رتبها

مثل ما كلنا عارفين إن الكل كان يحذر من إعصار شاهين على مسقط والباطنة من اسبوعين والا من شهر المهم ما علينا ، اليومين اللي قبل الإعصار تم إخلاء الناس اللي ع الساحل كون انه الاعصار بيكون ف البحر وبيخف من يوصل اليابسة طبعا انا مالي معرفة بسالفة الاعاصير
#عمان_عظيمه_بشعبها
#شاهين

بس قالوا يبدأ يخف من يدخل اليابسة ف الخوف ع اهل البحر والساحل، وصلنا ع يوم الاحد وكانوا قايلين مركز العبور الخابورة وكنا فجر الاحد كلنا ما نايمين نخاف يصير اي شي فجأة

نزلوا تحذير رقم ٥ الساعه ١ ظهر الاحد ان العبور بين مصنعه وصحار من ٦-١٠ مساء وكنا طول هالفترة ونحن ع الاخبار ، بعدين نزلوا تحذير الساعه ٧ مساء الاحد ان الاعصار بيمر بين مصنعه وسويق خلال الساعه القادمة يعني الساعه ٨ مساء ،

وصلنا للساعه ١١ ونزل بيان عن انخفاض تصنيف الاعصار الى عاصفة وان الاعصار خلاص وبتتأثر الشمال بأمطار ورياح شديدة قلنا يالله زين دام الاعصار راح واهل الساحل سلموا خلاص كل شي طيب والامطار الحمدلله معنا سد ما صار ولا استوى😃😃وجلسنا طول الليل ونحن نراقب الجو برع ونراقب مصادر الطقس

وكل حد حرفيًا يرسل كيف الجو ف الخابورة كيف الجو ف الخابورة ونقولهم معنا هدوووووء تام اخر الليل ع الساعه ٢ الوضع هادي الامطار خفيفة إلى متوسطة رياح ماشي وتطمنا ان خلاص دام الاعصار راح والجو طبيعي نحن بننام لان الليلة الي قبل ما نمنا ع اساس بيمر الاعصار معنا ف كنا مرهقين وتعبانين

الدقايق الي نمنا فيهن من ٢:٣٠-٣ فجر نقوم ع اتصالات الاهل ودق الابواب ونطلع مفجوعين نحن واطفالنا وش صاير وش مستوي الا نطلع برع البيت ونشوف الطوفان منهد علينا ، لحد يقول وينكم ما شفتوا وادي وما اعرف ويش لان ما كان شي برع ولان السد ما كان فايض ،

طلعنا والا بيتنا متحول لبحر وفيضان يحوط بنا من اربع اتجاهات والاتصالات بصعوبه تروح كهرباء ماشي شبكة ماشي نركض ودرنا كل شي ورحنا ع السطح نشوف بيوت اخواني من ركب السطح ومن لا !!! اخوي بيته ع مجرى الوادي وما معه درج داخلي يرتفع لأعلى البيت تفاجأ بالفيضان مغطي البيت ف حالة هلع وخوف

يتصل بالطواري يخبروه نحن ما نقدر نحرك طايرات ما نقدر نجي !!!! بلطف القدير كسر اقرب نافذه توصله للدرج وجلس ينقذ اطفاله الي اكبرهم عمره ٨ سنوات واصغرهم رضيعة ،الاطفال ف حالة خوف وهلع قايمين من النوم ع صريخ وصياح وماي من كل مكان محاصرنهم !!!

!!! نتصل ع ارقام الطواري اللي اصلا مخلينهم طواري للحالة المدارية ويردوا علينا ما نقدر نجي ف الوضع هذا الطايرات ما ممكن يتحركن! اذا انتوا ما معكم استعداد ان حتى فالليل تنقذوا الناس ليش مسمين نفسكم طواري نحن تلفوناتنا ما يوصلن تعبئه ماشي شي ماشي نحاول اول اتصال يكون الطواري !!

انتظرنا طول فجر الاثنين اللي كان اطول فجر ف حياتي " ريحة المجاري ريحة الغازات انتشرت ف الجو جانا اختناق جانا ضيق نفس معنا كبار ف السن معنا اطفال رضّع معنا اطفال مرضى !!! انتظرنا قلنا بيطلع علينا النور وبتتحرك الطايرات تنقذنا !!

الطايرات وصلن المنطقة الساعه ٩ صباح واستمروا ينقذوا الناس الي فعلاً تعبانه ومشكورين ع هالشي وجلسنا فوق سطوحنا من ٣ فجر لغاية ١١ صبح ونزلنا البيت الي اصلا كله ماي وطين ،

نتواصل مع الطواري طول العصر والمغرب يقولوا عطونا مكانكم وبنرد عليكم ومره يقولوا فيه ناس محتجزة نحاول نطلعهم قبل الظلام ونحن متفهمين لذا الشي لان فعلا فيه ناس متضرره وغرقانه اكثر منا، واستمر الوضع ونحن فوق السطح

واتصلنا اخر شي بفريق الاغاثه ف مسقط وجلسوا يلومونا ليش ما تكلمتوا من الصبح وانتوا وين كنتوا من الصبح ! وانتوا ليش ما غادرتوا المكان ووووو !!انزين نحن نتصل من فجر الاثنين نتصل فيكم وانتوا تقولوا بنرد عليكم وناس متضرره اكثر وووو !

! هذا ما وقت لوم هذا وقت اغاثه وقت انكم تتحركوا وقت انكم تقوموا بإخلاء جميع المناطق الي تأثروا هناك بغض النظر هم ميتين او لا !!!نحن ٢٠ شخص ف اعلى السطح من بينا ١٢ طفل عمرهم من سنة -٧ سنوات !!! وامي كبيرة في السن !!

وصلنا الانقاذ الساعه ١ فجر الثلاثاء وبعده ما قدرنا يوصلوا لمنطقتنا اضطرينا نمشي مسافه وقدرها ونحن حتى " نعل" ما معنا !!

اللوم حالياً ع من ؟ علينا نحن لان نمنا ربع ساعه بعد ليلة متعبه وبعد ما تطمنا من الجهات المعنية
والا اللوم على الجهات المعنية بعد ما قالوا ان الاعصار تحول عاصفه وبتكون امطار ورياح
وانه خلاص عبر السويق والمصنعه
والا اللوم ع الطواري الي المفروض يكون ف خدمة الشعب حتى لو اخر الليل !

والا اللوم ع الجهات المسؤولة عن اخلاء المناطق
والا اللوم على من!!!!
هل اللي جانا كان اعصار ! هل الاعصار كان يعبر ف الخابورة ! والا ويش الي صار

ما راح اذكر كل شي ولا الخسائر الي صارت ولا اي شي دام سلمنا انا واهلي بس اتمنى من الجهات المسؤولة انها تكون اكثر استعداد وجاهزية لمثل هذي الحالات الاستثنائية وتكون اكثر دقة 👍🏻

الناس الحين ما محتاجة اجتماعات ولا محتاجة خطط تقديرية الناس محتاجة حد يتحرك ويعوضهم عن خسايرهم الي صارت!!وبس ما بقول شي اكثر لاني اجيب العيد بزياده

بيتنا كان محاوط من اربع اتجاهات بهذا الفيضان ،١٠ سيارات ف بيتنا ٢ كبار والباقيات صغار كلهن تدمرن كل الجدران تحطمت وغير الاضرار الي صارت داخل المنازل بس ما راح انزل صور اي شي لان قادرين نتخطى الي جانا وكل الخساير تتعوض ،نتمنى تساعدوا الناس الاكثر حاجة منا