رتبها

١- صباح الفل ، ان شاءالله في الثريد دا هكتبلكوا الطريق كاملًا ، بس عندي طلب بسيط الله يكرمكوا :
١- بلاش Screenshots على فيس بوك الله يكرمكوا عشان الناس مفكرة اني مليونير وابتدوا يشتموني اني ضيعت عمري وفلوسي ( اللي مش موجودة لسه والله 😄) .

٢- مبدئيا ، أنا مصرفتش فلوس كتير اوي ع المعادلات زي ما الناس متخيلة وهحكيلكوا اللي حصل وهتفهموا ، انا اتخرجت ٢٠١٤ ، قررت اتعلم واتخصص عظام ، روحت مستشفى الجامعة عشان اتدرب ( بدون مقابل طبعا ) ، لا لقيت تعليم ولا بقى معايا فلوس اصرف اصلا ف بعد ٦ شهور بطلت اروح .

٣- اخر ٢٠١٤ قررت اذاكر Step 2 معادلة امريكية وكان ساعتها ممكن السفر لجامعة حمد في قطر ب step 2 ولغة ، ومكنش مطلوب كمان امتحان المعادلة نفسه ولكن امتحان مصغر له نفس مستوى الاسئلة وارخص كتير اسمه IFOM
دخلت الامتحان في ٢٠١٥ ومنجحتش للاسف .

٤- بعدها قطر ابتدت تقفل لاسباب سياسية ، قولت خلاص انا هذاكر زمالة بريطانية MRCS واتوكل على الله وابتدي أحوش للامتحان، بعد ما حوشت فلوس الامتحان ، تم تعويم الجنية في اخر ٢٠١٦ ف اللي حوشته كنت محتاج ضعفه تقريبا ومكنش معايا فلوس ولا اقدر احوش اكتر من كدا وكل اللي ذاكرته ضاع ع الارض

٥- قعدت فترة مكتئب ومتضايق مش عارف اعمل ايه ، انا لا عارف اتعلم هنا وعايز اسافر ، ومعييش فلوس ، بعد فترة قصيرة في ٢٠١٧ قاعد بتكلم مع حد عزيز عليا جدا ف فكرنا في سكة الألماني والألماني ساعتها كان خطة مقبولة لانه في البداية مش محتاج فلوس كتير اوي ، في البداية انت محتاج الكورسات بس

٦- الكورس بيتدفع كل شهر ونص او شهرين ف دي كانت ميزة كويسة ليا اني اقدر احوش المبلغ بتاع الكورس واتوكل على الله ، بدون تفكير كتير سألت كذا حد كان مشي في السكة دي ولقيت انها الحل الامثل .
بدأت اتعلم ألماني في ٢٠١٧ والحمد لله رب العالمين في اخر ٢٠١٨ كنت خلصت B1

٧- أثناء الفترة دي كنت ماشي في الماجستير وماجستيري كان في الزقازيق وشغلي كان في العلمين وانا اصلا ساكن في اسكندرية ، كان مشوار موت بالنسبة لي من اسكندرية-الزقازيق-العلمين ف بعد ما نجحت في الفيرست قررت اني هسيب الموضوع دا واركز في الالماني .
اخر ٢٠١٨ ربنا كرمني ب شغل جديد

٨- بدأت الشغل الجديد دا ومكنش فيه وقت اني اخد اخر ليفيل في الكورس اللي هو B2 ف ذاكرته لوحدي .
في مارس ٢٠١٩ توكلت على الله وروحت امتحنت B2 في جوتة القاهرة وربنا وفقني ونجحت وبدات تجهيزات السفر .
بعت ورقي لمكتب التعديل في المانيا ، ردوا اني محتاج احجز موعد امتحان لغة طبية

٩- حجزت ميعاد امتحان وترجمت ورقي وروحت مقابلة السفارة في مايو ٢٠١٩ . الفيزا طلعت في يونيو وسافرت في يونيو ٢٠١٩ الحمد لله .
عشان تسافر مطلوب منك تترجم وتوثق ٤ او ٥ شهادات وتكون معاك شهادة B2 ويكون معاك جواب مكتب التعديل دا وميعاد الامتحان .
وبنسبة كبيرة بتاخد الفيزا

١٠- المعضلة الرئيسية بتكون ان لازم يكون عندك حساب مغلق ب ٦ شهور يعني تقريبا ٥٠٠٠ يورو ، دول بتوعك عشان لما تروح المانيا تصرف منهم لحد ما تلاقي شغل او الحل التاني اللي معظمنا بيعمله انك تدور على حد موجود هنا يضمنك ماليا ، وساعتها بتيجي من غير شرط ال ٥٠٠٠ يورو

١١- بس برضه هتحتاج فلوس تصرف منها ، محدش هيضمنك ويصرف عليك الا اذا كان اخوك.
المهم في يونيو ٢٠١٩ وصلت هنا عملت تدريب شهر في مستشفى بيشتغل فيها زمايلي ، وفي ١٣. ٨ . ٢٠١٩ من سنتين بالظبط نجحت الحمد لله في امتحان اللغة الطبية.

١٢- بعد امتحان اللغة الطبية بتبتدي تراسل المستشفيات وتدور على شغل واول ما بتلاقي شغل بتاخد تصريح عمل مؤقت مدته سنتين .
في خلال السنتين دول بتشتغل عادي خالص كطبيب ف اي مكان وبتقبض عادي خالص ، لكن مطلوب منك تعادل شهادتك. وعشان تعادل الشهادة قدامك سكة من ٢

١٣- السكة الاولى ودي صعبة وسهلة وهي انك تقدم كل ورقك وشهاداتك ويتم دراستهم ويردوا عليك بعد مدة يقولولك ورقك يعادل الشهادة الالمانية او لا
ميزتها انك مش هتمتحن امتحان المعادلة
عيبها انها بتطول وساعات ممكن توصل لسنة او سنة ونص والعيب التاني ان ملهاش حكم معين يعني حسب تقدير المحكم

١٤- لحد ٢٠١٤ / ١٥ كان معظم اللي بيقدم ورقه كان بيتقبل ودا دلوقت صعب شوية ف معظم الناس بتتجه انها تمتحن امتحان المعادلة الطبية.
دا عبارة عن امتحان عام بتتسال في لجنة شفوي من ٣ أساتذة ، تتسال بقى باطنة ، جراحة ، طوارئ ،فارما ، على حسب تخصص الممتحن.

١٥- بعد ما تخلص الامتحان دا بيكون معاك تصريح العمل الدائم وتبدأ بقى سكتك وتخصصك واي تخصص عايز تعمله.
مشوار مش سهل ومش قليل مش بسيط، لكن بتوفيق ربنا مش مستحيل يعني.
زمان كان اسهل كتير من كدا بصراحة
اللي انا ذكرته دا يخص الولايات اللي انا امتحنت فيها بس والموضوع برضه حسب الولاية

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة