميه فى البحر.
ماتدخلش فى دوامة المدارس الانترناشونال واللانش بوكس والسبلايز والكلام الفاضى دا وتسيب عيالك كتاكيت وصيدة للطيور الجارحة .. وماتقعدوش بنت فى البيت البنات دول اكتر فئة اتفعصت فى الزمن دا نزلوا بناتكم شغل وعلموهم ازاى يكسبوا فلوس ويبقوا مسؤولين عن نفسهم ماحدش عارف الزمن مخبى ايه!
جاري تحميل الاقتراحات...