الحب الأول مابيتنسيش ولا في حاجه ممكن تحصل تنسيك حبك الأول، مهما عدى عليه الوقت، ومهما قابلت حتى لو حبيت بعده، راجل او ست، الإتنين واحد هو بس بيتدفن جوانا ف حتة مستخبية ماحدش غيرنا يعرفها، ماينفعش اصلاً يتنسي، ماينفعش حد ينسى اول مره قلبه يدق تجاه شخص، ولا اول كلمة بحبك تطلع منه،
ولا اول مقابلة بكل تفاصيلها و توترها و النظرات اللي بتروح وتيجي والكسوف، ولا الأماكن اللي اول خطاوي بينهم كانت على أرضها، ولا احلى طقم يتلبس والتحضير لأول لقا، والتفكير ف ايه الكلام اللي هايتقال، ولا عدم الرغبة ف المرواح والإيد وهي رافضة تسلم وكل واحد يروح بيته ،
الحواديت والسهر بليل، والمشاكل والفرحه المشتركة، ولا الرسايل اللي كنا بنصحى وننام عليها، ولا اول صورة مع بعض، ولا الغيرة من القرايب و التواريخ اللي اغلبها دلوقتي باسوردات لمعظم الأبليكيشنز بتاعتنا واللي محفورة ف عقولنا، تاريخ اول مقابلة و اعياد الميلاد
و ايام حلوة معينة كنا طايرين فيها م الفرحة الفكرة مش ف حد عاشرناه فترة وراح الفكرة كلها ف اول كل حاجه لما حصلت حصلت معاه هو، كل كلمة إتقالت وكل إحساس طلع اول مره كان معاه وليه،حبة حاجات كده مش هاقول مش هاتتكرر بس مهما إتعادت وإتكررت عمرها ما هاتبقى زي اول مرة ولا طعمها زي أول مرة
اه احنا هانحب تاني، بس مش بكل الطاقة اللي كانت ف اول حب، ولا نفس الشغف ولا نفس التفاصيل بس في فرق، بين حد قدر يدفن التفاصيل دي جواه ك ذكريات و ايام جميلة و حد تاني دفنها جواه بالشخص ده ويفضل بيحبه وهو مع غيره، ده فيه ظلم ليه و لأي فرصة هاتجيله عشان يحب تاني،
إنما التفاصيل عمرها مابتتنسي ولا بتموت، بالعكس، مع كل تفصيله صغيره بنفتكر، بس بنفتكر ونبتسم عشان بنفتكر كنا إزاي ساعتها، وحسينا ب إيه، و كنا قد إيه طايرين من السعادة وقتها.
جاري تحميل الاقتراحات...