احلى قرار اتخذته في حياتي : ابعدت كل الناس السلبيه من حياتي حتى لو كانو قروب وواحد منهم ما ادانيه ماراح اغصب نفسي اطلع معه عشان اخوياي، اهم شي في حياتك هي نفسيتك وسعادتك واذا فيه احد بيوقف في طريقك احذفه من حياتك وبتصير انسان سعيد وماعندك هموم
اكبر كذبه قاعد تمشيها على نفسك انه لا هذا خويي من سنين اعرفه من الطفوله، لا ياحبيبي الناس تتغير ونصيحه مني لاتجبر نفسك على احد، قيّم طلعتك معه شوف كيف يرد عليك وكيف يتفاعل معك، الصديق اللي انت تبغاه هو الشخص اللي لو حزنت يوقف معك ولو فرحت او انجزت يساعدك تحتفل بانجازك
الموضوع هذا قعد في راسي وقت طويل وقعدت احسب وافكر فيه لين وصلت للنتيجه هاذي، اكتشفت انه في ناس حولي اعرفهم من الابتدائي واطلع معهم لاكني ما انبسط معهم ومع ذالك نطلع دايم لانه حنا قروب وهذا هو جدولي الوحيد يعني لو ماطلعت معه مع مين بطلع؟ هذا صاحبي من سنين واشوفه من اقرب الناس لي
لين قبل كم شهر صاحبت شخص ماتوقعت بحياتي اني بوصل للميانه هاذي معه، يعني اقوله اشياء ماقدر اقولها لاخوياي اللي اعرفهم من سنين، ارتاح معه وافضفضله ولما اسوي شي كويس بحياتي يفرح معي وكانه هو اللي صايره الشي هذا
كيف كذا؟ لين بديت اكتشف نفسي انا حازم وشخصيتي، ايش انا احب ؟ ايش اهتماماتي وش جوي بالاغاني...الخ، اكتشفت اني وانا مع اخوياي انا شخص ثاني شخصيتي الحقيقيه اللي اكون مرتاح فيها ومبسوط دائما بالبيت او اذا كنت اكلم الشخص هذا، عرفت مين الناس اللي صدق بتخلي حياتي احسن واكون مبسوط معهم
لا تجبر نفسك على احد ابداً، حتى لو كان شخص في قروب وهذا الشخص دايم يعطيك طاقة سلبيه لعد تطلع معهم بتقول اجلس في البيت؟ ايه اجلس فالبيت انت فالبيت بتكون انسان سعيد اكثر لانك بديت تشيل الاشخاص السلبيين من حياتك، البداية دايم تكون صعبه لانه في مجتمعنا اذا سويت كذا ينقدون عليك
طز في الناس وطز في انتقاداتهم هاذي حياتي وانا ابغى اعيشها مبسوط، طبعاً في ناس ماتقدر تطلعهم من حياتك مثل اهلك، اذا احد من اهلك انسان سلبي عندك طريقتين يا انك تحاول تغيره وهذا شي مره صعب وبتطول لين تغير شخصيته او انك تتجنبه
الاهل اهم شي في حياتك،اللي ساحب على اهله هذا اعرف انه مافيه خير وماراح تطول معه، حاول انك كل يوم تجلس مع امك اتقهوى معها بس وسولف اترك جوالك وافتح اي سالفه ساعه من يومك هاذي خلها لامك وابوك بس حتى لو في مشاكل حاول تكسبهم لانه هم اكبر دافع معنوي لك يا سلبي او ايجابي انت اللي تحدده
عن تجربتي الشخصيه كنت انسان ٢٤ زق برا البيت اهلي ماجلس معهم ابد، لين عرفت اني غلط وطبقت الخطه هاذي، الان امي وخواتي هم اكثر ناس احبهم بحياتي لو يكلمني خويي وانا معهم اصرفه لاني اثمن وقتي معهم واعرف ان طلعتي معهم بكون فيها سعيد اكثر من اني افر بالسياره او تكية بلوت مع العيال
والحمدلله زي ما انا طورت من شخصيتي برضو ساعدت اهلي نفسياً، امي كانت انسانه سلبيه مره بس تقول فلان مات وفلان تعبان وحالات كئيبة قاعده تصير في ديره بعيده عننا، كل يوم اجلس معها واعلمها انه هاذي الاخبار السلبيه تأثر على نفسيتها والحمدلله امي صارت تعود نفسها تبعد عن الاخبار السلبيه
خلاصة الكلام ادرس حياتك وابعد اي خبر سلبي او شخص سلبي من حياتك، ثمن الناس اللي حولك واهلك سبقهم على كل الناس عشان تعيش حياة سعيده بعيده عن الاكتئاب والسلبيه والانطوائية
جاري تحميل الاقتراحات...