بقالي فترة باحاول أفهم شرطة المرور بياخدوا مرتبات علشان بيعملوا ايه! المشي عكس بقى في كل حته وفي أخطر الأماكن زي الدائري والطرق الصحراوية والمحاور، التكاتك والميكروباصات في كل حته وبيسوقوا بمنتهى الرعونة والهمجية، اللي بيرجعوا بضهرهم حتى على مطالع الكباري والمحاور ماحدش بيكلمهم

مافيش كاميرات غير علشان السرعات والحزام والموبايل، ودي السبوبة المضمونة طبعا، لكن الكاميرات دي مش بتظبط اللي ماشيين عكس أو ماشيين يخبطوا في عربيات الناس أو بيرجعوا بضهرهم في أماكن خطر، الخناقات في كل حته لأن مافيش حد بيطبق القانون، سواقين النقل بقوا خطر دائم وحوادثهم مآساوية

طب ايه الحل؟ لإمتى الناس دي هاتفضل عايشه علشان تاخد مرتبات مقابل لا شيء وعايشين على نسب المخالفات العبيطة زي الركن صف تاني والانتظار في أماكن ممنوعة والسرعات اللي بيعملوها في طرق سريعة علشان يلموا فلوس، المرور في مصر بدون قانون ولا شرطة والبلطجة والهمجية هي الأساس وبس