بخصوص موضوع اقعد وابني ده واحنا غلطانين عشان بنقولك سافر وسيبها وكده، فيه في الشركات الكبيرة قسم كامل اسمه developers enablement. وده شغلانته ببساطة انه يخلي حياتك اليومية في الديفولبمنت اسهل واحسن، CI/CD، دوكمنتيشن، تولز، تريننج ماتريال، اي حاجة هتحسن انتاجيتك هيعملوها
طيب دالوقتي انت ديفولبر صغير خالص لسه بتقول يا هادي، قاعد في دولة كل اللي ماسكينها عاملين قسم كبير اسمه: ديفولبر شلل، يعني اي حاجة يعرف يأذيك فيها هيروح ويأذيك، انترنت وهيخليه سلحفاة عشان هيموت ويعرف انت بتكتب ايه عنه، رغم انه مش مهم ولا يلزمك وجوده، بس الغشامة وحشة
تعليم وللأسف فاشخه لإنه مش مهم بالنسبة له، تيجي تتعلم اونلاين تلاقي النت موقفك ومرارة، يا اخي ليه الناس قاعدة ع تويتر اصلا؟ ما عشان الباقة! ما كان زماننا كلنا ع يوتيوب وغيره، ده حتى الموقع اللي كله مقالات تعليمية قافله بدون سبب medium!
تقبض؟ يقولك تعالى هات ٤٠٪ ضرايب عشان اعرف امشي حالي، طب هاخد ايه بالمقابل؟ طبعًا كلنا عارفين هناخد ايه، وقبل ما حد يفتي ويقولي مش اربعين هقولك ٢٣+١٤ ويمكن يكون اكتر! طيب بتاخد نص مرتبي، وقاعد بتوقفلي حياتي عشان ايه؟ ما تسيبني اشتغل على الاقل اعرف ااكلك واصرف عليك!
تيجي للقانون اللي يخليك تاسس شركة بسهولة او تشتغل كفريلانسر حتى وتبقى معتمد بشكل رسمي بحيث تدي امان للعميل اللي قدامك انه يعترف بيك وبقانونك وتمضي على عقود وغيره، تلاقي نفسك في البلح عشان مليون سبب، اهمها انك في بلد مفيهاش قانون.
تيجي تدور على شركة فيها وتسأل عن حقوقك من مواطن تاني زيه زيك، تلاقيه زيك بيتهرب من انه يسجلك في التامينات والضرايب عشان طبعًا هو مش شايف اي قيمة لاي حاجة هيدفعها للحكومة.
الأهم من ده كله، انك طول الوقت خايف من بكرة، خايف العملة تقع، خايف الصبح اي حد يمسك سلاح على اللي قاعد في الكرسي ويمشيه ويبدا يعمل دولة جديدة زي ما غيره عمل، خايف من متغيرات كتير عمرك ما هتعرفها بس انت خايف منها، اقلها ان انسان زيه زيك بس عنده كتافات يمسكك يحبسك يومين بلا داعي
احساس الخوف اللي مبينتهيش ده عمره ما بيخليك تركز في شغل ولا مستقبل، مفيش حد قلقان بيعمل حاجة لبكرة، اخرك تبص خطوة قدامك وبالكتير خطوتين، من الاسباب اللي خلتني مثلا ابطل سجاير اني فجأة اما سافرت بره بصيت لنفسي وقلت انا بعد خمس سنين عايز صحتي ابقى عاملة ازاي؟
عمري ما اهتميت بده قبل كده، كان كل اهدافي هناك: النهاردة وبكرة، وبالكتير السنة الجاية، انا بكلمك كشخص عادي خالص يعني مرحتش قرأت كتاب نورلي حياتي فجاة، لا البيئة هي المؤثر الاول على تفكيرك واختياراتك، ابي الفقير وابي الغني مش مجرد تفكير، ممكن موقف بسيط للغاية يغير شكل حياتك
فدائما اقعد وابني لما يكون عندك طوب، وتصريح بناء، ومهندسين، وماتريال محترمة، وارض صالحة للبناء، وادوات تعرف تشتريها من غير ما تدفع تمنها اضعاف زميلك اللي بيبني في اوروبا وامريكا، غير كده يبقى انت جاي تبني بيت من الرمل، وده تروح تقعد في الساحل تبنيه، او دهب، نويبع بردو حلوة
جاري تحميل الاقتراحات...