الى اذن المذن نجاوب على الصوت
فريضته فرضٍ ولباه سنه
والي يصلي وقت وتطوفه وقوت
مهما يبرر موقفه فيه هنه
اما جذبني الي على الصخر منحوت
احب جزل الشعر واجيد فنه
وعقب العشا مانيب لعاب بيلوت
لو كنت حريفٍ بحكمة وصنه
اما قلطت لمجلسٍ علم وثبوت
تجارب اصحاب العقول المسنه

الي يسولف عود وعياله سكوت
وسوالفه عن ما سمع به وعنه
وقتٍ مضا والقل في الشرب والقوت
ولا فيه لاحقدٍ ولا فيه منه
ولا يضحك الشامت على حظ مشموت
ولا يلفه الهارج على صغر سنه
والي زعل يشره ولا هوب ممقوت
والي ضحك يضحك بقلبه وسنه
واليوم كلٍ عنده فلوس وبيوت
وعلى رفيقه كل سيفٍ يسنه

والحبل معقودٍ وملوي وممتوت
ومن شاف له شي بصدره يكنه
ماقصده يعدي خطا كل شفلوت
لا حل ماجبها عطاها الاعنه
ومن مات مات وعاد من عاش بيموت
وحسب العمل يجزون نارٍ وجنة
والصوت ما ينفع الى فاتك الفوت
لو كل يوم اتجر عشرين ونة
لو الذهب بالوزن والارض بالفوت
ماحدٍ بعامر والعمر دون ظنه

وترى الردا والطيب ميراث وبخوت
اما جذبه الحظ ولا لجنّه
وبعض العرب يلبس على شوفه بشوت
تقدره ومن المصايب تحنه
وبعض العرب عند العرب كنه الموت
ماحدٍ يحبه غير لا بد منه
راشد للكبيدة