في مجتمع فيه تنوع ثقافات وديانات.. مجتمع فيه اللي إتعلم تعليم أجنبي واللي كان في مدارس حكومة.. فيه اللي بتلبس فستان سواريه واللي بتلبس جلابية.. هاتلاقي الناس أشكال وألوان.. كل واحد له ظروفه وخلفياته المجتمعية والفكرية والثقافية والدينية.. إحنا فوق ال ١٠٠ مليون
هاتقولي عندنا عادات وتقاليد، هاقولك كلامك مضبوط لكن انهي عادات وانهي تقاليد.. فيه ثوابت لكن الموضوع فتح والفروق زادت.. فيه ناس كتير عايشين في bubble .. يعني ، لهم مجتمع شبههم، ومكان سكن مقفول عليهم، ونوادي ومدارس الخ... لازم نتقبل بعض، حقك تقولك عاجبني أو مش عاجبني
لكن مش من حقك تخوض في أعماق الناس وتقوم بتشريحهم إنسانيا لمجرد إختلافهم عنك.. مشكلة المايو والفساتين السواريه والحجاب، وأعياد المسيحيين.. هي لبانة مجتمعية اتعودنا عليها.. كل موسم له موجة عالية، كله بيركبها وفي الأخر تنزل على مافيش.. المظاهر دي تدل على جمود بعض العقول
لو شكل الفستان مش عاجبك، ما تتفرجش، وحقك تقول رأيك.. لكن اللي بيحصل هو نقد لصاحبة الفستان والخوض في حياتها والحكم على زوجها، واللعب على نغمة الفجور والفسق والعُري.. إيه المشكلة انك تتمسك باللي عندك وتسيب الناس تعيش حياتها زي ما هم عايزين.. ثقافة الإختلاف!
مش لازم المجتمع كله يكون شبه بعضه.. إحنا مش في مدرسة فيها زي موحد! الفلاح له طابع والفنان له طابع.. حتى المواطن العادي، هاتلاقي كل شخص له ذوق مختلف في اللبس، ومعايير مختلفة.. أنا شايف اننا ممكن نفرح أن عندنا event عالمي في مدينة جميلة، دعاية قوية جدا للسياحة في مصر
حدث عالمي يضعنا على خريطة المهرجانات اللي بتتعمل في جميع أنحاء العالم.. مين لابس إيه.. دي قصة هامشية، مش مفروض ناخدها ونهجم بيها على الناس والمنظمين والحدث نفسه.. اللي بيحصل كل سنة على السوشيال ميديا بخصوص مهرجان الجونة، بيفكرني بفيديوهات التحرش الجماعي في الشارع!
أنا شخصيا باتفرج على ملابس الفنانين في المهرجانات، وعارف أنه مجرد عرض أزياء، فيه أسماء مصممين أزياء وترويج لشركات وبراندات وشخصيات.. هي مجرد فقرة فيها business وكل نجم بيلمع نفسه، و ده مش عيب.. طبعا فيه اللبس الراقي وفيه الجريء وفيه المبتذل.. طبيعي، زي أي حاجة في الحياة!
افرحوا أن بلدكم فيها حدث ضخم بيعمل دعاية للسياحة ويحطنا على خريطة المهرجانات الدولية.. وبيشارك فيه نجوم عالميين، وأعمال فنية قوية.. بصوا للجانب الإيجابي، واطلعوا من حفرة اللبس والبطانة والكلام اللي مالوش لازمة!
جاري تحميل الاقتراحات...