رتبها

بسم الله الرحمن الرحيم اما بعد ..
هذا يا اصدقاء هو جانب من منظر الجيش الابيض المستقبلي صباح اليوم في المجلس الطبي السوداني والصورة دي حرفيا قبل تفشي حالة الجنون بوقت قصير ..

ملخص القصة :
قيل كم يوم اعلن المجلس الطبي عن تسليم شهادات التسجيل التمهيدي انها اليوم .. والناس اللي مفترض تستلم مابين ٥٠٠ شخص و ٥ الف شخص او اكثر ..
اللي هم خريجين طب بشري / صيدلة / طب اسنان واللي سجلوا للقسم في اشهر ٥/٦/٧/٨ واقسموا ..

لما تقروا بتحسوا انو الموضوع ساهل ومايحتاج غير تسلم ايصال وتستلم شهادة وتمشي تصورها وترجع لهم الصورة وتحتفظ بالاصل يعني حاجة بتتم في عشر دقايق .. وبس
لكن اللي حصل من الجيش الابيض المستقبلي كان غير المتوقع ..

صراحه في كل مكان في بلدنا حاليا في زحمة و اي ورق مابطلع بسهولة واي شي الا جرجرة لكن يوم الليله كان من نوع اخر حرفيا ..

اطباء المستقبل قرروا انهم يدخلوا المكان الاداري الموجود فيهو شبابيك التسليم دا ويدخلوا كلهم سوا في نفس الوقت ويتدافعوا ويتضاربوا ويزلوا بعض وبطرق عنيفه خالص .. يعني لدرجة الواحد البستلم شهادتو مابيقدر يطلع وعادي ناس تدوخ وناس تقع وناس تتعفص وناس وناس تكسر الحنك وتطلع ..

اعتقد السبب من اليأس اللي كان عايشينو الناس في الفترة الفاتت وهم منتظرين الشهادة دي لكن مافي مبرر للهمجية والاسلوب دا مهما كان الواحد تمرمط ولا تضايق من طول الانتظار ومهما كان الواحد شفقان ..

لساعات الناس واقفه وبتدفر بعض وعدد الشهادات اللي بيطلع والناس اللي بتستلم ولا واحد في المية من الناس اللي متجمهرة .. وفي لحظة اطباء المستقبل عصبزا واشتبكوا مع الموظفين مع العلم انو الجرجرة ومحرقه الزمن دي ماحاجة جديدة ع موظفين المكاتب في بلادنا بس برضو اشتبكوا ..

وماخلوا للموظفين الا انهم يقفلوا الشبابيك ويفتحوا ابواب المكاتب وهنا بدأ يتفشى ال Madness في الجو ..

المكاتب كانو خمسه واحد للشبابيك الكانو شغالين فيها ..والاربع الباقين مقسمين كل مكتب فيهو اوراق وشهادات الناس السجلوا في واحد من الاشهر الفوق ..
اطباء المستقبل كلهم دخلوا جوا ولقوا ايصلاتهم مرمية من قبل الموظفين وبقى كل واحد بيفتش اوراقو وبيرمي اوراق غيرو ..

والمكاتب الثانيه ناس بتتجمهر وتذيع الشهادات المعاها وناس بتفتش براها وناس بتسال وناس بتدفر في بعض ساي وناس بتشتبك ..

الشهادات والايصالات في كل مكان .. الكنب الارض الحوش في كل مكان حرفيا .. جزء مقطع جزء ضايع جزء كيف كيف ..
واطياء المستقبل كل مايمشي الوقت وهم بيزيدوا جنون وتصرفات كدا غريبة فعلا ...
اليوم دا كان اسوأ تجربة تمر علي في حياتي وبعد كل دا ما لقيت شهادتي وتركت المكان وطلعت ..

اي شيء سيء كان هناك .. الزحمة الروائح الضيق الكتمة اللز السرقة الملامسات المشاكل والاشتباكات مع بعض والصراخ والتعب والضيق والناس اللي بتدوخ والناس اللي بتقع وتتعفص وكل شي ممكن تتصوروه كان مجتمع في اقل من ست ساعات من الاطباء اللي مفترض الناس تضع امانة ارواحهم في اعناقهم وتثق بهم.

ايوا نعم ناس المجلس نفسهم ماكانو منظمين الموضوع ... ايوا نعم الموظفين غلط يطلعوا ويكسروا الحنك ... ايوا نعم السودان قاسي ومحبط واي شي
ولكن ماف مبرر للهمجية والانانية والوحشية والتصرفات دي ... كلنا مسؤولين يوم القيامة منها ..

ومافي احد بيتخرج اقل من ٢٠ سنة يعني الكل واعي بنفسه وبتصرفاته .. واليأس ابدا م كان سبب للتخلف المجتمعي وبالذات من الجيش الابيض واطباء المستقبل .. شيء يخجل صراحة وبالجد مستحيل احكي الحصل دا لشخص برا الميدكال فيلد لانو بالجد مخجل ..
Still Traumatized والله ...

العالم ماشي للاسوا والسودان تحديدا ماشي للاسوا والنفوس ماشية للاسوا .. لكن ماتطالبوا بالتغييير لو ماقادرين تغيروا من انفسكم ولا من اخلاقكم ولا من طبعكم ...
حتى لو قلتو دا ماطبع ودا ماخلق والموقف والظرف هو كان السبب وووو ... لكن للاسف يعني دي الحقيقة...

مهما كانت المواقف مافي مببرر للتصرفات الهمجية يا اطباء المستقبل ..
كيف حتعالجوا وتمسكوا امانة حياة بني ادميين لو ماقادرين تصبروا كم دقيقه او كم يوم عشان تشيلوا ورقكم ..

في الختام الله يهدينا ويصلح حالنا ويوفقنا وييسر دروبنا جميعا يارب ..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة