بنستخدم كلمة الإيجو Ego كتير في كلامنا عن مشاكلنا وأحكامنا على غيرنا.. لكن تعالوا نشوف معنى الكلمة ونفكر فيها سوا.. تعريفها في معجم اوكسفورد.. " تقدير الشخص لذاته أو شعوره بالأهمية" وفيه تعريف علمي بيقول "أن الإيجو هو الوسيط بين الوعي واللاوعي وهو المسؤول عن تحديد الهوية"
الإيجو قد يمثل المرآة التي تنظر فيها وترى صورتك.. يحكيلك عن نفسك كتير.. لكن مصدر حكاياته يأتي من فكرة أهميتك في الحياة.. وفيه علماء بيقولوا أن الإيجو هو الذات المزيفة التي فقدت اتصالها بمن حولها.. ويرتبط الإيجو بالخوف في الحفاظ على هوية صاحبه..
الاستاذة Halley Bondy قالت حاجة ظريفة "الإيجو هو أعظم نقاط القوة، وأعظم نقاط الضعف فينا.. ممكن يساعدنا على النهوض، وكمان في إمكانه أن يدمرنا" بعض علماء النفس قالوا أن الإيجو هو مخزون أراء الآخرين فينا منذ نعومة أظافرنا.. الإيجو يعشق وضع العناوين وإطلاق الأحكام على كل شئ
الإيجو بيتعامل مع الواقع كأبيض وأسود ، المنطقة الرمادية ما تعجبوش، يخاف منها.. لأنه بيشوف تهديد في أي شئ غير مألوف... المشكلة في الإيجو أن أحكامه مش دايما حقيقية، لأنه بيحكم على الماضي.. واللي يصدقه، بيفضل طول حياته مسجون في ماضيه!
وهنا ممكن نتكلم عن مصطلح ال Inner narrative وهي ببساطة، الحكاية اللي شغالة ليل نهار جوا كل واحد فينا.. حكايتك اللي بتفضل تحكيها لنفسك.. هو الحوار الداخلي الذي لا ينقطع... فيه ناس بتفضل تسمع من غير ما تفكر.. وناس لما تسمع الحوار الداخلي تسأل نفسها أسئلة وتتحدى الثوابت
كان فيه سؤال غريب جدا في موضوع الحوار الداخلي.. قالك هل الناس اللي فاقدين حاسة السمع عندهم صوت داخلي زي الآخرين؟! الأبحاث أجابت انهم ممكن ما يسمعوش صوت، لكن تفكيرهم وحوارهم الداخلي بيكون في شكل كلام مكتوب وصور..
العلماء بيقولوا أن أغلب الناس عندهم قصة الحوار الداخلي... لذا يجب أن ننتبه لما تقوله أفكارنا.. افحص حكايتك اللي بتحكيها لنفسك.. بص في مرايتك وحاول تشوف فيها حاجة مختلفة.. فيه ناس عايشين حياتهم بحكاية الضحية المظلومة.. وناس عايشين بفكرة الضعف..
أنواع كتير من الحوار الداخلي.. لكنها مؤثرة جدا جدا في حياتك.. يمكن انت مش واخد بالك، لأن الصوت ده ملازمك من ساعة ما بدأت تتعلم الكلام.. لكن لو ركزت هاتلاقي فيه مشاكل كتير، لو حلتها ممكن تغير حياتك.. صوتك الداخلي هو الدافع الرئيسي لسلوكك وردود الأفعال..
ممكن يكون صوتك الداخلي مخطوف من الخوف أو الغضب أو قلة الثقة بالنفس.. أو الغريزة! وفيه ناس صوتها الداخلي متأثر بشخص في حياتهم له سلطة عليهم.. بيسمعوه في كل خطوة.. ممكن يكون إيجابي أو سلبي.. لكن في النهاية، لا تترك صوت غريب يحتلك من الداخل!
ابحثوا عن مصطلح ال self identity وكمان مصطلح ال Ego ومصطلح ال inner narrative .. هاتلاقوا كلام مش بطال.. افحصوا المراية بتاعتكم من حين لأخر.. يمكن تكونوا شايفين فيها شخص أخر بقالكم سنين وانتم مش داريانين!
جاري تحميل الاقتراحات...