رتبها

بحب اشير صور البحر هنا واقول ان الدستور الاسباني بيقول ان شواطئ اسبانيا، كلها بلا استثناء ملكية عامة ومفتوحة للكل، شوف اي مكان يعجبك على البحر وهات كرسيك وشمسيتك واقعد قضي يومك مجانا
في فنادق واماكن بتحط كراسي وشمسيات وبتأجرهم، اقعد جنبهم عادي، مفيش شواطئ خاصة/ممنوعة في البلد

اليوم على البحر لمجموعة اصحاب او عائلة مش تقريبا موحد
ايس بوكس، واكل متجهز من البيت، وممكن تزود عليه من البار اللي على البحر (الشرينجيتو)
الحلو دائما بطيخ، عنب، كنتالوب من البيت، وتسلية الشاطئ بلا منازع هي اللب، الناس جاية ترغي، تستمتع بالرمل والبحر بس، مفيش اي موسيقى ولا دوشة

انا بتكلم عن شواطئ السكان المحليين مش مصايف السياح الأجانب في ابيزا ومايوركا او كوستا براڤا (برشلونة) او كوستا ديل سول (مالاجا وما حولها)
معظم الناس بتروح في الويكند وكثير بيروح ويرجع في نفس اليوم بالعربيات، اتوبيسات، قطر.. ومعاهم كل معداتهم

مفيش مربيات ولا مساعدات، كل عائلة معاها كراسيها او خيمة بتاعتها والعابها واكلها وشربها وقاعدين مع بعض
وسواء روحت البحر بالفيراري او بالاتوبيس، مفيش فرق حقيقي على الشاطئ يقول انت من، كله قاعد جنب بعضه، وكله بيشرب وياكل بطيخ ويقزقز لب ويلعب مع اولاده او يقرأ او يتمشى او مع تليفونه

في اخر اليوم، الناس تلم كراسيها والشماسي، مفيش بيت معندوش حاجته، وترمي الزبالة في الباسكيتات المنتشرة في الشاطئ، وتاخد دش سريع في اي دش من اللي على البحر وتروح
بس كدة، بدون دفع اي فلوس لأي حد
كل يوم ممكن تروح شاطئ مختلف، وقطارات السبت والاحد كلها ناس بمايوهات وشماسي وكراسي بحر

يمكن البحر مش نفس درجة لون البحر في مصر، بس انا بتبسط اكثر بالناس والأجواء واليوم ككل اكثر بكثير من لون المياة او نوع الرمل
اي يوم عايز تروح البحر في الصيف
تعمل سندوتشات في البيت، وعلبة فيها بطيخ او كنتالوب متقطع، ومعاهم ٥ كيلو لب 😁، والمشروبات، والفوطة والكراسي والشمسية.. وبس