شوفوا ياجماعة .. إنتوا مش عاجبكم أسلوب القيادة السياسية في التعامل .. صح؟ .. اللي عنده خطة متكاملة للتعامل مع السد الأثيوبي يروح بيها للمخابرات .. الخطة لازم تكون متضمنة شوية أمور أكيد سهلة عليكم بما إنكم خبراء في كل حاجة يعني 😑 .. والمياه تكدب الغطاس .. هقول لكم المطلوب إيه .
بما إنكم الجهابذة يعني وبتقولوا علينا مجرد مطبلين . إثبتوا علمكم ده . عايز خطة مبدئية للتعامل السياسي مع إثيوبيا لحد 2025 وخطة سياسية للتعامل مع أمريكا وروسيا ودول الإتحاد الأوروبي والأفريقي وأشقاءنا العرب وأولهم السودان لحد نفس السنة . عايز تقاريركم المفصلة عن السد لحد دلوقتي
طبعًا إنتوا بتقولوا إن السد لازم يتضرب .. صح؟ عايزين خطة للضرب ، ومابعد الضرب .. وخطط دفاعكم ضد أي عدوان محتمل من الشرق أو الغرب أو الشمال أو الجنوب .. وكل جهة لوحدها .. وأذكروا أسماء الدول اللي متوقعين منها السخافات دي .. كل الخطط دي إبعتوها للمخابرات المصرية
لسه بقى إقتصاديًا .. ده الإقتصاد أهم حاجة .. وإنتوا بتنكروا إن فيه إصلاح إقتصادي حصل أصلاً .. صح؟ .. عايزين خطة إقتصادية حلوة كده علشان لو دخلنا حرب .. ولازم تربطوا الخطط الإقتصادية بالسياسية والعسكرية .. بس الإقتصاد عايز لحد 2050 . القيادة السياسية بتتكلم عن 30 ، هاتوا إنتوا 50
ده أنا لسه ماإتكلمتش عن رؤيتكم في ملفات القضايا الدولية ، وهتعملوا إيه للقضية الفلسطينية وقضايا دول الخليج ودول الشام وشمال إفريقيا .. وخطتكم لمواجهة كورونا .. مش هقول لكم إعملوا خطط تطوير مصر .. إنتوا معترضين على القروض ، سددوها عادي .. بس عايزين خطتكم بقى للسداد ومنع الإقتراض
ها؟ .. دي طلبات بسيطة عليكم كخبراء في كل حاجة .. مش إنتوا شايفين إن القيادة السياسية معملتش اللي عليها .. قدموا خططكم للمخابرات .. ولاهتجيبوا مخابرات من عندكم؟؟؟؟!! .. شفتوا بقى إن التنظير مفيش أسهل منه؟ ده كان عندكم يناير 2011م لحد يونيو 2013م .. معملتوش حاجة غير التدهورات 😑
وسبحان الله .. الرئيس السيسي أول مابقى رئيس للجمهورية .. محدش فيكم قدم خطة أو رؤية لتنمية أو لإصلاح .. كل اللي بتقولوه الشارع ، الشارع ، الشارع ، ولو جبتم حاجة غير الشارع بتقولوا الميادين . ولما الشعب يطنشكم بتقولوا قافلين الميادين . وهي مفتوحة أصلاً . مجرد أصوات للهدم مش للبناء
ده لما قامت ثورة يونيو .. وبعد يوم 3/7 على طول .. الناس مبقتش تقول الميدان .. بقت تقول الدولة .. يعني الناس عايزة تبني .. بس كان لازم نواجه الإرهاب اللي حضراتكم كنتم بتدعموه .. وبتسموا الثورة اللي خرجوا فيها الملايين إنقلاب .. بذمتكم كده إنتوا هتبقوا كوادر موثوق فيها للناس؟ لأ
خدوا عندكم بقى .. تنظير في كل حاجة ، إتحجتم بتيران وصنافير . مع إن الوثائق والأدلة والتسلسل الزمني بتاعها كلها أمور بتأكد إنها سعودية .. خونتم برضه وجايبين كام نقطة لاترتقي إنها تكون أدلة أصلاً وبتسموها دلائل .. إتهمتم الجيش بالإنقلاب والخيانة . ودلوقتي بتنظروا عليه في موضوع السد
علشان بعد كده تقولوا إن الجيش خاين والقيادة السياسية كلها باعت القضية .. طيب لو إنتوا جيتم ، هتجيبوا ناس من المريخ؟ ماهو هتتعاملوا مع نفس البشر اللي إنتوا خونتوهم .. ولاهي تلاكيك علشان إنتوا بس حاقدين إن محدش معبركم .. ماهو ده بسبب كذبكم وتخوينكم لكل الناس ..
