بعد حادث الانتحار الأخير انتشر خبر عن تقرير الطب الشرعي عن عذرية المتوفاه. كلام كتير اتكتب في الموضوع بعضه صح وبعضه مش دقيق. حبينا نوضح إيه دور تقرير الطب الشرعي في حوادث الانتحار؟ وإيه موضوع "كشف العذرية"؟ (علماً بأن الانتحار مش جريمة في القانون المصري ولكن التحريض عليه جريمة).
لما بتحصل حادثة انتحار بيكون السؤال: هل في شبهة جنائية في الحادث ولا لأ؟! (يعني في شبهة قتل، أو تحريض على الانتحار أو غيره؟). وده بيحتاج سؤال شهود الواقعة، وأهل المتوفى، والتحريات، وطبعاً تقرير الصفة التشريحية الـ بيعمله الطب الشرعي بيكون أساسي في الإجابة على السؤال ده.
تقرير الصفة التشريحية بيكون تقرير مفصل بيتكتب فيه حالة الجثمان وقت التشريح وإصاباته، وأسبابها، وسبب الوفاة المباشر، وبيتاخد عينات من الجثمان بتتحلل لبيان إذا كان في سموم أو مواد مخدرة ولا لأ، وجزء من التقرير بيكون فحص "العذرية" Virginity Test.
والحقيقة إن الكلام عن "كشف العذرية" محتاج تفصيل وتفرقة بين نوعين من الكشف: الأول نوع مهم ومطلوب وبيتعمل في حوادث الاعتداءات الجنسية، وده مش هدفه البحث عن "عذرية" المجني عليها. ولكن هدفه البحث عن أي إصابات أو أدلة مادية على العنف تساعد في إثبات حق الضحية.
النوع الأول ده من الكشف بيعمله الطبيب بناء على قرار جهات التحقيق بعد أخذ "موافقة مستنيرة" Informed Consent من الضحية وما بيشملش فحص حالة الـ hymen، وبيتعمل بطريقة "ظاهرية" تحترم كرامة الضحية، وما تسببلهاش مشاكل نفسية أكتر. (وتاني بيكون غرضه مصلحة الضحية مش اختبار عذريتها).
النوع التاني وهو "كشف العذرية" بالمعنى "الدقيق". وهو ده النوع المنتشر في منطقتنا وهو محل الخلاف. ليه؟ لأنه بيتم فقط (بغرض) معرفة الضحية "عذراء" ولا لأ، وبيتم فيه فحص حالة الـ hymen بأسلوب صعب وكتابة تقرير عن نوعه وإذا كان تم فضه مؤخراً ولا من فترة...إلخ.
النوع التاني ده من الكشف كان متعارف عليه بين الأطباء الشرعيين في العالم من زمان وموجود في كتب الطب الشرعي القديمة ولازال مستمر في كتير من الدول. وده مرتبط تاريخياً واجتماعياً بفكرة "العذرية" وأن الـ hymen هو دليل أساسي على حصول ممارسة جنسية من عدمه.
بنلاقي مثلاً السير د.سيدني سميث "أستاذ الطب الشرعي البريطاني الشهير ومؤسس مصلحة الطب الشرعي في مصر" في كتابه بعنوان: "الطب الشرعي في مصر" المنشور سنة ١٩٢٤م. بيقول في ص٣٩١:
مؤخراً استقر الرأي العلمي على إن وجود الـ hymen من عدمه مش دليل على أي حاجة، وعلشان كده بدأت نظرة المجتمع الدولي ومنظمات حقوق الإنسان تتغير وبدأوا يطالبوا بإنهاء النوع ده من الكشف.
في ٢٠١٨م منظمة الصحة العالمية اعتبرت كشف العذرية ليس له أساس علمي ولا يمكن الاستناد له كدليل على ممارسة الجنس من عدمه، وأنه بيسبب مشاكل نفسية للضحايا بل وأنه يعتبر نوع من أنواع العنف ضد المرأة.
bit.ly
bit.ly
عدد من الدول زي فرنسا وبعض الولايات في أمريكا بدأت بالفعل تقترح مشروعات قوانين لتجريم "كشف العذرية" ومعاقبة أي طبيب يعمله.
الخبر الـ انتشر بعد حادث الانتحار مهين لكرامة المتوفاة ومؤذي لأهلها. الحقيقة إن تغيير الوضع ده محتاج كذا خطوة:١- تحديث مناهج الطب بخصوص الموضوع ده، ٢- تغيير ثقافة جهات إنفاذ القانون والأطباء الشرعيين، ٣- نشر الوعي في المجتمع.
للقراءة أكتر عن الموضوع من الناحية العلمية: bit.ly
جاري تحميل الاقتراحات...