تذكرون هالسالفه 😂
الزبدة بعد هالسالفة انقهرت لأن موضوعي (طال عن وضعه الطبيعي)، وبعض الناس عرضوا علي المساعدة وانكبون وان كان بحسن قصد، حتى ضاق صدري وأعرضت عنهم وقلت والله ما أروح لفلان وعلان، ودعيت الله بكل شيء وخاصة بأن يتمم لي ما أريد بكل خير وأن يسرعه من غير شر وأن يسخر لي خلقه
بعد هالدعوة، جتن رسالة من شخص يقولي بكرا -اللي هو اليوم- تجي لمنا نخلص معك، قلت زين وأقول بيني وبين نفس منك مابي شيء:) ان سخر لي الله صار اللي أبيه وفق اللي ابي وزيادة، رحت لمهم اليوم الصباح ودخلت متوجه للإدارة وبالطريق صادفت الشخص اللي بالصورة 👆 قلت ياليل هالنشبة...
قال وش عندك قلت رايح للإدارة الفلانية، قال امش معي، ايه وش تبي وأنا أتجاهله وأقول بيني وبين نفسي والله ما أنسى فعلك انقلع بس 😂، سأل للمرة الثانية ولا كأني اسمع حتى وقف والتفت قال وش عندك 😂، قلت عندي كذا وكذا، قال جاك اتصال؟ لا يالله رح، اسلوبه ونبرة صوته كأنه الأخ بسوق خضرة
حتى يخاطبك باستحقار كأني جاي أباخذ حلال أبوه، قلت أنا وضعي كذا وكذا-وفي داخلي أقول والله ما اطلع حتى أجد ضالتي لو يقفلون الوزارة:) قال أنت فلان؟ قلت نعم يخوان والله تغيرت نبرة صوته واسلوبه وألفاظه وقالي اوه تعال تعال أنت أمورك قاضية :) امش معي
طبعًا أنا ماجيت بواسطة بل اموري تعثرت عن الوضع الطبيعي:) بس شوفوا كيف تغير الاسلوب والكلام والخدمة وكأن الناس متفاوتون! وكأن الشرع يبيح ذلك عاد الحمد لله بفضله وحده أنجزت أموري
عاد الشيء المضحك أنه وحده من أوراقي له تاريخ معين ثم تنتهي، فجيت بطلع أروح مكتب خدمات أطبع ثم ارجع لهم، فنادان هذا الشخص لمكتبه وقال أنا اطبع لك 😂 جلسنا ساعه وهو ما عرف مره يدخل أبشر ومره الموقع الفلاني حتى قالي تعال اجلس، يوم جلست قلت لاهنت ممكن أجرب بدالك😂
وجلست ع جهازه وضبطنا الأمور وطبعت الورقة وتشكرته وقلت اتعبناك 🌚 قال لا أبدا حياك هذي الساعة المباركة ههههههههههههههههههههه
جاري تحميل الاقتراحات...