الصناديق الاستثمارية المتداولة واحدة من المنتجات المالية واللي بتتداول في بورصات الاوراق المالية، هي شنو وكيف اقدر استفيد من التمويل عن طريق الصناديق الاستثمارية في #السودان وكيف اقدر استثمر فيها ؟
الصندوق الاستثماري يتم انشاؤه لتمويل مشروع محدد، وممكن يكون طالب التمويل شركة او بنك او حكومة، المشروع يكون مدروس ومعمول ليه دراسات كثيرة وموضحة طريقة التشغيل والارباح، بس ينقصه التمويل اللازم.
كيف اقدر اجيب التمويل اللازم ؟ اولا اتعاقد مع جهة مصرح ليها تدير صناديق استثمارية (بنوك ، شركات وساطة مالية) يقوموا يعملوا تحليل لدراسات الصندوق وتقييم لمبلغ التمويل المطلوب ويقسموا المبلغ ده لوحدات متساوية (صكوك) .
وثانيا يحددوا معاك صيغة تمويلية يشتغل بيها الصندوق على سبيل المثال(إجارة ، مشاركة) ،ويقدموا طلب لسلطة تنظيم أسواق المال انه في جهة دايرة تمويل عن طريق طرح وحدات الصندوق للاكتتاب العام.
بعد موافقة السلطة، يتعمل اكتتاب عام ، واي زول او جهة راغبة في الاستفادة من ارباح الصندوق وعندهم مبالغ للاستثمار حيكتتبوا في الصندوق ، بعد تجميع المبلغ المحدد يقوم طالب التمويل بتنفيذ المشروع واللي ممكن تتوزع ارباحه كل ثلاثة أشهر او نصف سنة او سنويا.
الصندوق الاستثماري عنده زمن محدد، يعني لازم يتحدد ليه مدة قبل بداية الإكتتاب، بتلقى صناديق عمرها ثلاثة سنوات وخمسة سنوات ومرات عشرة سنوات، المهم يكون فترة محددة، بعدها يتصفى ويتم ارجاع قيمة الوحدات للمالكين في الصندوق وقت التصفية.
طيب هل لو ما اشتريت صكوك قبل الاكتتاب يقفل معناها الفرصة ضاعت إني ادخل في الصندوق؟ الجواب لا طبعا في طريقة تدخل بيها في الصندوق بعد ما يتم ادراجه في سوق الخرطوم للأوراق المالية ، وتقدر تشتري صكوك بالقيمة السوقية، وعادي تتخارج بالبيع بنفس الطريقة.
الصندوق الاستثماري طريقة ساهلة للتمويل وبسيطة وغير مكلفة وبتوصلك سريع ، وبتكون عملت اثر اجتماعي كبير، إنه مشروعك اتمول وخليت ناس كتار يشاركوك في ربح المشروع خلال فترة الصندوق. وعادي ممكن تعمل كذا صندوق لعدد كم المشاريع.
جاري تحميل الاقتراحات...