معروف عن هواي عراقيين إنه إذا يريدون يتقدمون لخطبة بنية يروحون يسألون عنها وعن أهلها وعن سلوكها وشغلها ودراستها .. ونفس الشي إذا أحـد تقدم لطلب إيـــد خواتهم وبناتهم ، يطلبون منه مهلة حتى يسألـــون بيها عليه وعلى أهله وعلى سيرتهـــم بمنطقتهم ..
( يتبع )

كذلك من ياخذون سيارة ، بعد مايشوفوهه ويگلبوهه ويسئلون عن قانونيتها ويگطعون سعرها ، يشترطون عالبايع يودوهه لفيتر وسمكري حتى يفحصها ، وإذا ظهر أي شي خلاف كلام البايع تعتبر البيعة باطلة وترجع الفلوس للمشتري
وأيضا" إذا إشتروا بيت جديد يسألون عن جوارينهم عملا بحكمة الجار قبل الدار .

كذلك إذا إشتكوا من مرض أو عارض صحي ، مايروحون لطبيب إلا يسألون عنه ويتأكــدون إنه مجرب وعيادته مليانه و( كلش يفتهم ) ..
وإذا راحوا يتسوگون ، ماياخذون أي حاجة إلا بعد مايگلبوهه ويشوفون شگد تاريخ إنتهاء صلاحيتها .. ومايخلون بعلاليگهم الا الخضرة والفاكهة الطازجة والالوان الزاهية ..

كل هاي الاجراءات تدلل إنك أمام شعب واعي و مو بسهولة تضحك عليه وتخدعه وتقشمره ، وإنك بالفعل أمام شعب يعتبر من أذكى الشعوب العربية مثل ماصنفه موقع Brainstats المتخصص بقياس معدل الذكاء IQ .. لكن من تجـــي الانتخابات وتسمع إنه النتائج إتصدرها التيار الصدري والفتح ودولــــة القانون

وترجع تشوف عمار الحكيم و رعد الدهلگي وهيبت الحلبوسي والكربولي وعالية وحنان ووحدة الجميلي هنا تتأكد من حجم البساطيل الموجودة بـــروس ذولي العراقيين اللي من توصل الشغلة لمصيرهم ومستقبلهم يغيبون عقولهم وينتظرون النجـف شتگول أو يكون إختيارهم مبنـي على أساس المذهب والعشيرة والمنطقة !