كلمتين بمناسبة نتيجة ثانوية عامة.. أيام ثانوي كنت في مدرسة عسكرية في الصعيد.. كان نفسي أدخل كلية هندسة.. هريت نفسي مذاكرة وبهدلة ومرمطة دروس خصوصية وحصص تقوية لما اتعميت.. هندسة السنة اللي قبل تخرجي من الثانوية العامة كانت بتاخد من 90% واللىي قبلها 90.5 %..
أنا جبت 93.5 % وبالتالي كنت شِبه متأكد إني هدخل هندسة.. هندسة أخدت السنة دي من 94% وكان أكبر مجموع يتطلب لهندسة في تاريخ الجامعة دي!.. أخدت فترة عشان أتأقلم على الصدمة..
قررت أقدم في الكلية الحربية.. مجموعها أقل بكتير ومناسب ليا وكلية وضع ومكانة وكده..
قررت أقدم في الكلية الحربية.. مجموعها أقل بكتير ومناسب ليا وكلية وضع ومكانة وكده..
قدمت وخرجت في الكشف الطبي بسبب 13 كيلو زيادة عن الوزن المثالي مع إني كنت متفوق في باقي النقط!.. أخدت فترة عشان اتأقلم مع الصدمة..
قررت أدخل آداب.. كنت بحب الإنجليزي فقلت هدخل آداب إنجليزي.. كتبت في رغبات الكلية رغبات الأقسام بالترتيب ده: إنجليزى ثم فرنسي ثم عربي..
قررت أدخل آداب.. كنت بحب الإنجليزي فقلت هدخل آداب إنجليزي.. كتبت في رغبات الكلية رغبات الأقسام بالترتيب ده: إنجليزى ثم فرنسي ثم عربي..
(مع إني أساساً كنت ألماني في ثانوي وبالتالي خبرتي في الفرنساوي كانت بالظبط زى خبرة كابتن محمد صلاح في عمل الكوسة بالبشاميل لكن كتابة الفرنسي والعربي كانوا بس عشان أملا خانات).. القبول في قسم إنجليزي كان مرتبط بنتيجتك بمادة الإنجليزي في الثانوية..
سألت وعرفت إن السنة اللي قبلها كانوا بياخدوا من 40 درجة من 50 وأنا كنت جايب 48.. قلت فل هيقبلوني وش يعني.. أخدوا في نفس السنة من 49 وده كان أكبر درجات يتم القبول بيها وفضلت ثابتة لحد النهاردة!.. فاكس فرنساوي طبعاً وهوب دخلت قسم عربي وكنت مجبر بقى ومقداميش غيرها..
مجموع المرات اللي حضرت فيهم في الكلية في الـ 4 سنين كان 39 مرة شاملة أيام الإمتحانات.. اتخرجت وعملت ماجستير لسه مكملتوش.. ودلوقتي؟.. اللي سحبني الصحافة والكتابة!.. مجال ماكنش في بالي ولو للحظة في عز أيام التخطيط والترتيب والحسابات وقرقضة الضوافر والتوتر بتاعت المجموع!.
الخلاصة لو جبت مجموع كبير إنبسط بس بدون أفورة عشان ماتتصدمش لما تتخرج من الكلية.. ولو جبت مجموع صغير أو مش متوقع ماتزعلش عشان كده كده والله هتعدىي ومحدش عارف بكره فيه إيه.. بدون ندب ولا حسرة ولا لطم..
الحاجة الوحيدة الصالحة للتنفيذ فورًا بمجرد معرفتكم بالنتيجة هى إنكم ترموا ورا ضهركم وتخرجوا النهاردة.. اخرجوا مع أصحابكم واتفسحوا واسمعوا مزيكا واتشقلبوا وهيصوا وإلعبوا كورة أو شوفوا فيلم في السينما أو روحوا مطعم جديد.. مرحلة أنتهت و راحت لحالها بحلوها أو مرها..
اتعاملوا معاها في حجمها الطبيعي واوعوا تاخدوا حاجة على أعصابكم.. طظ في كل حاجة تسحب من نفسيتكم أو صحتكم.. متخليش حلمك ثابت عشان لو مجاش هتلاقي نفسك خسرت الفترة اللي هتبقى زعلان فيها وفي الآخر هتتأقلم.. خلى حلمك مطاط..
أنا حلمى اتنطط من مهندس لـ ظابط حربية لـ مترجم لـ مدرس لغة عربية لـ حالياً صحفىي ومراسل ومعد وصانع محتوى وكاتب سيناريو، وممكن قريب أكون أستاذ جامعى أو مخرج أو ممثل ! .. ٧ أو ٨ شغلانات ملهمش علاقة ببعض ولو كنت سألتني عنهم وأنا مستني نتيجة الثانوية زمان كنت هقول مستحيل!..
في الآخر اللي ربنا عايزه هو اللي هيكون وهو اللي فيه الأحسن ليك حتى لو ماشوفتش ده في لحظتها.. عموماً.. الثانويه العامة بعبع وهمي ملوش علاقة بشكل مستقبلك ولا نجاحك ولا تميزك هيبقوا عاملين إزاى.
جاري تحميل الاقتراحات...