والدتي باعتبرها بطل حياتي في التحمل والصبر وكل حاجة، اتعلمت منها الصبر ولما بفكر هي شافت ايه وبنفس الوقت سعيده وحبها الغير مشروط لنا، طفلة مدللة كبرت ووجدت غالب املاك ابوها صودرت بالمصادرات ووالدها مرض وفضلت راضيه تزوجت سنوات قليله وزوجها سافر يدرس بروسيا سنوات وهي ام صغيره ١
ورجع والدي وعاش بالاسماعليه بمعسكر الجلاء وعشنا معه ودخلت ٦٧ وهي بتلم حاجتنا بالمنزل ورافضة تنزل مع الاجلاء للمعسكر في انتظار والدي، ولولا ان والدي اتصل وابلغها تنزل مع الاجلاء كانت هتنتظرة ورجعنا القاهره ورجع والدي بعد ٦٧ مكسور كما تحكي لنا ٢
وبعد ٦٧ والدي تقريبا كان كل ايامة بالشغل وبالمعسكرات بعد تكليفة ببناء لواءات الكباري للعبور، ويوم اجازته كان عيد لنا، وربتنا ان الست لازم تكون سند زوجها وحبيبها والكلام الحلو الي ان استشهد والدي ومنظر والدتي وهما يبلغوها الاستشهاد وكان اول يوم العيد وكانت بعمر ٢٨ ولم تتزوج٣
ورفضت الزواج حبا في والدي وان استحاله حد هيعوضها عن ابويا وحنانه وحبه ودلعه وعاشت زوجة شهيد بعمر ال٢٨ وهي تبكيه الي الان وربتنا علي كل ما كان يكتبه بمذكراته وخلاصة ما يقراء وربتنا عن اهمية الحب ولم تشعرنا ابدا اننا لوحدنا ابدا بل معانا امي الي تسد ذي اي راجل ذي ما بيقولوا ٤
ومن حبها لوالدي مقدرتش تزور قبره بمدافن الجيش الثالث الا بعد سنوات ووفقا لطلب احد الاحفاد ولما زارته البكاء والكلام اللي اتقال يكتب فيه شعر عن كم الحب وكم الاشتياق لوالدي واذي كان راجل حنين عطوف واب جميل وكان يوم صعب عليا لانه كان اول مره اشوف قبر والدي بعد سنوات ٥
وربتنا علي المساواه واني اساعد اخواتي البنات ذي ما هما بيساعدوني وفضلت تعمل لنا كل حاجة تقدر تعملها من استخراج مستندات وحتي واحنا كبار لاننا بالنسبه لها صغارها اللي هتفضل تدلعهم ورغم ان زوجها حصل علي اعلي وسام عسكري علي الاطلاق ويحق لها مزايا كثيره جدا وحصل علي ٦
نجمة سيناء من الدرجة الاولي اعلي وسام عسكري الا انها لم تستطع ان تاخد او تطلب اي من مميزات نجمة سيناء (ليس بعيب ابدا ان شخص يحصل علي هذه المميزات) ولكن والدتي لم تستطع، ورفضت تطلب شقة بالمشاريع او حج او سفر وفقا لنجمة سيناء لانها لم تستطع انها تشعر انها بتاخد مقابل فقد والدي ٧
كبرنا علي اننا لا نطلب شيء من حد ولا نطلب مقابل لصداقتنا او مقابل من معارفنا ورغم انها تعرف الكثيرين الا انها لم تستطع طلب اي شيء مقابل اسم والدي لانها اعتبرته استغلال لبطوله ابويا ٨
كبرنا والمصاريف كثير وطلبت منا نذهب المدارس بالمترو بدل الاتوبيس وانها هتمشي بنت كان بتساعدنا بالبيت لتخفيض المصاريف وعلشان تعرف تدلعنا نزلت تدرس بالجامعه الامريكية الخارجي وحصلت علي ماجيستير اداب من السوربون من المركز الثقافي الفرنسي ونزلت اشتغلت علشان تعرف تدلعنا ولا نشعر بما٩
بما شعرت به بعد المصادرات، بنت العز اللي والدها وحدها كانوا من ذوي الاملاك وشغلهم كان اداره الاملاك، نزلت واشتغلت وتعبت وكانت تركب مواصلات لشغلها وشغلها لم يؤثر في دلعنا او نظافة ملابسنا او اكلنا وغير محتاجين شيء وكل دا والابتسامه علي وجهها دائما لم اسمعها ابدا بتقول لنا ١٠
انا عملت لكم وتحملت علشانكم ابدا،بل كثير بترفض تحملنا اي شيء علشان نعرف ندلع ولادنا، صديقة لاحفادها وعارفة اسرارهم اكثر منا وبيحكوا لها اسرارهم اكثر منا لانها دائما عندها حل وعندها امل كبير، ورغم اي حاجة مبتسمه وبتحب تساعد كل الناس وتخدمهم بعنيها دون انتظار كلمه شكر ١١
امي دائما الابتسامه والحب للاخرين وكل من عرفها يحبها هي اللي علمتني السعاده الحقيقة وان الست والراجل واحد واذي ادلع اخواتي واذي اخواتي يدلعوني واحنا صغار واذي نساعد بالبيت اني ارتب غرفتي واشيل اكلي واساعد اخواتي وبكل سعاده وربتنا ان الراجل يساعد بالبيت مش عيب ابدا ١٢
شخص هنا كتب لي انت تربيه ست اكنها سبه، وميعرفش اني فخور اني تربيه هذه الست (اكيد كان نفسي ابويا ايضا يعلمني ولكن الدنيا كدا) ولهذا امي هي بطلتي ورمزي بالبطوله ذي ما ابويا رمز البطوله هي رمز البطوله المطلقة، والامهات بتشيل كثير وتتحمل كثير فوق ما نتخيل ابدا ١٣
واتمني الناس تفكر والدته عملت ايه واكيد الغالبيه هيكونوا عملوا ذي والدتي لانها ام، كتبت الكلام دا ليه معرفش ولكني حسيت عاوز ان اكتب عن بطله حياتي ١٤
جاري تحميل الاقتراحات...