السنة اللي فاتت كنت باخد كورس أونلاين وكان نظامه انك بتقرا كل جزء وتمتحن فيه.. الكورس كان فيه تقريبا ١٢٥ جزء .. بس فيه دروس ما ينفعش تدخلها من غير ما تكون خلصت اللي قبلها، ودروس أخرى مستقلة، ممكن تذاكرها وتمتحن فيها في أي مرحلة.. الكورس كانت صلاحيته ٣ شهور، لو ما نجحتش تدفع تاني!
في نهاية الكورس جيت ادوس على زرار finished عشان اخد الشهادة، لكن ما كانش فيه استجابة.. حاولت اتصل بهم لكن الايميلات ماكنش حد بيرد عليها! سألت ناس واتشقلبت فوق وتحت، لكن مالقيتش حل.. قلت دول أكيد نصابين! قفلت القصة وقعدت كام يوم متعكنن.. بعدها بفترة جالي إيميل منهم
كانوا كلمتين.. "من فضلك راجع كل الدروس وتأكد انك عملت كل الاختبارات ونجحت فيها".. ضربت كف بكف.. هاقعد اراجع ١٢٥ درس.. سايت بدائي وعقيم.. المهم، بعد ما راجعت لقيت ٣ دروس كنت ناسيهم، عملتهم وفرحت بنفسي ودوست على الزرار بكل فخر.. لكن برضه ما حصلش حاجة!
إيميل تاني ، والرد متأخر كالعادة.. كل مرة يقولولي أراجع، لغاية ما حفظت كل حرف في الكورس والسايت.. الست آخر ما زهقت، سألتني سؤال.. انت قرأت كل القواعد قبل ما تبدأ الكورس؟ جاوبتها بكل ثقة وقلتلها أيوا! طبعا أنا كنت باعمل ok و I agree على كل حاجة تطلعلي، حاجات كتير ما قريتهاش
بصراحة زهقت، وحسيت فيه شبهة نصب.. وبعدين كبرت في دماغي وجبت القواعد وقريتها حرف حرف.. في وسط الكلام لقيت مكتوب ارقام دروس محددة لازم اجيب فيها فوق ال ٨٠% عشان انجح.. أنا كنت فاكر ان النجاح في الدروس فوق ال ٥٠%! طبعا خلقي ضاق وحسيت اني لازم افوت على دروس كتير واعيدها!
قررت انسحب.. وبعد أسبوع صحيت من النوم وفتحت اللابتوب وقعدت يومين أعيد كل الدروس المطلوب فيها سكور عالي ونجحت.. دوست على الزورار وطلعتلي الشهادة! فكروا كده معايا في التجربة دي ... هاتلاقوا فيها شبه من الحياة.. ساعات كتير كنت بافكر، ليه فيه ناس بتقعد في الحياة لغاية سن كبير
وناس بتمشي بدري! طبعا ربنا له حكمة فوق علم البشر.. بس الحياة فيها اختبارات كتير.. ساعات بنفتكر أننا نجحنا وعدينا، لكن في الواقع بيكون السكور ضعيف! وساعات نركن بعض الاختبارات على جنب وننساها، لكن شهادتنا تفضل متعلقة على اختبار واحد.. وساعات نتشكك، وساعات يصيبنا اليأس
وممكن نكون محتاجين نرجع للقواعد ونراجعها تاني، يمكن فيه حاجة فايتانا أو ما اخدناش بالنا منها! فيه اختبارات كتير في حياتنا بنفتكر أننا عديناها، لكنها بتفضل تتكرر بأشكال مختلفة، ومشاكل تفضل معلقة من غير حل لفترات طويلة جدا.. كل دي علامات عشان نعرف منها أننا لسه ما نجحناش!
فيه مشاكل هدفها تغيير حاجة جواك.. وانت قاعد بتعافر برا وتكلم فلان وتحاول تستخدم دراعك وتلاقي المشكلة مالهاش حل.. وفي لحظة ما تاخد بالك من حاجة جواك وتبدأ تشتغل عليها، تلاقي المشكلة اتحلت من نفسها وكأنها لم تكن!
وساعات تكون الشهادة متعلقة على علاقتك بشخص واحد مش قادر تصالحه بقالك سنين.. أو متعلقة لأنك لسه ما نجحتش تحب الناس، أو تخرج برا نفسك... فيه شهادات متعلقة كتير.. وناس تفضل سنين مش فاهمة الرسالة.. لغاية ما في يوم تقرر تتغير! وطبعا فيه ناس تفضل تحاول وتخبط دماغها في الحيط
لغاية ما صلاحية الرحلة تنتهي بالفشل.. دي دعوة لكل واحد فينا يراجع نفسه.. فيه ناس كل مشاكلهم في الفلوس، ولسه مش فاهمين الرسالة.. وناس مشاكلهم في نقطة ضعف تانية.. طول ما انت زي ما انت، الاختبار هايفضل متعلق، لعلك تراجع نفسك وتتغير بجد.. سمعت و شوفت قصص كتير عن رحلة ناس في الحياة
ناس قعدوا طول حياتهم يتخانقوا مع اخواتهم على فلوس و ورث وأملاك... وفي اللحظة اللي سامحوا فيها، المشاكل انتهت.. يقولك فلان قبل ما يموت قرر يصالح فلان ويسامحه! وفلان تاني اخد قرار عكسي.. ابحث في حياتك وشوف إيه الحاجات اللي لسه متعلقة..
ساعات الرد هايجيلك على طول، وساعات يتأخر، وفي بعض الأوقات تلاقي مافيش رد.. و ده برضه له دلالة كبيرة.. لكن دايما ابحث جواك.. فيه حاجة لسه محتاجة تتغير.. فيه طمع أو خصام أو كراهية أو بُخل.. اشتغل على نفسك.. هاتلاقي مشاكل كتير بتتحل لوحدها وكأنها كانت مربوطة بخيط رفيع غير مرئي!
انت ماشي في رحلة تغيير.. هاتاخد قرارك أو هايجيلك التغيير على شكل مشكلة أو ألم.. طول ما انت متذبذب في حاجة ، هاتفضل تتكرر لغاية ما تحسم اختيارك، يا يمين يا شمال.. والثبات على الإختيار هو اللي بيصنع الطريق والنهاية.. والبداية!
جاري تحميل الاقتراحات...