انا باميل للروحانيات جدا . ورغم اني في شبابي انتميت لحزب شيوعي سنوات لان كنا عايزين نغير العالم . اه والله . احلام جميلة . وسبت الحزب ورحت السعودية وقلت اغير الشقة احسن بدال ما انا ساكن مع اصحابي في شقة مفروشة . المهم الميل للروحانيات عمره ما اتهز . يعني انا لما باروح جامع
لولي من اولياء الله او حد من الصحابة بابكي بكا مرير . الميل للروحانيات دا حالة خاصة جدا لكل واحد يعني صعب تقنع بيها غيرك لانها بنت التربية والظروف . وانا ابويا كان متدين جدا لكن تدين البسطاء . يعني مثلا في رمضان وانا صغير كنت ضعيف جدا فلما باصوم يقول لي افطر يا ابراهيم انا باصوم
نيابة عنكم . ولما كان يكلمني على الصلاة كان لا يقول لي جنة ولا نار . يقول الوضوء يعني طهارة والطاهر مايحصلوش حادثة مثلا لو مشي في الشارع . ولما كبرت وعرف اني بادخن سجاير سالني قلت له لا . قال لي عمك احد الجزار شافك . قلن بصراحة اه . قال لي طيب يا بني ابقي اعزم علي بسيجارة .
طلعت العلبة من درج المكتب واديته سيجارة . بس برضه ما بقتش ادخن في البيت الا نادرا جدا .المهم باه ايه اللي خلاني اميل للروحانيات . هو برضه كان لازم كل يوم بالليل يقعد يقرا قران في البيت . يرتل مع نفسه كدا وصوته يوصلني في غرفتي لدرجة تقريبا كنت حافظ نص القران من سماعي ليه .
هو كان بسيط ومستغني عن اي حاجة غير انه يقرا في المصحف في البيت قبل ماينام . وفاكر ودا المهم اني وانا ست سنين من عمري تقريبا كنت نايم جنبه على السرير صاحي لسة ماجاش ميعاد النوم وكان بيرتل اسماء الله الحسني . كان عنده مشكلة كبيرة مش فاكرها . قعد يرتل اسم يالطيف يالطيف يالطيف
كتير بصوت عالي وانا مفتح عنيا ونايم علي ضهري وطوّل اوي في يالطيف واذا بسقف الحجرة ينفتح وينزل منه طائر انا والله ما باكذب. والله شفته بعيني . طائر كبير بعرض السقف تقريبا رفرف علينا وطار وانا صرخت وارتميت علي صدره من الرعب .
وهو يقول لي ماتخافش ماتخافش وامي جاءت من الصالة بسرعة تقول فيه ايه . قال لها خلاص ربنا بعتلي علامة خير وحكالها . امي باه خدتني في حضنها وقالت له طيب وبعدين بأه في يالطيف كل يوم دي . رعبت الولد . حطت بصمتها وضحكم .
من ساعتها امنت ان العالم دي مش مجرد مادة. لا فيه روح كمان بتسمعك لو صادق وتنجيك من المهالك.علشان كدا لما باروح جوامع أوليا بابكي بكا مرير وابقي نفسي اشوفهم واطبطب عليهم زي العيال والله. بس ارجع واقول ان الميل الروحي دا مش منهج حياة لكنه للموعودين بس .انما الحياة قذرة مادة وصراع.
والسياسة والعلم حاجة تانية . الميل الروحي مؤكد يساعدنا نتحمل بس مايبقاش هو الحل ونسيب حقنا في الحياة .
قصدي العالم دا .
مشهد الطائر والسقف اللي انفتح دا انا كتبته بعد كدا في روايتي المسافات . يعني كمان مافيش حاجة بتروح .
جاري تحميل الاقتراحات...