تعاله بقه خد الكلمتين دول ليك
أنت متعرفش حاجة عن حد، دي الحقيقة، متعرفش فُلان اتجوز فُلانة ليه، ولا تعرف فُلانة انفصلت عن خطيبها بعد قصة الحب العظيمة ليه وإزاي، متعرفش صاحبك ده قابل بظروف شغله اللي أنت شايفها صعبة ليه، ولا تعرف ليه فُلان -اللي علاقتك بيه مش قوية أوي-

إزاي وليه على طول بيظهر إنه قوي ومتفائل ببُكره، مش هتقدر تدرك إزاي فُلانة اتطلقت بس قادرة تعيش حياتها وتبان قوية، ولا عمرك هتفهم فُلانة إزاي وليه متجوزة وبتحب فُلان اللي أنت شايف إن مفيهوش أي حاجة تتحب.. متقدرش تحكم على حزن أو سعادة أي شخص غيرك، متقدرش تدرك الصورة الكاملة لأنك

ببساطة متعرفش، حتى القريبين منك متعرفش عنهم إلا الجزء اللي باين ليك، أو اللي هما عاوزينك تشوفه.. أنت متعرفش ظروف الإنسان اللي بتحكم عليه، ولا دوافعه، عقله وقلبه وتكوينه النفسي مختلف عنك، وأنت لا عشت ولا مريت بحياته من نشأته لدلوقتي، وكل أحكامك اللي فاكرها صح

مُقيَّدة بمعرفتك المحدودة.. أنت مش مؤهَل تحكم عليه ولا تقيّمه، ده مش دورك ولا دوري، دورنا كبشر تجاه بعض هو اللُطف وتقديم المساعدة لما تطلب مننا، دورنا نهوّن الحياة على بعض، مش مطلوب مننا نبقى قضاة ولا جلّادين، الحياة صعبة لوحدها والله.
@rattibha