ابني وهو صغير كان كل المدرسين بيشتكوا انه طول الوقت بيلعب بالمقلمة ويفضيها وينضفها ويعد الأقلام ويا اما تحت الديسك يا اما واقف ومبيحبش يقعد. بس لما يتسأل سؤال كان بيجاوب وكأنه بيركز وهو بيتحرك.كنت ايامها بعمل ماجستير في التعليم وتعلمت كتير ازاي نساعد الأطفال اللي عندهم فرط حركة.
كنت بذاكر له وهو نايم على بطنه عالسجادة ومديني ضهره وبيلعب بلعبه. يعني اسمعه واعيد وازيد واسأله يجاوب. كنت بذاكر معاه الماث والساينس في المطبخ باستخدام المواد والأدوات اللي يستخدمها في الطبخ. واستخدمت كل ما هو متاح في الحياه علشان اذاكر له بطريقة غير تقليدية. بباه كان بيلومني
وكان رأيه ان عمره ما هيفلح بالطريقة دي. كان الوسطاني واخته واخوه بيذاكروا لنفسهم. كان بيكره القعده وحريف كوره. كان يفضل طول ما بيعمل الواجب بيفكر يجري يلعب كورة. كنت اقراله الأسئله وهو يجاوب شفوي وانا اكتب الإجابه بخط ايدي. وافضل اعيد وازيد في الطريق للمدرسه لو عنده امتحان.
افتكر وهو في اولي ابتدائي الدكتورة كتبت له كونسرتا. خد اول حباية جاله مغص شديد وفضل مسهم طول اليوم زي المتخدر. حلفت عمري ما هياخد دوا تاني وهتحمله مهما حصل. فضل حبيب قلبي كده لغاية ما خد الإعدادية. كل شكوى منه كان وراها سبب مقنع ليه بيعمل كده. كنت دائما بدافع عنه وبصدقة وبفهمه.
وابوه شايف ان عمره ما هيفلح. في اول ثانوي بدأ يرفض اني اذاكر له أو أعرف عن واجباته حاجة. رفض انه يجيب تقرير يديه وقت اضافي في الامتحان. علشان يجيب درجات حلوه في السات عاده مرتين وجاب احسن من ما توقعت. وخد الثانوية ب ٣.٨ بمجهوده لوحده. ودخل الجامعة اللي نفسه فيها واشتغل وهو بيدرس
ابني ميقدرش يقعد ولازم واقف وبيشتغل ويذاكر وهو واقف يا إما نايم عالسرير ومدلدل راسه والكتاب عالأرض. طريقة غير تقليدية بس هو ده الأسلوب اللي بيريحه. انا آمنت بإنه عنده مهارات غير عادية. يسمع الحاجة مرة واحدة يروح يجيب كتب ويبحث ويدرس عنها اكتر من المقرر عليه. مش بيذاكر علشان يمتحن
لأ بيذاكر علشان يفهم ويستفيد. قرر يدرس اللي بيحبه من أصعب الحاجات. درس finance. ولازال حبة قلبي لا يحب الجلوس ويدرس ويعمل وهو واقف. يجيد الطبخ ومرتب ومنظم لدرجة الهوس. لعيب كورة هايل وكان كابتن الفريق في ثانوي وجامعة إلى ان اصيبت ركبته وتوقف بالرغم من ان الكورة كانت حياته.
الطفل اللي عنده فرط حركة مش مريض ولا محتاج دوا. انه عبقري ومحتاج حد يفهم انه بيفهم ويستوعب وعقله بيركز اكتر وهو بيتحرك. محتاج حد يؤمن بيه ويشجعه ويقف جنبه. ابني في عيد ميلاده ال ١٨ قالي "شكرا لأنك صدقتيني لما الكل كذبني وأمنت بي عندما فقد الجميع الأمل بنجاحي. انا مدين لك بنجاحي"
جاري تحميل الاقتراحات...