سمعت أحد قبل كذا يقول: الحقيقة هي مسألة منظور، المقصد إنه اللي تشوفه من منظورك بيختلف من منظور غيرك. من منطلق المقولة هذي، أنا أقول: المشاعر والأفعال برضو مسألة منظور، ممكن تسمع بشخص انضر من شخص ثاني بأشياء ما توصف وما زال يحبه وتتعجب >>

بس انت بتنظر بمنظورك وبمقدار المعلومات اللي انت تعرفه فقط، ما عشت المواقف، ما كنت وسط التفاصيل. برضو ممكن تلقى شخص يوجه ردود فعل قاسية بأسباب ما تستاهل (في نظرك)، لكنك ما تعرف هذا الشخص مر بايش، عانى قد ايش >>

الحياة تُشكّلنا، من اللحظة اللي فتحت عينك على الدنيا إلى اليوم وكل شخص وكل شعور وكل موقف لهم تأثير على شخصيتك الحالية، كون شخصيتك اتغيرت بعد سنة، بعد شهر أو حتى بكرة مو معناه إنك شخص منافق، معناه إنك مريت بأشياء جديدة واتعلمت، كلنا حنفضل نتعلم مع كل يوم جديد بحياتنا >>

اللي بأوصله من كل هالكلام، لا تطلق أحكامك على أي شخص، مهما كان الظاهر واضح بالنسبة لك، الصحابي أسامة بن زيد قتل واحد من الكفار في أحد الغزوات بعد ما قال لا إله إلا الله ظنّاً منه إنه قالها عشان ما ينقتل، رد عليه الرسول صلى الله عليهم وسلم "أفلا شققت عن قلبه ؟" >>

الكلام هذا لا يعني إننا نبرر للغلط ابداً، لكن عشان نفهم لما نواجه مواقف نتعجب فيها من أفعال أشخاص آخرين إننا ما نتسرع بإطلاق أحكامنا.