هاللو 😄 انا نازل مصر بعد اسبوعين، حقعد في مصر اسبوعين، فيهم 4 weekends. انا حابب استغل الفرصة ده اني اتعرف على بنات يكونوا potential partners، خصوصا اني مقتنع ان اول تعارف بالنسبة لي لازم يبقى وش بوش، مش اونلاين. كنت عايز اكتب الثريد ده عالاكونت القديم، بس للاسف اتقفل 🥲 12/1
انا مش بدور على جواز صالونات والجو ده. انا بدور على dating واني ادخل في relationship لفترة اكتر من سنة قبل ما يبقى في اي خطوة رسمية. علشان نتعرف على بعض ونتأكد ان فعلا احنا ننفع نبقى partners. انا ما عنديش fear of commitment، بس مش عايز اتجوز جوازة من غير علاقة ناضجة كفاية. 12/2
ببساطة انا بدور على blind dates في الفترة اللي انا نازل فيها مصر. فالثريد ده علشان لو حد من الناس اللي تعرفني ويعرف بنت ممكن نبقى متوافقين، يخليني اقابلها واتعرف عليها في مصر. او لو واحدة كانت متابعاني في الاكونت القديم ومعجبة بي، انا ابقى مرحب جدا انها تبعتلي تقولي نتقابل. 12/3
السؤال المهم بقى، انا بدور على ايه؟ انا بدور على بنت تكون 26-35 سنة. تكون افكارها ودماغها متوافقة معايا. ده مش معناه اننا نبقى متفقين على كل حاجة، بس يبقى الفروق في حاجات مش اساسية. وتكون مستعدة تعيش باقي حياتها في اوروبا، لاني مش ناوي ارجع مصر ابدا. 12/4
يعني انا بدور على واحدة تكون فيمنست، شخصيتها قوية، مؤمنة بالحرية، متقبلة للآخرين باختلافاتهم، عايشة في 2021 مش دماغها قديمة، تكون intellectual ونعرف نتناقش مع بعض نقاشات كويسة مش سطحية، وما تكونش بنوته كتكوتة كلبوبة 😅 وتكون بتحب ترقص وبتحب تغني في الشارع 🕺💃 12/5
بدور على واحدة يبقى ما عندهاش مشكلة ان لي صديقات بنات (وانا برضه ما عنديش مشكلة ان ليها اصدقاء ولاد)، وتكون متقبلة للآخر وما عندهش مشكلة ان يكون لينا اصدقاء مثليين وملحدين او اي حاجة. وتبقى مستعدة تسيبني انا اللي اشيل الطبخ في البيت 🧑🍳😅 12/6
انا افضل البنت اللي ارتبط بيها تكون مش محجبة. بس لو هي قررت تتحجب بعد كده فده قراراها هي وهي حرة فيه. ايمانها وعلاقتها بالدين ده بتاعها هي، انا مش حتدخل فيه. بس برضه انا عايزها تبقى متقبلة ان ايماني وعلاقتي بالدين او عدم ايماني حتى ده بتاعي انا، و تبقى متقبلاه مهما كان. 12/7
مهم البنت اللي اترتبط بيها تبقى مؤمنة بجد بالمساواة بين الراجل والست بالشكل الاوروبي. يعني الراجل والست بيقسموا بينهم المصاريف والمسؤوليات، وراسهم براس بعض بجد. ما فيش ريس بياخد قرارات، كل القرارات مشتركة. ونخطط حياتنا والcareers بتاعتنا مع بعض. 12/8
ده معناه اني بدور على بنت يكون عندها شغلها وcareer ماشية فيه. انا مش بدور على ست بيت. الcareer بتاعها مهم زي الcareer بتاعي بالضبط. وده معناه ان عادي ممكن ناخد قرار يفيد الcareer بتاعها ويضر بتاعي، لو ده الافضل لعيلتنا ككل! 💪 12/9
انا بحب السفر جدا، بحب الhiking والطبيعة، بس كمان بحب اوي المدن والتمشية في شوارع المدن القديمة. فمهم البنت اللي حرتبط بيها تبقى بتحب تسافر وتلف وتفرهد، ومستعدة كل شهر عالاقل نزور مدينة جديدة، علشان نلف العالم مع بعض 😄🧳✈️ 12/10
لو قابلت بنت في مصر واتعرفنا على بعض وكان في توافق اولي، انا حبقى بنزل مصر كل 3-4 شهور مثلا علشان نقابل بعض، وممكن اكتر من كده كمان لو اتفقنا على ده. وطبعا في النص بنتكلم اونلاين وبنتعرف على بعض اكتر. ويبقى عظيم اوي لو عرفنا نسافر مع بعض بره مصر اسبوعين كل فترة. 12/11
بس كده، ده اللي انا بدور عليه. فلو حد يعرفني وعنده اقتراح لبنت مناسبة، انا حبقى سعيد جدا اني اقابلها لما انزل مصر بعد اسبوعين. ولو في بنت تعرفني كويس و حابه تقابلني، انا مرحب جدا لانها تبعتلي مباشرة. ده بالنسبة لي ميزة كبيرة لان معناه ان شخصيتها قوية. 12/12
يا جماعة في شرط مهم فشخ نسيت اقوله! ما تبقاش سيساوية ولا فلول ولا مؤمنة بنظريات المؤامرة ولا ضد التطعيم 🤣
جاري تحميل الاقتراحات...