حاحكيلكم حكاية ياشعب 😀 تجربة عديت فيها امبارح وعرفتني حاجات ماكنتش أعرفها عن مكان بروحه كتير من زمان. وحسستني بالقرب وحببتني فالمصريين كمان وكمان 😍 أحلى شعب فالأرض رغم كل الصعاب
كان بقالنا يومين متوترين عشان واحدة صاحبتي بنتها فبلاد بعيدة وحامل وفجأة جالها طلق قبل ميعادها بشهر وصاحبتي ماعندهاش فيزا ومش عارفة تروحلها
امبارح الساعة ١٢.٣٠بالليل بعتتلي رسالة تسألني صاحية ولا لأ فكلمتها اتطمن لقيتها بتعيط وبتقول خلاص حايدخلوا البنت تولد وأنها مش قادرة تقعد فالبيت وحاتنزل تروح لستنا السيدة زينب 😊 "من أول هنا ال مش فاهم أو متضايق مايكملش"
طبعا مش حاسيب صاحبتي لوحدها. قعدت اتحايل عليها اعدي علي وإلا حانزل ادور عليها فالشوارع. عدت علي ونزلنا روحنا زورنا وسلمنا ودعينا ووقفنا فالرحاب شوية.
أول حاجة عرفتها أن ال قاعدين بالليل المساكين بجد مش ال شغلتهم القعاد عند المقامات. وعشان مابقاش بظلم حد حاقول "غالبا"
أول حاجة عرفتها أن ال قاعدين بالليل المساكين بجد مش ال شغلتهم القعاد عند المقامات. وعشان مابقاش بظلم حد حاقول "غالبا"
قررنا نروح لمولانا. واحنا بنعدي الشارع المساكين ال قاعدين فالجزيرة قالولنا مدد يامولانا سيدنا الحسين 😍 طبعا ماسمعوناش بس هو طريق الحب كده. قلوب المساكين بتشوف وتعرف من غير كلام.
طبعا صاحبتي كانت مقطعة قلبي قلقانة وخايفة وبتدعي بس
طبعا صاحبتي كانت مقطعة قلبي قلقانة وخايفة وبتدعي بس
وصلنا عند سيدنا الحسين لقينا المكان مقفول ومافيش دخول. المهم لفينا من ورا ودخلنا قعدنا فالرحاب فالجنب عند القبة ولقينا كرسي فاضي مستنينا ومالحقناش صاحبتي اقعد لقيت راجل جاي جايبلنا كرسي كمان وقعدنا نستمتع بالسكينة وسلمنا ودعينا وبعدين بدأنا ناخد بالنا من ال بيحصل حوالينا
أولا فيه ناس قاعدة في سكون تام وشها للقبة كل واحد مستغرق فالدعا، وفيه ناس بتحكي حكاوي تحس أنهافعلا بتحكي لحد حكايات طويلة. وناس شكلها باين علي القيمة والجاه وقاعدين عالأرض فسكون تام. وأكتر حاجة وجعت قلبي كم الناس النايمة فالأركان ملفوفة فبطاطين أو ملايات وفعاشر نومة. سالت ورجالة
دي أول مرة أشوف المكان في نص الليل بعيدا عن ليال المولد. أكتر وقت بتأخر فيه هناك بيبقى ١٢ وأول مرة أحضر الليل نفسه شكله ايه هناك فالأيام العادية. أول ملحوظة ماحدش ضايقنا ولا جه ناحيتنا وإن كان حد كلمنا فعشان يجيبلنا كرسي أو يقدملنا نفحة فقط. وماكنتش متخيلة كم الناس النايمة هناك
قبل ٣ بشوية جتلنا فكرة نقدم نفحة للناس ال هناك فقمنا ندور على مكان فاتح بيعمل أكل 😄 ٣صباحا بنتين ماشيين لوحدنا فالشوارع المحيطة بسيدنا الحسين نسأل لو فيه مكان أكل فاتح وسألنا كذا حد وعدينا فشوارع فاضية وظلمة وعادي جدا ولا حد ضايقنا ولا حد استغرب وبالعكس دلونا كمان
