أخويه اللي نويت تشارك وتصوت لمرشحك.. قبل متبصم أخذلك نص ساعة إتذكر بيها مراجعتك للمستشفيات الحكومية وشلون الطبيب يگلك هذا العلاج اخذه من بره لان هنا ماعدنه غير الباراسيتول واتذكر الاهمال والقذارة والريحة الخايسة بهيج مؤسسات المفروض من تطبلها تطيب من امراضك كلها مو تتمرض من وراها
استرجع الدوائر الحكومية ، واتذكر شلون يخلوك واكف برة مثل الچلب بصف القطعة الخارجية لسبالتهم ، واتذكر القذارة اللي تشوفها بمكاتبهم وتواليتاتهم هاي من عدا معاملة موظفيهم اللي ماتلكاها بس عدنه لان العالم كله اتحول للحوكمة الالكترونية اللي تخلي المواطن يكمل معاملاته وهو گاعد ببيتهم .
ارجع اتذكر العشائر العراقية اللي طلع لسانها وره السقوط ووين ماكو ساقط وكاولي صبغ شواربه ولبس عگال وصار شيخ براسك وكل حچاية والثانية يدزلك گوامة ويگعدك بفصل ويكسر ظهرك او يدگ بيتك ويفزع عائلتك وهمه خيرهم واكبر شارب بيهم چان اذا يفك حلگه ويندگ بالدولة يزينون شاربه ..
وبدربك إتذكر كل السياسيين اللي شفتهم من ٢٠٠٣ لحد الان ، وارجع احسبهم واحد واحد من عدنان الدليمي للجلبي للربيعي لمريم الريس لعواطف النعمة لخلف عبدالصمد لنجيبة لعرفات كرم ولقاء وردي وهنا انت لا اراديا راح تلكه لسانك يفشر بكلمات +١٨ مع حركة اصبع اليد الوسطاني ويه كل اسم تذكره
هنا انت راح يمر عليك شريط كامل من المأساة اللي صارلك ١٨ سنة تشوفها يومية وراح تشوف مشاهد التفجيرات والاغتيالات والكهرباء والعشوائيات وشحة المياه والظلم والقسوة والاهمال وفد قائمة طويلة من المعاناة اللي تنفرد بيها كونك الكائن البشري الوحيد بهذا الكون اللي يگدر يتحملها ويصبر عليها
راح تصفن بذولي الشباب الحلوين اللي طلعوا علمودك وإجت دخانية نبتت براسهم والدخان يطلع منها لو طلقة قناص طشرت دماغهم بالگاع وراح تتذكر صرخات امهاتهم عليهم ..
وهنا راح ترجع تتصفح مشاهد من سلطنة عمان ودبي والدوحة ، واوتوماتيكيا" ترفع عينك بعين الله وتگله صدگ ربي كل هاي تشوفها بينه ولحد الآن عايفنه بهاي الوضعية الكسيفة ؟ ومباشرة" يجيك الرد الخفي من اعماقك بأن الله ماله علاقة ، والحسين كلشي مايگدر يسويلك ،إذا ما إنت تصنع الغيير بـ إيدك .
وأول خطوة لازم تسويها هي انك تختار الصح ، وتختار العراقي الحقيقي اللي مايرتبط بأي حزب سياسي او كتلة أو تيار ديني او رجل دين أو دولة او أي جهة غير العراق وبس .
ولتگول معليه ولتگول ياهو مالتي ، ولتصدگ بكل أحد يگلك النتائج محسومة وقاطع ولتنتخب ..
إصفنلها زين وإحسبهـا صح وبكيفك بعد
ولتگول معليه ولتگول ياهو مالتي ، ولتصدگ بكل أحد يگلك النتائج محسومة وقاطع ولتنتخب ..
إصفنلها زين وإحسبهـا صح وبكيفك بعد
جاري تحميل الاقتراحات...