ناس الجيش فتحوا بلاغ في الشاعر *محمد الحسن ابنعوف*، قالوا نبزنا.
قام زاد ليهم الطين بله😂😂😂😂
*****
قالو زعلتة يا ديشنا ووصلني ملامك..
قال لي العميد اضبط قوافي كلامك..
يوم درشو البنات في الاعتصام قدامك..
وين كانت جسارتك وجبرتك واقدامك..

ود ام (الكلالي)
وفارس الحربية..
مفروض نفسو عالية وعسكريتو ابية..
بعد ما بقيتو تضربو لي حميدتي تحية..
ضاع شرف العساكر وهانت الجندية..
جيشنا الكنا بنعرفو وكنا جنودو..
حارس لي تراب بلدو وترس لي حدودو..
بعد ما اتبشتنت قيمو الاصيلة وعودو..
بقى يهينو المرخرخ والاضينة يقودو..

كان ضباطو للوعرة وجنود زلزال..
تغني الدوشكا في سدورهن ويقيفو جبال..
(ارضا ظرف) وتاريخ سطروهو رجال..
هسي بقيتو مرتزقة حروب بالمال..
قال فاتح بلاغات فوقنا
هادا الخايب..
وعيين لينا ضباط بي نجوم ورتايب..
بدل ما تسك كليماتنا وتسليها كتايب..
ديك الفشقة تبكي
وياها ديك حلايب ..