انا كنت معيد في هندسة القاهرة حاسبات لمدة سنتين، وخبرة ٩ سنين اهه 😅، نصيحتي لخريجي الثانوية العامة اللي عايزين يشتغلوا في البرمجيات انهم يدخلوا حاسبات ومعلومات مش هندسة. انت اولى بالسنة الفرق ده! وكمان تهرب من فخ انك ما تجيبش مجموع في اعدادي هندسة وتلاقي نفسك مش عارف تخش حاسبات.
الاستثناء الوحيد اللي يخليك تخش هندسة هو انك تبقى عايز تشتغل في حاجة حكر على المهندسين (زي بعض تخصصات الهاردوير مثلا). و ده حاجة نادرة في السوق جوه و بره.
لو انت خلاص دخلت هندسة و خلصت اعدادي، ادخل حاسبات طبعا. كلامي للي لسه في اول الطريق و يقدر يوفر السنة. بس لو انت في هندسة فقسم حاسبات اختيار كويس جدا، خصوصا في هندسة القاهرة و اسكندرية.
و بالمناسبة، طلبة اعدادي هندسة اللي عايزين يشتغلوا في مجال الحاسبات. اللي يقولك خش اتصالات احسن و اهه يبقى قدامك اختيارات اكتر ده تقطع علاقتك بيه و ما تعرفوش تاني. لأن ده اسوأ نصيحة في التاريخ. ماسك نفسي اني اقولك تشتمه و الله!
جاري تحميل الاقتراحات...