ثريد عن العطل الفنى وايه اللى حصل فى #فيسبوك #Facebook و #واتساب #WhatsApp و #انستاجرام #Instagram، بداية اللى حصل لل platforms دى سبب ضغط كبير جدا على كلا من تيليجرام وسيجنال وخصوصا على تويتر #يتبع
بداية لازم نفهم مصطلح مهم جدا والسبب الرئيسى للمشكلة، هوا ايه ال BGP؟ او Border Gateway Protocol؟
حسب تعريف مدونة شركة Cloudflare الرسمية، ال BGP دا عامل كدا زى خدمة البوسطه للانترنت كله، ولما بييجى شخص يبعت جواب لشخص اخر الخدمة دى هيا المسؤولة عن توصيل الجواب بأسرع وافضل طريقة
حسب تعريف مدونة شركة Cloudflare الرسمية، ال BGP دا عامل كدا زى خدمة البوسطه للانترنت كله، ولما بييجى شخص يبعت جواب لشخص اخر الخدمة دى هيا المسؤولة عن توصيل الجواب بأسرع وافضل طريقة
وبنفس الطريقة لو قمنا بتطبيق الموضوع على الانترنت فلما بييجى شخص يرسل بيانات لاى شخص تانى ال BGP هيا المسؤولة الاولى عن ايجاد افضل واسرع طريق واكثر الطرق فاعلية على توصيل البيانات دى للطرف المستلم عن طريق انها تفضل تتنطط وسط الانظمة المختلفة علشان تلاقى افضلهم فى نقل البيانات
بروتوكول BGP من الاخر هوا اللى بيخلى الانترنت يشتغل زى ماحنا عارفينه دون النزول الى تفاصيل لباقى الرحلة من DNS resolving الخ...، التدوينة بتضرب مثال بأن لو فى شخص فى سنغافورة طالب يدخل موقع موجود بالاساس فى الارجنتين ال BGP هو البروتوكول المسؤول عن ايصاله للموقع دا بسرعه وفاعلية
ودى مجرد فكرة عامة عن البروتوكول اللى مش هدخل فى تفاصيلة الفنية المكلكعة باللغة العربية علشان كل ما هستخدم اللغة العربية وتعبيراتى هخل كتير جداً بالمعانى ويجوز اضلل بعض الناس فى فهمها ولكن شرحنا الجزء المهم فى الموضوع، التدوينة تقدروا تقروها هنا: skty.cc، نكمل...
البروتوكول دا زى اى شئ فى الكون له نقاط ضعفة وطرق اختراقة والتحكم فيه، هل حصل دا قبل كدا؟ اه، تفاصيل فنية عن ال BGP Hijacking او نقاط الضعف الموجودة واللى ممكن تمكن اى حد عنده القدرة انه يتحكم فيه موجوده فى التدوينة دى: skty.cc بس هل اللى حصل دا اختراق؟ لا، نكمل..
بحسب التصريح الرسمى ل Doug Madory مدير وكالة Kentik المتخصصة فى تحاليل الانترنت واللى قال ان فى تمام الساعه ١١ و ٣٩ دقيقة صباحا بالتوقيت الشرقى ان فى موظف داخل شركة فيسبوك عمل update لسجلات الشركة الخاصة ب BGP داخل الشركة...
التحديث دا تسبب فى ضياع (كل او جزء لسه محدش عارف) السجلات اللى بتقول للعالم كله ان فيسبوك (او خدماتها الاخرى) موجود على عنوان ال IP المعين دا، بمعنى انك لو طلبت تدخل فيسبوك او انتساجرام او واتساب الانترنت نفسه مش عارف يلاقى عناوين ال IP او ال DNS الخاصة بالخدمات دى...
بتعبير اسهل، فيسبوك بالتحديث اللى حصل فى سجلات BGP دى شال نفسه وخدماته بالكامل من على خريطة الانترنت وبالتالى من على خريطة مقدمى خدمات الانترنت او ISP - Internet Service Providers واللى كلهم اصبحوا مش شايفينة ولا عرفين يترجموا اسماء الدومينات دى لأى شئ، الصور التالية هتوضح:
نكمل، الخطأ مش بس تسبب فى عدم وصول المستخدمين العاديين لخدمات فيسبوك المختلفة، لا، دا كمان خلى موظفين فيسبوك داخليا ميقدروش يتواصلوا مع بعض عن طريق الخدمات الداخلية زى الايميل وخلافة ودا لان الخدمات الداخلية مبنية تقريبا على نفس اسماء الدومينات ودومينات اخرى حصلت ليها نفس المشكلة
المشكلة طالت بردو منصة Facebook Workplace وخدمات تانية مختلفة بس علشان احنا نعرف انستاجرام وواتساب وفيسبوك افترضنا ان هما بس اللى كان فيهم المشكلة، على اية حال فيسبوك حالياً بدأ يتعافى والخدمات ابتدت ترجع تدريجياً مروراً بواتس اب وفيسبوك لحد انستاجرام و Workplace
مشكلة زى اللى حصلت دى بتوضح قد ايه استحواز شركة كبيرة على خدمات مهمه جداً زى دى ودمج الخدمات داخل نفس البنية التحتية ودا مفهوم المركزية او Centralization واللى ممكن يتسب فى outage كبير اوى زى اللى حصل دا، اللى حصل دا مش ضرورى يحصل بس مع فيسبوك، ممكن يحصل مع اى شركة او خدمة تانية
نكهنات بقى عن وجود هجوم ججب موزع للخدمة DDOS او تسريب بيانات داخل بعض المنتديات الموجودة فى ال underground مش سليم بالمره ولكن الموضوع صادف حاجه غريبه، بحسب مدونة Brian Krebs بيقولك ان ال outage اللى حصل دا جه بعد ساعات بعد ما شبكة CBS عرضت مقابلة مع Frances Haugen
الاخ Frances Haugen دا يبقى Facebook Whistleblower او مسرب بيانات كان شغال فى فيسبوك سابقاً وقام بتسريب كتير من المستندات الخاصة بتحقيقات داخلية فى شركة فيسبوك بتتكلم عن ان منتجات فيسبوك المختلفة بتسبب الكتير من الاذى على المستخدمين بسبب وجود بيانات مغلوطة وخطابات كراهيه
ولكن الجزء اللى فات دا يظل صدفة بحته ولحد دلوقتى محدش يعرف ان كان له علاقة ولا لا، بس الجزء الاضافى فى الموضوع ان موظفين فيسبوك ابلغوا انهم مش قادرين يدخلوا المبانى الخاصة بالشركة ودا لنفس سبب المشكلة الرئيسية بسبب العطل واللى تسبب بردو فى ان ال access badges بتاعتهم مش شغاله
غرف خوادم فيسبوك بطبيعة الحال مقفولة والدخول ليها عن طريق access badge وعلشان المهندسين يدخلوها محتاجين يستخدموا ال access badges دى ودا كان مستحيل مع وجود مشكلة زى دى ودا اللى يثبت ان ال internal systems نفسها تأثرت بالمشكلة.
واخيراً عن موضوع دومينات فيسبوك اللى كانت متاحة للبيع، دا طبيعى مع وجود مشكلة زى دى شركات الاستضافة والشركات الخاصة بخدمات الدومينات انها تشوف ان الدومين متاح بسبب ان فيسبوك زى ما قولنا قبل كدا - وبالخطأ اللى حصل- شالت نفسها من على خريطة الانترنت بالكامل واصبحت الدومينات متاحه
نكمل، الدومينات متاحه لكن يقدر يشتريها لانها تقنياً محجوزة ومش محجوزة فى نفس الوقت، محجوزة بشكل فعلى انما لادوات النطاقات فهى تعتبر متاحه ودا لانها مش مربوطة بأى IP - DNS - Routes نهائياً ودا شئ طريف لان فى ناس بدأت مزادات فعليه على الدومين والله اعلم يجوز يكون فى كتير وقعوا :D
بس كدا تقريباً دا كل اللى نعرفه، لو فى اى شئ هزوده فى ال thread دى
دا واتساب @WhatsApp من شوية بس دلوقتى رجع، الغريب انه رجع والسيشن الخاصة بواتس اب ويب كلها راحت ودا يحط علامات استفهام كتييييير؟!؟!؟!؟؟!
@WhatsApp تصحيح بسيط، انا اعتبرت ان مسربة مستندات فيسبوك Frances Haugen راجل، هيا ست يا جماعه فبعتذر عن الخطأ الغير مقصود دا
(التحليل التقنى للجزأية دى تحديداً محتاج ثريدات مش ثريد واحد لشرحة ولكن اتمنى ان التبسيط لم يخل بالمعنى).
جاري تحميل الاقتراحات...