اليأس مرض.. مرض خطير جداً و حاد لدرجة إنه بيصيب البدن والنفس والروح.. وبلاش فزلكة وإستسهال و تقولوا للمريض باليأس روح صلي ولا روح إقرا قرآن.. مافيش أدنى شك إن ااحاجات دي ممكن تفيده.. لكن المريض مش دايماً في حالة تسمخله يعمل أي مجهود خصوصًا لو عمله كتير قبل سابق وماتعفاش من مرضه.

المريض باليأس محتاج حد يديله أمل في أيامه الجاية.. حد يهون عليه همومه و يأكد له إنها بسيطة.. يأكد له مش بالكلام وبس‼️ مش بالمعلشة‼️ ومش بالزعيق ولا التخبيط فيه.. كلنا معرضين للإصابة بمرض اليأس.. فرفقاً بالبشر وكونوا رحماء.. ولو حد جاتله فرصة يستقوى على حد.. يفتكر إن الدنيا دوارة.

الناس بتنتحر لما بيتضغط عليهم وهما مصابين باليأس.. محدش بينتحر وجاهة إجتماعية.. ولا بسبب الملل.. ولا بسبب مشاكل نقص في الأموال والأنفس والثمرات.. الإنتحار نتيجة غير مرغوبة ولا مطلوبة ولكنها حتمية مع من لا يتحملون الضغوط الشديدة عليهم.. كلمة واحدة أحيانًا ممكن تسبب ضغط نفسي شديد.

كلمة طيبة برضو ممكن يكون لها أثر إيجابي شديد على نفسية الشخص اليائس..
عشان تعرف إذا كان الشخص اللي قدامك بيعاني من اليأس ولا لأ لازم تكون خبير في تحليل نفوس البشر وده مش متاح لأي حد.. فخليك فاللي تقدر عليه وإتعامل برفق ولطف وبساطة وحدود مع الناس كلها..

وإعتبر إن كل واحد فيه إللي مكفيه..
المهن الخدمية مهما كانت مزعجة لك.. خلي بالك إن فيه ناس بتعملها "يأس وإضطرار" وإفتكر الآية إللي بتقول:
(وَأَمَّا ٱلسَّاۤئِلَ فَلَا تَنۡهَرۡ)
إرفضه لو مش عاوز خدمته.. لكن بذوق وبالراحة من غير زعيق ولا عوجان.. محدش يعرف اللي رماه في مر ذُلك ليه.