الموقف الطبيعي إن الناس في الأزمات تلتف وتتجمع علشان تدعم القيادة السياسية بتاعتها . إنتوا بقى ياللي مش عاجباكم القيادة السياسية ، إحنا كشعب نلتف حواليكم ليه؟ ليه؟ ، بتقولوا على نفسكم وطنيين . إنتوا بره البلد خدامين للخارج وإحنا جوه مستحملين الصعب وبنحصد الحلو . موقفنا أشرف منكم
بتقولوا إن القيادة السياسية مش هتعمل حاجة؟ . معملتوش إنتوا ليه؟ .. مرسي كان مندوب بديع في رئاسة الجمهورية .. ليه مرسي قال لبيكي ياسوريا؟ وماضربش السد .. ممنعش ليه تغيير المجرى اللي تم بعد زيارته؟ .. إنتوا في 2011م ماكلمتوش المجلس العسكري ليه وسافرتم أثيوبيا من نفسكم؟ 🤔
وفدكم الغريب ده؟ سافر مرة واحدة ومسافرش تاني .. مكلمش المجلس العسكري ولاتابع معاه موضوع السد من أوله؟ .. لأ كان هاممكم الميادين والسلطة والبلاوي اللي كنتم عايزين تاخدوها على حساب قضايانا كبلد .. منكم لله .. كل ده ومش عايزين الناس تلتف علشان تدعم القيادة السياسية دلوقتي؟ ها؟
في المقابل وبمتتهى الإختصار .. قيادة سياسية بنت وطورت وعالجت وزودت قوة الجيش وعملت سياسة خارجية متوازنة وبتساعد كل مكان في الوطن العربي .. تقدمت في مجالات الصحة والإسكان والطاقة والغذاء .. حلت أمور هددت الأمن القومي . قفلت الأنفاق - منعت العبط التركي من العدوان على ليبيا والمتوسط
مفيش قضية خرجت منها مهزومة .. فطبيعي جدًا إن الناس تلتف وتدعم القيادة السياسية دي .. لما عبد الناصر مات .. وجه السادات .. دعموه بنفس درجة القلق المشروع لأنهم كانوا شايفينه ساكت ومابيعملش حاجة وأسلوبه غير أسلوب عبد الناصر .. بس مكانوش سبب في تعطيله .. لحد ماهو أجبرهم على تمجيده
حارب وإنتصر بتكملة الخطة اللي ساهم فيها عبد الناصر .. لما السادات مات وجه مبارك .. كان القلق على مصير سيناء .. وبعد سيناء .. كان القلق على مصير طابا .. فهمتوا الفكرة .. الدعم الشعبي للقيادة السياسية ده الحل اللي مفيش غيره علشان الحقوق ترجع أو تتأكد أو تضاف لمكتسبات الشعب
ماهي مشكلة فلسطين في كده .. مش متفقين على قيادة سياسية واحدة ، تونس اللي بتقولوا عليها مهد الثورة والربيع العربي .. نظامها الصحي منهار للأسف .. وسياسيًا الأوضاع مدمرة .. وربنا يكون في عون الراجل المحترم قيس سعيّد .. كبر في نظري أوي بعد زيارته لمصر ودعمه لقضيتنا لحد دلوقتي
ده ياأخي أول مرة من فترة طويلة الجامعة العربية تبقى ليها جزء من التأثير .. لأن فيه آلية عملية للتحرك فعلاً .. مشروع قرار تونس (بغض النظر عن موقف مجلس الأمن) إحنا بنكسب نقط سياسيًا بشكل تراكمي .. مش بنهبد وخلاص .. القيادة السياسة عملت كل مايمكن علشان تصلح وتدعم حقنا
الناس وقت الأزمات بتروح للقادة عنهم .. زي معنى (إلزم جماعة المسلمين وإمامهم) .. ده التصرف الطبيعي .. والموقف اللي يشرف أي حد يعمله .. القيادة السياسية مش ساحرة ، لكن إحنا معاها علشان نعمل خطوات لحل مشاكلنا .. نقترح باللي نقدر نقترحه .. بس مايبقاش الموضوع تنظير من غير أدلة .
أنا كده كده مش هندم على اللي عملته . أنا في يناير إعتقدت إنها ثورة وفرحت بيها بالرغم من إني مانزلتش . وطلعت غلطان عادي بس ماندمتش . لأ صلحت بيونيو ودعمت الراجل اللي لحد دلوقتي هو ماشي صح . يبقى العيب مش عليا ولايمكن يكون عليا مهما حصل ، لأني عملت التصرف الصح . (الدعم وقت الأزمة)
الناس اللي بتقول إن القيادة السياسية مش هتعمل حاجة .. معملتش حاجة هي من ناحيتها علشان تدعم الحق .. لأ هي معتمدة على التشويه والتشكيك علشان الناس تخرج ضدهم ويركبوا هما الموجه ويجعروا لحد مايستفيدوا من السلطة والنفوذ ويطنشوا هما زي ماطنشوا إنجازاتنا اللي عملناها 😑
فعلشان كده .. مهما حصل ؤ مهما كانت النتيحة ، أنا هفضل أدعم قيادتي السياسية ، عارفين ليه؟ علشان اللي بيسموا نفسهم معارضين مقدموش حاجة غير الهبد ، وأصحاب الكفاءات بيدعموا القيادة السياسية .. فياريت بقى تكونوا فهمتوا .. أتمنى يعني علشان بجد إنتوا مرض ولازم يتم العلاج منكم 🤔
جاري تحميل الاقتراحات...