رتبها

مكان مكنتش أعرفه قبل كام شهر من انهاردة، لكن حاليا أصبح له بصمة في حياتي. #سرابيط الخادم
في قلب سيناء وعلى بعد حوالي 5 ساعات من القاهرة، بعد ما تعدي أبو زنيمة حتدخل طريق (حوالي 40 كيلو) جزء منه مدق لحد ما حتوصل هناك. طبعا مش محتاجة أقول ان اغلب شبكات المحمول مش شغالة هناك - 1

أهم ما يميز #سرابيط الخادم هو معبد حتحور ودا المعبد الفرعوني الوحيد الموجود في سيناء. المعبد فوق جبل سرابيط والي بيرتفع 850 متر من الأرض و 1100 متر من سطح البحر.
فوق الجبل برضه حاتشوف مغارات الفيروز والي كانوا زمان بيستخرجوا منها فيروز بس دلوقتي انا شخصياً ما لقيتش ولا واحدة – 2

فيه 3 طرق تطلع بيهم جبل #سرابيط وهم روض العير ووادي الخصيف ووادي الطليحة .
الطريق الرسمي الي أغلب الناس بتطلع وتنزل منه هو روض العير، الطلوع منه مش صعب والطريق أغلبه سلالم منحوتة في الجبل، لكن الطريق طويل وكمية السلالم منهكة شوية.
الطريق حوالي 3 كيلو والطلوع بياخد ساعة ونص -3

طريق وادي خصيف أقصر في الطلوع (لو حتبدأ من أول الجبل مش من الوادي)، لكن فيه حتت كتير مطالع عالية وغالبا حتحاج انك تستعمل ايديك في الطلوع. لو تقدر يبقى اطلع من وادي خصيف وانزل من روض العير عشان تشوف الاثنين والرحلة فعلاً كدا أكثر متعة.
مجربتش طريق وادي الطليحة.
#سرابيط الخادم – 4

لازم يكون معاك دليل بدوي وأنت طالع. رغم وجود لوحات ارشادية لكن صدقني سهل تتوه.
حتلاقي على روض العير كتابات الفرعونية ومعاها رسومات أظنها من قبل التاريخ(الأثريين يقرروا) زي زرافة وغزالة وأسد.
لازم برضه تزور جبل مكبر (أقرب إلى تل)، برضه عليه رسومات ما قبل التاريخ.
#سرابيط الخادم-5

طبعاً ممكن ترتب مع أهل البلد وتعمل كامبينج في الصحرا، لو مش بتحب يبقى عادي ممكن تبات في كامب هناك. أحب أفكرك تاني ان اغلب شبكات المحمول مش شغالة هناك.
#سرابيط الخادم طبيعتها مختلفة كتير في نظري عن كاترين. قساوة الطبيعة و البداوة فيها أكتر بكثير. الجبل شبه مفيهوش زرع أو خضرة -6

سينا فيها كذا سباق هجن (جمال). حضرت منهم سباق #سرابيط الخادم في سبتمبر2020 واشترك فيه على الأقل 11 قبيلة وكان تحت اشراف وتنظيم قبيلة العليقات.
السباق من أكثر الحاجات اثارة الي حضرتها في حياتي وأتمنى انه يفضل في سرابيط بدل مايتنقل في مضمار رسمي.
سرابيط مكان لازم تزوره ولو مرة♥️ -7