كلامي موجه للاشخاص اللي تخصصاتهم حاسب مهما كان تخصصك ( علوم حاسب ، هندسه برمجيات ، هندسه حاسب ..إلخ) كلام بقوله بسبب أن من دخلت تويتر واشوف كثير كثير جداً من شباب وبنات مبدعين وفيهم ذكاء ماشاء الله تبارك الله بس بعضهم أحصله متحطم محبط من حاجات كثير أو بسبب الاشخاص السلبين
كثير كثير حصلت ناس شغوفه وطموحه في بدايتهم بالدراسه او بعضهم على وجه تخرج ومتحطم من الناس اللي يقولون له ترا مافي وظايف تراك تتعب نفسك على الفاضي ويحاولون يحطمونهم ، وبعضهم ممكن يبرد حماسه وبعضهم ممكن يكرهه هذا المجال بسبب كلامهم
أول شي بقوله لكل طالب أو طالبه حاسب ذكي وطموح وشغوف في تخصصه قفل أذانك عن الاشخاص اللي يحاولون يحطمونك هذي نقطه مهمه الناس ماتعرف وش اللي بالمستقبل والناس ماتعرف وش رزقك اللي كاتبه لك الله هذي نقطتين لازم تخليها ببالك
الشيء الثاني بعد توفيق الله انت اللي تقدر تخلي تخصصك له مستقبل وتقدر تصنع نفسك وتقدر تصير شخص اسطوري بتخصصك وتقدر تخلي تخصصك فوق ماهو وظيفه تقدر تخليه مصدر رزق ثاني لك ، اجتهادك بتخصصك تطوير نفسك فيه التعليم المستمر توسيع شبكه معارفك بناس بتخصصك هذي حاجات تساعدك بعدين
ليش تحطم نفسك وتحكم على مستقبلك بسبب كلام واحد هو بنفسه مايدري وش كاتب له الله بكرا😟 ، اسمع كلام اخوك وركز فيه زين طورك لغتك الانجليزيه + ذاكر مواد تخصصك وابحث عن المعلومه + خصص ساعتين باليوم تعليم ذاتي لشيء بتخصصك + كثف دورات بمجالك واحرص على فهم محتوى الدوره اكثر من الشهادة
طور نفسك بتخصصك وطور لغتك الانجليزيه وبعد ما تتخرج شوف وش الشهادات الاحترافيه اللي على مجالك وادرسهم ( وافهمهم ) وخذ الشهادات هذي وفعل حسابك بلينكد ان وراح تشوف كيف الوظايف تجيك وكل ما طورت واخذت الشهادات المهمه في مجالك وانت مبدع فيهم بتشوف كيف المستقبل ممتاز بعد توفيق الله
الموضوع كله اجتهد وافعل الاسباب واتعب على نفسك وطور نفسك واحرص على التعليم المستمر ووسع شبكه معارفك بتخصصك وخلك دايم متوكل على الله ، انت عليك فعل الاسباب ورزقك كاتبه الله لك قبل تطلع للدنيا
هذا كلام من أخ الى كل أخ وأخت بنفس مجالي لا تقتل حلمك وطموحك بسبب كلام الناس وتحطيمهم مافي احد يسلم من كلام الناس انت ركز على نفسك وتطوير نفسك وافعل الاسباب وراح يرزقك الله بحاجات تنسيك كل تعب تعبته بالدراسه❤️
بالتوفيق لكل الاشخاص العظماء المبدعين ، المستقبل ينتظر أشخاص عظيمين مثلكم❤️❤️❤️🤩
جاري تحميل الاقتراحات...