عقل عزم قلبه على فنجان و قهوة و قاله، مالك يا عم، مش كنت ناوى تقفل بابك للأبد؟ مش كنت تعيش دنيتك من غير وجع يقسمك نصين؟ هو انت مبتتعلمش ؟ اعمل فيك ايه بس؟ بقيت علة حياتى، لو كان بإيدى كنت قضيت على وجودك، بس للأسف محتاج لك و من غير مش هيكون لى وجود. #حجو 👇
رد قلبه، أنا محبيتهاش عشان جمالها، أنا حبيت قلبها لقيت نفسى غرقت فى جمالها، جربنى المرة بس عشان خاطرى، انا مصدقها و حاسس انها هتكون سبب سعادتى أنا و انت، و بعدين ما انت طول عمرك ماشى ورا عقلك، أستفدت ايه؟ طلع صوركوا من الموبايل كده، بذمتك عيونها اللى تسحر ينفع تتساب؟
ينفع جمالها دا يكون وراه اى وجع؟ كبر الصورة و اغرق معايا فى تفاصيلها، شايف شعرها زى سلاسل دهب، و لا أقولك انا عارفك، سيبك من جمالها، فاكر صوتها الناعم اللى بيخضع لك و انت بتكلمها، بحسها بتحضنى من أول كلمة، بحسها قمر بدر فى عز الضلمة، طوق نجاة فى وسط التوهة، طيب فاكر لهفتها عليك؟
يا سيدى كلامك على عينى و رأسى، بس تضمن منين إنها مش هتكون زى اللى قبلها؟ ما كلهم كانوا ملايكة فىً الأول و بعدين بانوا على حقيقتهم، خلاص نسيت؟ لا يا عم مش لاعب، و أنت حاول تقاوم بقى أنا تعبت منك، إسمع منى، الحب خلاص إنتهى من الدنيا، أنا هرجع أعيش حياتى، حياة مضمونة و مفيهاش الم
انت اللى شكلك نسيت، مش كنت بتجى لىً زهقان اخر الليل، مش كنت بتوجعنى كل فترة بسبب نزواتك؟ أنا قلبك و محدش هيعرفك أدى، أنت عامل فيها قوى على الفاضى، اللى زيك ميعرفش يعيش من غير حب، ماتضحكش على نفسك، أفتح لها بس شباك صغير تدخل منه و صدقنى مش هتندم، و من الاخر انا مش هعرف ابطل احبها
طيب و العمل؟ هتفضل معاندنى كده؟ طيب تعالى نتقابل فى منطقة وسط، انا هحطها تحت الاختبار مدة، و اوعدك لو نجحت هستسلم لك، لكن مش هسيبك تدخلنا فى قصة مش مضمونة.
رد القلب، إختبار دا تعمله لموظف عندك فى الشغل، لكن الحب!! الحب هو الحاجة الوحيدة اللى انت ملكش فيها اى دور
رد القلب، إختبار دا تعمله لموظف عندك فى الشغل، لكن الحب!! الحب هو الحاجة الوحيدة اللى انت ملكش فيها اى دور
الحب عمره ما كان قرار، الحب بيحصل بدون أسباب مقنعة لحضرتك، الحب هو أنى أهيم فى روح واحدة الى مالا نهاية لأنى حاسس انها وطنى، الحب أنى أطمن طول ما هى موجودة، و أثور و أغضب لما المشاعر تقل ، الحب هو الضعف أدام نظرة من عينيها، انا عندى إصرار على قلبها و مش هسيبك تقرر لوحدك
و تخلص القهوة و يفضل الصراع بينهم، قلب بيتكلم بمنتهى الحماس و حالف انه ينتصر، و عقل بيكابر و عارف انه مهزوم لكن بيقاوح اطول فترة ممكنة، لحد ما هينهار ادام اول نظرة من عينيها. #حوار_القلب_والعقل
جاري تحميل الاقتراحات...