بخصوص الموقف بتاع حلا شيحا انا حاكتب ثريد عن تجربة شخصية تروماتايزينج ومروعة ارجو من الجميع ان يتسع صدره لسماعة الثريد متصل بالتويتة دي
Tout d’abord انا مش ممثلة ولا شخصية عامة عرفتوني من الثورة اللي فشلت وفي الصحافة واخر مقال كتبته كان على سارة حجازي وبطلت الشغلانة لان فيه ناس دخلت تدعي على ولادي لمجرد اني كتبت انعي صاحبتي اللي موتها سبب لي صدمة كبيرة وبنت شاعر مشهور لكن انا كتبت لكم شعر؟ هل انا كتبت لكم شعر؟
انا قلعت الحجاب سنة ٢٠١٧ وصحابي عرفوا وما كتبت ده في الجرايد ولا حاجة، وزي اي حد اختار ستايل جديد لمظهره بيبقى مرتبك وبعد شوية حاجات استقريت على الكيرلي ونزلت صورتي للفريندز اونلي اسالهم عشان يساعدوني نمت صحيت لقيت حد سرب الصورة والدنيا مقلوبة عليا
اتفاجئت ان الكوكب واخد صورتي من غير اذني جيت ادور على الاكاونتات عشان اعمل لها ريبورت لقيت عشرات الالاف بلا ادنى مبالغة على حسب السيرش بتاع تويتر ومئات الحسابات والصفحات مشيرين صورتي وبيعلقوا عليا وعلى ذمتي المالية وعلى شكلي وعلى اسرتي
ناس ما اعرفهمش اتهموني بتلقي تمويلات وستات وبنات عايبوا على شكلي - بقول ستات وبنات لان مفروض يحسوا بيا اكتر من الرجالة اللي عملوا نفس الشيء - وناس اتكلمت عن ابويا الميت واهانوا جوزي وولادي
انا ما اهنتش حد ولا شتمت حد ولا اخدت فلوس من حد وضربت عليها ولا بقيت اظهر اصلا وبطلت اي شغلانة لها علاقة بالشأن العام حتى شغلتي الاصلية اللي هي الصحافة سيبتها
مفيش حد متدين ولا علماني ولا مؤمن ولا كافر دخل يقول للناس عيب عليكم تاخدوا صورة انسانة من غير اذنها وتحفلوا عليها بالالافات الا قلة قليلة جدا جدا جدا منهم - وياللعجب - عمرو اديب
انا عايزة اقولكم اني مش مسامحة ولا نفر ولا نفرة من اللي اذوني الاذية دي واتكلموا في حقي بالباطل لدرجة ان فيه ناس قالت نجيب ساويرس دفع لها عشان تقلع الحجاب
وزي ما قلت انا قلعت الحجاب سنة ٢٠١٧ والحفلة اتعملت عليا ٢٠١٨ يعني لو عايزة ابقى اتنشن هور ما كنتش استنيت سنة وصورتي اتسرقت من اكاونت شخصي للفريندز بس
انا عايزة اقول ان كل الناس اللي اتكلمت في حقي بالباطل دول والمقدرين بعشرات الالاف على حسب سيرش تويتر اني انا مش مسامحاهم وما اتمناش للناس دي اي حاجة كويسة، فيهزصفحة نزلت صوتي وكتبت كفاية كده لتنتحر وتتحسب علينا بني ادمة ووش بيضحك!
وعايزة اقول للناس اللي قعدت تقول لنا على واحدة مشهورة قاصدة تعمل لغط وعايزة تضرب على الفلوس اللي قبضتها واهانت زمايلها وكل العاملين بمهنتها وعايزة تخسر الناس مالهم وتعبهم ان هي حرة، انتوا ازاي مستحملين قبحكم ده؟ وانا ليه ما كنتش حرة؟ وليه اتهان انا وجوزي وولادي وابويا؟
الناس اللي اتصرفت معايا كده وبتكيل بمكيال تاني خالص في موقف تاني خالص دي ناس قبيحة ويا جماعة من ثمارهم تعرفونهم لو التدين بتاعكم بيخليكم كده يبقى انتوا يستحيل تبقوا على خير
نقطة اخيرة، الحالة الثورية اللي الناس بتتكلم عنها وبتقولي انت شتمتي، وانتوا شتمتوا، والوضع الثوري وضع مؤقت بيصاحبه حماس وانفعال وعصبية ملاعب يتفهم معاها اي نزق من كل الاطراف خصوصا اننا شعب مسالم واخرنا كان شتايم غيرنا شالوا سلاح على بعض اللهم احفظنا
وتاني يا جماعة: ورحمة ابويا الغالي ووحياة سيدنا النبي انا ما مسامحة ولا في حرف والسلامرعليكم ورحمة الله وبركاته
جاري تحميل الاقتراحات...