رتبها

٣ اسابيع مع لجنة التعذيب
ما عارفة اذا حتتعاونو ولا لا ، اذا الموضوع حيهمكم ولا لا ، اذا حتصدقوني ولا حتقولو دي بس بت كوز ساي ، لانو لمن الواحد يكون معتقل من قبل لجنة ازالة التمكين - في بلدنا دي - بعتبروه فاسد ، لكن الكلكم م عارفينو انو الفساد ببدا من اللجنة ،

انا حقول كلامي و ما حخاف من اي زول ، و ححاول اعمل كل البقدر عليو لاني عارفة ابوي شنو ،
قبل ٣ اسابيع اللجنة جاتنا في بيتنا و اعتقلت ابوي اللواء الشاذلي حامد المادح ، خدم البلد ٣٠ سنة ، ٣٠ سنة بس في خدمة البلد و بكل اخلاص من غير م يمارس اي الاعيب او فساد و بكل نزاهة ، لحدي

لحدي ما نزل صالح عام قبل ٩ شهور بالضبط
نظرة المجتمع تجاه اي عضو في النظام البائد نمطية ، انو هو كان عميد قبل سقوط البشير معناها اكيد هو كان انسان فاسد
و نركز انو هو ما اترقى ل لواء الا بعد سقوط النظام
بس لا ما كدا ما فاسد

اللجنة اعتقلوه و اول يومين كان ف الشعب الامنية اللي فالسجانة بنية التحقيق بعداك نقلوه ل معتقل ف الصبابي بحري ، التهمة اللي كانت موجهة ليو هي ادارة صفحات في مواقع اسفيرية لزعزعة الاستقرار - الاصلاً مافي - و بتدعم الثورة المضادة

ي جماعة عاينو للتهمة بغض النظر عن انها تم اثباتها او لا ، و وروني فرايكم التهمة دي عقوبتها ممكن تكون شنو ف عهد حرية الرأي ؟

التحقيقات معاو انتهت و بقينا منتظرين يطلقو سراحو لانهم م قدرو يثبتو حاجة ، كل التهم الاتوجهت ليو ماف دلائل ليها ،
بالقانون لو الواحد تهم اثبات التهم ضدو بقدر يطلع من الحبس ب ضمان ، و اذا لم يتم اثباتها طبعاً حيطلقو سراحو من غير مسائلات ، بس احنا بقينا معلقين ،

انسان ما ليهو ذنب ولا عندو دخل بالمسائل السياسية ، شغلو كلو كان في مجال الاعلام ، علاقاتو كلها كانت بالممثلين و الصحفيين و الفنانيين ،

معتقل في حجرة ضيقة معاهو مجموعة ، الحجرة ما فيها لا مكيف لا مروحة لا لمبة ولا شباك للتهوية ، الباعوض و الذباب كمية ، بنومو فالارض ، يا جماعة ابوي بنوم في الارض ؟؟ ما رضو لينا نجيب ليو حتى مرتبة يفرشها فالارض عشان ينوم فيها ، بعد التحنيس رضو يفرش بطانية !!!!

في الزيارة قال لي و بصريح العبارة " بنتمسح بالكريم حق الباعوض عشان ننوم ، بكفي لمدة ٣ ساعات و تاني بنرجع نتمسح بيهو ، اما بالنسبة للسخانة بننتظر تجي نسمة هواء تنومنا لو ما نمنا بيها بننتظر البعدها "

الكهربا لمن تقطع بالليل كلنا بنتجرس منها و انتو مجربين

معاناتو بتخليني اعاني ، الوضع مزري شديد و انك تشوف ابوك في وضع زي دا و انت عارف انو مظلوم حار شديد
يا جماعة الحيوانات م بتقعد كدا ، دي لجنة ازالة التمكين العملت ليها قوى امنية عشان تعتقل الناس ،

ابوي ومئات الضباط والتجار و الافراد المدينين معتقلين و تحقيقاتهم مؤجلة من شهور و في واحدين تمو سنتين ، و منهم اللي تحقيقاتهم انتهت و ما طلعوهم الا برشاوي و منهم اللي تحقيقاتهم انتهت و مسكوهم عشان م عندهم حق الرشوة ، و منهم اللي م فاتحوهم بالموضوع لسة ، اي حقول كل شي القروش وينها

القروش دي بتمشي وين؟
انا عارفة حتجيني تعلقات سلبية كتيرة ، و عارفة كلامي م حيعجب كتيرين منكم ، بس لازم اقولو ، انتو محبطين
الثورة بدل الفساد جابت لينا فسادين ، جابت ليها ذئاب بتنهش بس ، يضيعونا و يضيعو البلد ، بس عايزة الناس تعرف البحصل جوة المعتقلات شنو

عايزة الناس تعرف لجنة التعذيب بتسوي في شنو
ما بتمارس اي خطوات قانوينة مع معتقلينها
العايزاو بس ريتويت عشان كل الناس تعرف

ما بس ابوي انا
ناس كتار فالحال دا
مئات الاباء بنفس الوضع دا
و انا ابوي واحد منهم و ما برضى ليو الاهانة و التعب دا
اعدمو قضيتنا ب رتويت
#اطلقو_سراح_المعتقلين
#الحرية_للشاذلي
#حقت_غاشمة
#التمكين_بتمكن

#الحرية_للشاذلي