رتبها

"كنت إتكلمت امبارح ف ثريد التربيه الحديثه وازي نتعامل مع ولادنا بإختلاف المراحل العمريه" ...
_نكمل اليوم باقي المراحل العمريه ؟؟
#سمرآ 🌹

1-نيجى بقى لما فوق الـ 13 سنة لحد الـ 18 سنة ودى فترة المراهقة وهنا لازم أحترم الخصوصية والمساحة الشخصية بتاعتهم وما أبقاش متطفل أوفر ! ولو أنا حاسس إنهم بيعملوا حاجة من ورايا فـ أنا المفروض هكون بنيت الثقة بينى وبينهم من بدرى فـ لو أنا كنت شاطر من البداية معاهم..

2-فـ لو فى حاجة هو تلقائى هييجى يحكيلى لأنى كنت صاحبه مش بس أبوه !(إن كبر ابنك خاويه)
طيب العقاب ؟ عايزين نوصف بطريقة صح ونسميه تهذيب لأن العقاب هو انتقام على حاجة هم عملوها + ما تمش تصليح الغلط إنما التهذيب مافيش انتقام وهخليه يتعلم يصلح من أخطائه . أيوة يعنى هعمل إيه يعنى ؟؟!

3-هبدأ بنفسى وهأدب نفسى الأول قبله هو لأن يمكن وغالبـًا الغلط اللى بيعملوه بيكونوا شافونا بنعمله فـ هم بيعملوه فـ علشان كده قلت أقوم نفسى الأول ، وبعدين أحلل مع نفسى كده هو ليه بيعمل كده ؟ وبعدين بمنتهى الهدوء واللطف والابتسامة اللطيفة أشوف هو ليه بيعمل كده وأعرفه إن ده غلط..

4-علشان هو يتكلم ويطلع اللى جواه وما يخافش لما يلاقينى لطيف معاه . وأخده فى حضنى وأطبطب عليه لأن ده ابنى مش عدوّى ! وأخليه كده يقترح حلول للمشكلة الفلانية وكأنى بوصل معاه لحل مش بجبره على حل ! ولو هو ما قدرش يفكر ويوصل فـ انا أقترح حلول وهو يفكر بحيث نوصل مع بعض لحل للمشكلة .

5-هقول تانى كده علشان الموضوع ما يوسعش ...نفتكر كلامنا ف ثريد امبارح ؟؟
- أكون قدوة ليهم ، وابدأ بنفسة واشتغل على نفسى علشان لما أكون أنا كويس ، تلقائى هم هيكونوا كويسين..
-إظهار المشاعر تجاههم وده مش غلط ، أبوسهم ، آخدهم فى حضنى ، أطبطب عليهم ، ألعب معاهم ، أتعاطف مع مشاكلهم..

6-أكافئهم على نجاحاتهم ، وأظهر ليهم كل المشاعر الجميلة وده مش هيبوظهم ولا حاجة !
لو بعلمهم حاجة معينة فـ تعليمهم لأى حاجة بياخد وقت ولازم أكون مقدر ده جدًا لأن لسه الجانب العقلى عندهم ما اكتملش وما ينفعش أقارن عقلى بـ عقل طفل عنده 5 سنين ولو ما قدرتش أوصله معلومة فـ أقوم اتعصب..

7-وأقوله انت ما بتفهمش ليه ؟! وهنا بصراحة هكون أنا اللى ما بفهمش مش هم .
لازم يكون بالى طويل معاهم وبلاش العقاب واتفقنا إنه اسمه تهذيب وانا شرحت فوق يعنى إيه تهذيب وإزاى بيتعمل .
أتكلم معاه مش أتكلم إليه ، يعنى أتبادل الحديث معاه فى كل حاجة مش أديله أوامر وأقوله اعمل كذا..

8-وما تعملش كذا لأن الأطفال بطبعهم عندهم فضول وعِند ولو قلتله ما تعملش كذا فـ هيعمل من وراك الحاجة اللى انت حذرتها منه ، فـ الأفضل سيبهم يستكشفوا كل حاجة وكل حاجة تتحل بإظهار الحب ولغة الحوار الهادىء وأسلوب التهذيب..
-اسمع ليهم كتير واظهر الاهتمام واتفاعل مع اللى بيقولوه..

9-بلاش أقارنهم مع أصحابهم ، وبلاش أحرجهم أو أجرحهم قدام صحابهم..
عادات كويسة أنا اعملها قدامهم زى آكل حاجات صحية أنام الساعة 10 بالليل وأصحى من 6 الصبح ، ألعب رياضة علشان أخليهم يعشقوا الرياضة وخصوصـًا كل يوم الصبح على ريق النوم كده حتى لو تمارين خفيفة خالص المهم أزرع جواهم حب..

10-الرياضة علشان تبقى عادة عندهم لما يكبروا وممكن لما يكبروا شوية أخليهم يلعبوا لعبة فردية..
-أتعود اقرأ كتب قصادهم ، وأخليهم يقرأوا قصص حتى لو حاجات عادية خالص حتى لو قصص ميكى المهم يتعود يمسك كتاب أو رواية من صغره .
-علاقتى الدينية مع ربنا غنية عن التعريف طبعـًا .

11-المفروض الكلام ده نكون كلنا عارفينه وبتمعن أكتر وبشوف إن نسبة كبيرة من جيلنا بيعانى من عقد نفسية بسبب حاجات الأهالى الله يسامحهم كانوا بيعملوا بدون وعى بدون إدراك لخطورة كل حاجة بيعملوها إلا من رحم ربى طبعـًا . فـ لو انت شوفت حاجات فى طفولتك حاول ما تعملهاش مع ولادك..

12-وحاول توقف المهزلة عندك وما تكونش انت حلقة مستمرة علشان ما نخلقش أجيال جديدة معقدة نفسيـًا وكل حاجة زى ما شوفتم بيكون ليها علاقة بالطفولة من الأساس..
-فـ لما بقول إن الجواز مش لاى حد مش ببقى بتريق لأ فعلًا ببقى بتكلم بجد ✋

13-ولما بقول إن المفروض يبقى فى زى إنترفيو لأى اتنين بيقدموا على خطوة الجواز علشان نشوف استعدادهم للخطوة دى ، مش ببقى بتريق برده وأنا هنا بتكلم من نظرة الدولة برده لأن لما يبقى عندنا جيل ضعيف ، فـ أكيد للأسف مش هيبقى عندنا الكوادر اللى تقود البلد دى فى المستقبل..

بااااس كده أنا خلصت خلاص ، وآسفه جدًا على الإطالة ، سلام 🚶🏻‍♀️👋
@rattibha ♥️🌹🙏

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة