إمبارح كنت في مساكن شيراتون الساعة ١١ مساءا تقريبا.. ركنت عربيتي وعملت مكالمة تليفون مدتها ٣ دقايق.. خلال ال ٣ دقايق، جالي سايس وكناس واتنين متسولين.. يعني إجمالي ٤ متسولين في ٣ دقايق! فيهم واحدة ست شايلة اكياس ومعاها فوطة صفرا والباقي رجالة..
ماعرفتش اكمل المكالمة من كم ال action .. كل واحد فيهم جاي يخبطلي على شباك العربية.. نزلت من العربية، جالي طفلين مسكوا في البنطلون، عايزين فلوس.. "انتم عايزين العنطلون في حاجة".. القصة دي بتتكرر كتير في شوارع تانية، زي شارع الأهرام في الكربة!
لما كنت باقول إن الشعب ده مقسوم، جزء بيشتغل وطالع عينه، وجزء واقف في الشارع عشان يثبت الناس وياخد منهم فلوس! ده اللي بيحصل حرفيا! هاتقولي أن الناس أحوالهم صعبة.. هاقولك أن معظم الشحاتين يمتهنوا التسول.. عدد كبير من الناس الغير منتجين ومش عايزين يشتغلوا!
مفروض أن القانون بيمنع التسول.. لكن شوارعنا مليانة متسولين! وفيهم اللي ممكن يبلطج عليك ويبجح لأنه شايف ان حقه ياخد جزء من اللي في جيبك! وعشان اخلص ضميري، كل فترة باعمل test.. اخرهم، الاسبوع اللي فات عرضت شغل على سايس، قالي انه مش محتاج شغل، لكن محتاج مبلغ ٦٠٠٠ جنيه!
ليه الشوارع متروكة للمتسولين يبرطعوا فيها؟! اعتقد ان الدولة عاملة مشاريع ممكن تشغل فيها ملايين... لكن الناس دول مش عايزين يشتغلوا! طول ما الشارع متاح للتسول، هايختاروا الطريق السهل.. و ده كله جاي على قفا المواطن اللي بيشتغل وبينتج، لكن مضطر يتعامل مع المتسولين في كل مكان!
التسول خلى أي شخص واقف في الشارع يشوف فرصته في تقليب الناس.. عشان كده الكناس تلاقيه ماسك المقشة لكن تركيزه في الشحاتة.. السايس مش محتاج اتكلم عنه.. البواب اللي بقى يؤجر الشارع لحسابه، كام كوز اسمنت أو جالون مياه فاضي، يحجز بيه أماكن ويبيعها للمواطنين!
عشان أكون إيجابي.. بجملة الرسوم اللي بندفعها يمين وشمال.. ممكن كل شخص يدفع ١٠ جنيه زيادة على ضريبة الدخل.. والشركات تدفع ١٠٠٠ جنيه سنويا مثلا.. تحت بند إعانة المحتاجين.. الحكومة تساعد بيهم الغير قادرين عن العمل.. والقادرين يشتغلوا في مشاريع الدولة.. واللي ينزل يتسول يتقبض عليه!
ما ينفعش نكون بندفع كل الضرايب والرسوم دي على كل خطوة ونفس بنتنفسه ونلاقي شوارعنا زي ما هي، عمرانة بالمتسولين اللي وصلوا لمرحلة الحق المكتسب.. ارجو من السادة المسؤولين يفكروا في حل جذري للمشكلة دي، عشان المنظر مش حلو حتى عشان السياحة!
جاري تحميل الاقتراحات...