رتبها

اليوم كمّلت شهر في استخدام الكرسي😍
وأحب أقول، هذا أفضل شيء استثمرت فيه صحتي! مريح جدًا للعمل ساعات طويلة، ويستاهل كل ريال حطيته فيه💛💛.

بما إنّ بعضكم مهتم بتجربتي لكرسي (Herman Miller Aeron)، حبّيت أنقلها لكم مع إنها شهر للآن، بس أشوفها تجربة كافية للحكم💛
أول دافع خلاني أبدأ بالبحث عن كرسي أفضل وعليه الكلام بالراحة والجودة، هو إنّي اشتغل من البيت، ونصّ وقتي على هذا الكرسي، سواء اشتغل أو أشوف مسلسل إلخ.

فاختيار الشيء إللي أجلس عليه كل هالوقت جدًا مهم، والاختيار السيء بيجيب لي آلام بالظهر والرقبة زيادة، أنا في غنى عنها..
وهذا إللي كان قبل أشتري هالكرسي السحري🥲.
كان ظهري يألمني بعد الشغل، رقبتي توجع، والجلسة على الكرسي السابق تخليني أقوم للسرير وأنا ظهري يتشهّد🤣.

بحثت وقريت، وشفت آراء الناس، وحرفيًا نادر تلقى أحد جربه لفترة ويقول موب زين!
لذلك قررت أشتريه ولو إنه سعره غالي جدًا، بس فدا للصحة💛 وكيل هيرمان ميلر هو شركة الهوشان على طريق الملك فهد (والضمان على الكرسي ١٢ سنة).

بخصوص الشكل أشوفه جدًا حلو، بدون تفاصيل زيادة او وسايد أو اسفنج إلخ..
-تقدر تتحكم بارتفاع اليدين + تلفّها يمين او يسار.
-تقدر تتحكّم بظهر الكرسي بـ٣ درجات (يكون مستقيم، او ينزل للنص، او ينزل لدرجة أكبر + والدرجة نفسها تقدر تتحكم فيها)
-برضو تتحكم بارتفاع الكرسي أكيد

معلومات:
-فيه منه أحجام تقدر تختار بحسب جسمك.
-فيه منه دعامة ظهر وحدة ودعّامتين.
لمّا رحت ماكان متوفر إلا أكبر حجم + دعامة وحدة، وأخذته.
ومرّة جاز لي إني أخذت أكبر مقاس لأني صرت أقدر أتربّع فيه🤣.

أول ما شريته حسّيت إنه عادي، بس لمّا مر شهر وسويت كل السلوكيات إللي كنت اسويها على الكرسي السابق وما ألّمني ظهري زي قبل، عرفت إن السرّ بالكرسي.
اشتغلت عليه ١٢ ساعة متواصلة تقريبًا وقمت ظهري ما ألمني! وهذي النقطة إللي أدفع فيها ١٠ آلاف مو بس ٤٥٠٠💛

-الكرسي مريح جدًا ومرن ويصلح لساعات العمل الطويلة واستثمار ماراح تندم عليه💛
العيب الوحيد إن مافيه مسند رأس، بس تقدر تشتريه بشكل منفصل وتركبه على الكرسي، وبكذا أشوف مافيه عيب✨
ومع ذلك إحرص إنّك ما تجلس على الكرسي ساعات طويلة متواصلة، قم وتحرّك كل ساعة على الأقل.
وبالتوفيق✨

تحديث:
بعد البحث عن أفضل مسند رأس للكرسي، لقيت مدح حلو على هالموقع:
atlasheadrest.com
يوصل للسعودية بحول ٨٠٠ ريال، بحثت بامازون ولقيت خيارات تتراوح بين ٥٠٠-٧٠٠، قريب السعر شوي، بس الجودة ما حسيتها كويسة.
ميزة هالمسند إنّه ينزل ويرتفع ويتقدّم ويرجع بحسب رغبتك✨.