روحنا محل كباب قالولنا عليه لقيناهم بيمسحوا الأرض خلصوا. قلنالهم قررنا نقدم نفحة من مولانا، رد علينا شاب شكله هلكان مالتعب: وماله الفحم لسة ماطفاش نشوف عندنا ايه ومن عينينا 😍 وفعلا ماكانش فيه كمية زي ماكنا نتمنى بس الحمدلله أخدنا ال قدر يحضره ورجعنا وزعنا لصاحب النصيب
ربنا بعتلنا واحد من المكان قالنا خلوني اساعدكم توزعوا لناس محتاجة فعلا وبقى يروح يصحي النايمين فالأماكن ال ورا بعيد عن المدخل ويديهم النفحة. وقال أن الأكل بييجي كتير عالمدخل وأنه بيشوف ناس بترمي الرز وتاكل اللحمة بس وأن فيه ناس غلابة مابيوصلهمش اكل عشان قاعدين فأماكن مش فالمدخل
قعدت اسأله مين الناس دي ؟ وليه نايمين كده ؟؟؟ قالي القصص كتير. فيه ناس مالهاش مأوى فعلا زي ال أهله أو ولاده طردوه وزي ال طفشت من أهلها أو ال جوزها طلقها وماعندهاش بيت. قصص كتير مانعرفهاش تحت البطاطين المتكومة في رحاب المقامات
خلصنا وقعدنا نشرب قهوة ونمدح: مدد يا مولانا يا حسين مدد يابو زين العابدين مدد مدد مدد مدد 😍 بعتولنا صورة البيبي الحمدلله ولدت بالسلامة والبيبي بخير - لحظة فيها مشاعر كتير لماتعيشها فالرحاب تحس بحاجة تانية خالص. وألف حمد وشكر عالفضل
مشينا رايحين نصلي الفجر عند ستنا السيدة نفيسة فغلطنا ودخلنا النفق لقينا نفسنا بنلف تاني فوقفنا سلمنا على سيدي صالح الجعفري 💚 أصل الراجل ال جابلنا الكرسي لما دخلنا ادانا كتيب بتاع سيدي صالح الجعفري فطبعا كان لازم نتلخبط عشان نعدي أدامه ونسلم
وصلنا عند ستنا السيدة نفيسة صلينا الفجر عالرصيف مع الستات عشان المقام مقفول وبعدين دخلنا نسلم فالممر وسمعت واحد جاي يقول لواحدة قاعدة عالعتبة أن فيه نفحة وصلت دلوقتي فتة ولحمة. قالتله يييييييي لحمة تاني ؟؟ 🙈 عادي كانت رحلة علام اتعلمنا فيها كتير.
الناس ال بتنزل بنفحات، من فضلكم ركزوا فالمساكين ال بعيد عن المقامات قبل ال لاذقين فيها ولو قدرتم تنزلوا متأخر يبقى أحسن. ومساكين ستنا السيدة زينب معظمهم قاعد فجزيرة الشارع أدام المقام. والناس الملفوفة فبطاطين وأنت داخل السيدة نفيسة ومش بييجوا عندك أحق بالإطعام
قضينا ٥ ساعات عالأعتاب لا حد ضايقنا ولا بصلنا حتى وكل الناس مبتسمة وبتساعد واستمتعنا بالصحبة والمدد واتطمنا وشفنا ناس حلوة منورة نازلة تزور وناس بتحب بس وكلها أمل - مصر دي حالة خاصة جدا مايفهمهاش غير ال يقرر يقبلها ويعذرها ووقتها بس حاتوريه وشها الحلو أوي ال مافيش زيه 😍
جاري تحميل الاقتراحات...