الجدير بالذِكر إني أتمرمطت مرمطة متوقعتش أنه مهما ساء بيا الحال أني ممكن أتمرمطها… كانت المشكله الأول ف أني أواجه المرمطة دي هي أن كنت بنت متدلعة و مش ف دماغي مسئوليات و اللى بعوزه بيجيلي.. فجأه كل ده اختفي ! اشتغلت شغلانات عمري ما كنت أتوقع أني ممكن أشتغلها عشان أقدر أعيش … 1
بقيت فجأه مطلوب مني مصاريف الدراسة عشان أعرف أكمل ف الجامعة بالاضافه لكافة مصاريفي الشخصية بالاضافه اني لازم عشان أكمل اصلا يكون ال gpa أعلي من ٣ ده غير أنه المنحة ف الأساس زي الخره ولازم مع كل ده أروح مسابقات وأكشيلي أجي الجامعة عشان المحاضرات ! طب هاجي أزاي وأنا عندي شغل … 2
مكنتش لاحقه أعمل حاجه، كنت مضغوطه بشكل غير طبيعي بجانب مشاكلى العائلية و النفسية و الصحية اللى كافيه انها تهدني من غير حاجه اصلا… طب أعمل ايه ؟ كنت بظبط مواعيد كام محاضره مع معاد الشغل يعني مثلا لو الكورس محاضرتين ف أحضر واحده بس و أحاول ألم الباقي مع نفسي، كنت بنام ٤ ساعات … 3
مش هنسي أنه من ضمن الشغلانات كانت waitress، مش هنسي ساعتها لما عملت ديسكشن البروچكت من المطبخ، بكتب ده و بعيط دلوقت أن محدش كان فاهم، كان أهم حاجه بالنسبالي أن محدش يعرف من الجامعة و لا من صحابي عشان محدش يشعر بالشفقه تجاهي، مطلبتش مساعده و اعتمدت علي نفسي ف كل حاجه … 4
حصل مشاكل كتير بسبب أني مبجيش الجامعة ف اضطريت من كام شهر أنه أقول … ميس مروة محسن وصلها أني مبجيش و استدعتني ف مكتبها و هي كانت أول حد أحكيله، حكتلها كل حاجه ، كانت منبهره بأنه كم الاحداث دي حصلتلي ! أعدت تعيط و أدتني حب و دعم و حاولت كتير تساعدني بس انا اكتفيت بأني اقولها .. 5
ساعدتني أكاديمياً كتير جداً، هي شرحت ل دكتور طارق الموضوع و دكتور طارق وافق علي كل حاجه و كان هو كمان مصدر دعم كبير و هما الاتنين حافظوا على أهم شروطي و هي السرية التامة أنه محدش يعرف حاجه عن حالتي، انا ممتنه ليهم حقيقي ولانهم ادوني فرصه و آمنوا بيا… 6
واجهت مشاكل كتير أوي ف الطريق و ف كل شغلانه بس كنت عارفه أني هقدر أتخطي ده، ناس كتير خذلوني و ناس كتير وقفوا جمبي ، مش هنسي مواقف الناس ف الفتره دي طول عمري و هتفضل محفورة ف ذهني الوحش فيهم قبل الحلو… اكتسبت خبرات كتييير ف وقت قليل لدرجة اني حسيت ان حياتي قبل كده كانت لا تذكر..7
شقيت كتير.. اثناء بقا كل ده كنت بتعلم برمجه ، خدت كم كبير اوي من المعلومات ف فتره صغيره بس كان لازم اتعلم حاجه يكون العائد بتاعها أكبر، كنت بتعلمها و بشتغل و بدرس و بدأت اشتغل فيها برضو من اول شهر، فرحت اوي لما سلمت اول بروچكت و اتبسطت بالفيد باك بتاعته، كملت ف الطريقين …8
اشتغلت ف كل حاجه لحد ما بقي مستوايا كويس اني اتفرغ للبرمجه، الموضوع فرق معايا كتير و فرق مع نفسيتي اللي كانت تحت الارض ! بقيت عارفه اتنفس شويه، بقيت باجي الجامعة !!! لولا أن رجلي أتجبست كان زماني حضرت السامر كله بس مش مهم حضرت الفتره الاخيرة وكنت مبسوطه لأنه simply عارفة أحضر!..9
ممتنة دلوقتي أن الشخص اللي كان بيهددني بمصاريف جامعتي و بتعليمي عموماً مبقاش يعرف يعمل كده خلاص ! اخيررررراً عديت ال 21 و اخيرا بقيت قادرة اصرف علي نفسي وأدفع مصاريف جامعتي، بقيت حرة ! بقيت مش خايفه و مرعوبه و قلقانه طول الوقت، سعيت كتير.. كتير اوي لحد ما وصلت ل حته كويسه .. 10
اتعرضت لاهانات وذل كتير! بالرغم من أني عمري ما قبلتهم ولا هقبلهم بس مش هنكر أني اتعرضتلهم، فيه مواقف كتير مش هحكيها من كتر ما هي مؤسفه وفيه خذلان كتير شوفته، بس اتعلمت كتير! شخصيتي اختلفت ١٨٠ درجه وأفكاري اتطورت و فضلت مع كل الألم اللي شوفته محافظه علي مبادئي وفضلت روحي هي هي..11
بحكي دلوقتي و مش مكسوفة بالعكس أنا ممتنه لنفسي أنها قدرت تمر بكل ده و ممتنه أني مازلت صامده و لسه بسعي و بعافر… وصلت للقاع بس قدرت أطلع منه و أديني اهو لسه ميأستش ♥️
جاري تحميل الاقتراحات...