و انا راجع علي البيت في شارع المعونة حوالي الساعة ١١ و نص جوني موترين فيهو ٤ انفار متفقين مع بعض، بتاع الموتر الاول جا قدامي و بقي ماشي براحة بعيق حركتي و الشارع فاضي، و انا مركز مع الزول ده مالو؟ جا بتاع الموتر التاني حاولو يفتحو الباب عشان اقيف الواضح و ما اتحرك..

و لولا انو لقي الباب مؤمن حاول كم مرة يفتحو و ما لقي طريقة يفتحو اذا القدامي حاولو يقيفو عشان اقيف في اللحظة دي انا زدت سرعتي عشان اصدمو منها قام اتحرك و لف بقي في يميني و في اللحظة دي لقو روحهم ما قدرو يعملو حاجة قامو لفو بعيد و مشو، و لا كأنو دي ريو دي جانيرو..

الخرطوم بقت ما آمنة صباحاً، نهاراً، ليلاً يا حكومة الولاية. و لو الشرطة و الف جيش جوة الخرطوم ما قادر يوفر الأمن و الأمان يبقي خسارة القروش البتتصرف في الجيش و الشرطة.
الواحد جدياً حيفكر يمش يرخص ليهو سلاح و يحمي نفسو و بيتو بالطريقة دي لانو الواضح كان ما حميت مفسك ماف زول بحميك.

لو انت بترجع "بتسوق" في اوقات متأخرة و براك ياريت تأمن أبوابك (دي حاجة بعملها كلما اركب العربية) و تخلي حاجة معاك في العربية (مسدس، كالوت، عكاز..الخ) لانو في لحظة بتلقي روحك براك قدام ٥-٦ أنفار و حاول اتصرف بسرعة في لحظات زي دي، لو ما مأمن امن.

الأربعة انفار ديل فيهم نفرين شايلين (ساطور، سكين، مسدس) شئ لا اعلمه و كانو داسنو في كيس و هم بحاول يفتحو في الباب، المهم كان في سلاح شايلنو معاهم، يعني ناوين شر لو قاومت و لا ما قاومت بتلقي مصيرك واحد.
الناس تعمل حسابها و تحفظ روحها و ربنا يغتي علي الجميع.